Dan-le-Muol

(Bye-law)

THUMAPUI (PREAMBLE)

Kei uh, Gangte nam Delhi a um te hin lungkituok taka kipumkhatna, kilungsietna, kingaihnatna, kihehpihtuohna leh ki unau na ahat zawk sem leh apun beh theih nading chuleh Gangte nam min chawihmawi a aum zing theih nadingin GANGTE WELFARE ASSOCIATION (DELHI) hih ka siem ui. Zie GANGTE WELFARE ASSOCIATION (DELHI) in a tup leh dawih haw a taksuoh theih nading in tuni, tarik 28 April, 2007 ni hin GANGTE WELFARE ASSOCIATION (DELHI) member chengin zie DAN LEH MUOL hih ka nam det ui.

PART I. TUP LEH NGIM

Article 1. Gangte nam MIN, CHAWNDAN LEH KIVAIPUOKDAN, THUTAKNA, LEH KIPUMKHATNA venbit theihna di.
Article 2. Gangte namsung member khat leh khat kikal a kizahtuohna aum theih nading leh nam khat leh nam khat kikal a kizahtuohna leh kingaihnatna um theih nading.
Article 3. Gangte nam sunga thununna(discipline) humbitna, nungchang phatna leh tawmngaihna aum theih nading.
Article 4. Haksatni leh dahnia kihehnem, kipuihhuoi leh kipanpih tuoh theih nading.
Article 5. Delhi leh NCR um Gangte mi cheng Welfare member ahih theih nading uh.
Article 6. Delhi aum simlai chapang, nasem leh thil dang dang ngaihtuoh a um Gangte te adinga khantohna leh masawn theihna dinga puitu.
Article 7. Kipak te kipahpih khawm theih nading.
Article 8. Delhi leh NCR a um Gangte mite kingapna leh vengbit tu hiding.

PART II. VAIHAWMNA HUOPSUNG

Section 1. Welfare Vaihawmna Huopsung ding in Delhi khuopi leh NCR hina.
Section 2. Zie GWA(D) hih India sung leh pawlam a kipawl khawmna dangdang te tawh
kizawpmat na a umpuoi.

PART III. MEMBERSHIP

Article 1. Kuo hitaleh Welfare kivaipuokna danpi nuoi a um nuom/kikan nuom a membership fee dan dungzui a pie ta chuh Welfare member ahi.
Article 2. Welfare KUMSIM hih April – April hina.
Article 3. Member hihtheih nadingin anuoi a DAN hih zuih ding ahi:
Section (1). Membership fee:
(a). Mimal registration fee khatvei pieka cheng zakhat (Rs. 100) hin ah.
(b). Membership registration hi mimal a register hintin, Inkuon (family) tele kum nga (5) apat chunglam cheng mimal a register ding ahi.

Section (2). Renewal Fee:
Renewal Fee hih cheng sawmnih (Rs. 20) hintin, kumchenga khatvei (October thatawp ma ngei) a piek ding ahi.
(a) Kuohitaleh member hi a kum nih (2 years) sung akizawm a renewal fee pielo chuh Memberlo a ngaih hina.
(b). Member hisa Delhi nutsieh ziek ahima member tawp ta chun member ahih kit theih nading in mun chuoma a um sung kum thum (3 Yrs)/ tawmzaw ahih chun, kum thum (3 Yrs)/tawmzaw renewal fee a piekloh leh kum thum sunga a piekding gun pie’n member hikit thei ina.

Section (3). Gamdanga kichawn ziek hilo a renewal fee pik loh zieka member hitalo chun member ahih kit theih nading in a thaka aki register kit ding ahi.
Section (4). LIFE MEMBERSHIP – Kuotawbang mimal a cheng sangkhat (Rs.1000/-) khatvei piek a apiek chun amah ngei chuh Life Membership hihna piek hina.
(a). Welfare Dan-Le-Muol nuoi a benefit cheng adamsung chengin piek hintin,
(b).Amah dingin adamsung cheng renewal fee ngaita puona.
(c). Life member record/register a chuoma siem hina.

PART IV. THIGALNA DAN

Article 1.

Article 2. Sietni phatnia kikhawm tuoh mi ihiua Gangte nam chawndan puoktoh zing pawimawh leh kul ahih ziekin thigalna tawh kisai chung ah Welfare in mawhpuokna lan ah.
Anuoi a bang hih thigal ding dan ahi:
(1). Member thi chuh Gangte puondum a tuom hintin; zangna dawpna cheng sangkhat (Rs. 1000) piek hintin, galna program siem hin ah.
(2). Member hilo (Gangte) Delhia thi (Delhia aluong ki nga) chuh Gangte puondum a tuom hintin, galna program siem hin ah.
(3). Member inkuonpih (zi/pasal, nu leh pa, cha leh suohpih) thi chuh galna program siem hin ah.
(4). Memberlo inkuonpih (zi/pasal, nu leh pa, cha leh suohpih) thi chuh galna program siem hintin, hilhgaihna piek hingal ina.
(5). Member hia Delhi mun pawlama thi chuh a inkuonpihte in/akinaihpihpen in/Welfare Chairman in/Biekin ah galna program siem hina.
(6). Welfare galna Dan in ahuoploh cheng haw chuh Welfare Executive te mapuihna in ‘Gangte Christian Fellowship’ in kikhawpna masak nipen ni’n puondawkna nei intin pha asak dandan in mipite masang ah sunna nei inah.
PART V. COMPOSITION OF THE COMMITTEE:

Article 1. Welfare Executive member mi gup (6) hintin, apawimawh dungzui in Co-opted members a tampen in mi gup(6) chan hina.
Article 2. Executive te portfolio ding chuh:
Section (1). Chairman (one)
Section (2). Vice Chairman (one)
Section (3). General Secretary (one)
Section (4). Joint Secretary (one)
Section (5). Treasurer (one)
Section (6). Property Secretary (one)

Article 3. Co-opted members:
Section (1). Mun gamla taktak a um akihih ziek in a pawimawh dungzui in Executive in Co-opted members (Information Secretaries) nominate unau.
Section (2). Zie Co-opted members haw hin Executive meeting cheng ah tel thei untin, ngaihdan tuok khawm thei untin, ahinvang Quorum ah sim tel hi puontin uh, vote le neithei puontin uh chuleh executive powers nei puonau.

PART VI. EXECUTIVE THUNEIHNA LEH MAWHPUOKNA HAW

Article 1. Gangte Welfare Association hih Delhi a um Gangte mipite leh nam sunga pawl chuomchuom lakah (ho lam tihloh) thuneihna sangpen nei ahi.
Article 2. Nam leh nam kikal a buoina asuok a, pu leh pa chawndan a thugenna leh thutan ding pawimawh na ah Welfare hih Gangte pumpi thasang ding hina.
Article 3. Gangte nam sunga mimal a nam min sietna dinga tawi (gukchak, drugs, nawhchizuok leh adang adang) a um chun zie tawbang mi chunga vaihawm theihna tha Executive in nei ina. Zie vaihawm theihna haw chuh etsakna’n “show-cause notice, fines, expulsion leh adangdang haw” executive te phasak dandan hina.
Article 4. Executive te hih Welfare Dan-Le-Muol vengtup leh taksuoh dinga mawh puotu ahiu.

Article 5.Welfare fund lam pang himhim muhna, matna, etkawlna, membership fee haw Executive te collective responsibility hina.
Article 6.Executive member te hih mipi te ettawn tak ahih dinguh ahi.
Article 7.Executive member te chunga vaihawm theihna tha chuh INPI chauh in neithei ina.
Article 8.Cheng sang-nga (Rs.5000/-) apat chunglam matna dingah Executive te’n INPI phalna alak masak angai hi.
Article 9.Executive te’n apawimawh dungzui in Sub Committee form theihna tha nei unnau.

PART VII. EXECUTIVE TE MIMAL A ATHUNEIHNAU LEH A MAWHPUOKNAU

Article 1. CHAIRMAN
Section (1). Executive Powers & Functions
(i). Chairman hih Executive sunga thuneihna lienpen nei ahi.
(ii). Chairman in Executive Meeting sam thei ina.
(iii). Executive Meeting na ah Chairman in preside bawl ina.
(iv).Executive sunga vote tie aum chauh chun Chairman in vote khie thei ina.
(v). Chi leh nam thasanga thugenna/vaihawmna aum chun Chairman ahihloh leh Chairman Nominee chauh in bawl thei unau.

Section (1). Financial Powers:
(i).Chairman in sum leh pai tawh kisai a discretionary power cheng zanga (Rs.500/)-tieng nei ina.

(ii). Executive Fund himhim hih Chairman hetna loh a peikdawk phal hipuona.

Article 2. VICE – CHAIRMAN
Section (1). Executive Powers & Functions
(i). Chairman umlohna ah Committee Meeting cheng Vice-Chairman in preside ina.
(ii). Thihna ziek ahim kisutna ziek ahim a Chairman panmun a awn chun election kit macheng Vice-Chairman in Chairman dinmun luoh ina.

Section (2). Financial Powers:
Vice-Chairman in sum leh pai tawh kisai a Collective financial responsibility tihloh discretionary power bangmah anei puoi.

Article 3. GENERAL SECRETARY
Section (1). Executive Powers:
(i). General Secretary in apawimawh dungzui in Committee Meeting sam thei ina.
(ii). General Secretary in Committee Meeting na ah, meeting agenda lakhawm intin, meeting proceedings record intin, hetsak dinga kilawm cheng hetsakna pien a.
(iii). General Secretary hi Committee sunga ,chuleh pawl dang dang tawh kikal ah kithu hettuohna bulpi hina.
(iv). Welfare records himhim General Secretary kawl hina.

Section (1). Financial Powers:
(i). General Secretary in discretionary power cheng zathum (Rs. 300/-) tieng nei thei ina.
(ii). Welfare Fund himhim General Secretary hetna loha piek dawk phal hipuona.

Article 4. JOINT SECRETARY
Section (1). Executive Powers:
General Secretary umlohna mun chengah Joint Secretary in General Secretary dinmun luoh ina.

Section (2). Financial Powers:
Executive te Collective financial responsibility tihloh discretionary power nei puonau.

Article 5. TREASURER
Section 1. Financial Power :
Treasurer in Executive te Collective financial responsibility tih loh discretionary power nei thei puona.
(1).Welfare Fund himhim Treasurer khuta lutin, pawt ina.
(2). Welfare fund etkawlna himhim Treasurer mawhpuokna ahi.
i). Treasurer in fund hung lut leh pawt himhim record bu ah zik lut in maintain bawl ina.
ii). Treasurer leh Chairman in Joint Bank Account hong ina.
iii).Sum kimu himhim akimuh ni apat ni sawm(10) sunga bank account a akawih ding ahi.
(iv).Sum kimu leh kimang haw receipt tello a lak phal hipuona.
(v). Expenditure himhim voucher tello hithei puona.

Article 6. PROPERTY SECRETARY
Section (1). Executive Powers:
(i). Welfare Vanneih himhim etkawlna chu property secretary mawhpuokna hina.
(ii). Welfare Vanneih himhim Property Secretary phalna loha mat phal leh piekdawk phal hi puona.
(iii).Property Secretary in Vanneih list maintain ina.
(iv). Property Secretary hetpihna umlo in Welfare van ding chawk beh/zawk dawk theih hipuona.
Section (2) Financial Powers:
Executive te Collective financial responsibility tihloh discretionary power nei puonau.

PART VIII. INPI

Article 1. INPI THUNEIHNA HAW LEH MAWHPUOKNA HAW:
Section 1. Thuneihna tawppen chuh INPI khut ah kinga’n ah.
Section 2. INPI abawn a kigawm sehsawm a sehkhat (1/10) in lung kiguol takin General Body Meeting sam thei ina.
Section 3.INPI abawn a kigawm sehthum a sehnih (2/3)/a tawmzaw in Executive member kuo hitaleh apawimawh dungzui in apanmun apat in nawhthakna nei thei ina.

Section 4.INPI in Executive member te apawimawh na cheng ah panpih ina.

Section 5.INPI thupukna tih hih meeting a tel Welfare member ten kituok taka thupukna ahih lohleh meeting a tel member sehthum suoh sehnih (2/3) te thupukna chuh ahi.

PART IX. ELECTION DAN LEH HUNBI

Article 1. Candidate te qualification:
Section (1).Chairman:

(i). Chairman chu kum 35 apat chunglam hiding.
(ii). Welfare bonafide member hiding.
(iii). Pawl danga panna neilo hiding.

Section (2). General Secretary:
(i). Kum 30 apat chunglam hiding.
(ii). Welfare bonafide member hiding.
(iii). Pawl danga panna neilo hiding.

Section (3). Executive member dangcheng:
Kum 25 apat chunglam mi hintin, Welfare bonafide member hiding.

Article 2. Election ding dan:
Section (1). Term kichaih kum February thasung ngei a general election a um ding ahi.
Section (2). Executive te’n Election Commissioners(EC) atawmpen in mi nih(two) INPI apat atel dawk dinguh ahi.
Section (3). Election Commissioner te nasep:
(i). EC te’n nomination sapna nei untin, atawmpen in ni sawm-le-nga (15 days) hunbi pie’nau.
(ii). EC te’n election ding ni leh hun aphuondawk dinguh ahi.
(iii). ‘Unopposed’ tihloh adang cheng vote khekna ‘secret ballot paper’ a neih hina.
(iv). Mi khat in panmun khat chauh contest phal ahi.
(v). Kuo hitaleh term nih (two) kizawma Executive hisate candidate hithei tapuonau.
(vi). Bang ahim tia panmun chenga dinga nomination aum loh chun ahihloh leh panmun nga(five) sanga tawmzaw nomination aum chun EC te’n mi nih(two) tiengbek “in public interest” in “nomination on behalf” abawl dinguh ahi. Ziea teldawk pa/nu chuh kisut phal hipuona.
(vii). Election process chaih ahihtawh kitawn in EC te’n “teldawk a um Executive” te notification bawl untin Chairman GWA(D) khuta piekdawkna nei untin, zie chuh EC te nasep tawpna le hingal ina.

Section (4). Executive lui leh athak te’n kikhut sanna ding hun term beih ma hapta khat(seven days) masang ngeia aneih dinguh ahi. Kikhut san ni a pat Executive thakte mawh puokna kipan ngal ding ahi.

PART X. SUM ETKAWLDAN

Article 1. Sum muhna haw:
Welfare kivaipuokna ding leh member te panpih ngaite panpih nading in anuoi bang hin sum le pai hawl/muhna nei in vawp hina:
Section (1). Membership/Renewal Fee kidawl apat
Section (2). Member te sum kipalaksak interest apat.
Section (3). Tawmngai kuotawbang in donate a bawl.
Section (4). Zie khel ahin apawimawh dingzui in sum dawl/hawl/veipun dan guon zel hina.

Article 2. Sum kawl ding dan – alut leh apawt dan:
Welfare Fund himhim atawm- atam genloin treasurer khut ah lut in pawt ina. Sum hunglut cheng Treasurer in record bu a zik lut intin, apawt chengle hawihtaka record a zik dawk in a maintain ding ahi. Sum alut leh apawt receipt bei hithei puon tin, “INCOME RECEIPT” leh “EXPENDITURE REECEIPT” bu sem hin tin, expenditure himhim voucher tello hithei puona.

Article 3. Sum mat ding dan haw:
Section (1). Welfare sum himhim atam atawm genlohin Committee phalna loh a mat phal ahi puoi.
Section (2). Fund beia pawl um theilo ahihziekin, Welfare fund a pun theih na ding leh memberte taksap nia kithuohpihna dingin Welfare fund apat memberte’n anuoi a dan dungzui hin loan lak theih hina:
(i). Member laka lawh lakna nei khatin surety abawl ding ahi.
(ii). Thakhat a sum pung ding (interest) chuh 2% hina.
(iii). Thali (4 months) sunga dit hina.
(iv). Sum umdan dungui leh Committee phasak dungzui in member khat in a tampenin cheng sangthum (Rs. 3000/-) hun khatin ba thei ina.
(v). Bangziek ahim a dit theihlohna a neih leh Surety bawl tu’n adit hun ding beima ngeia adit sak ding ahi.
(vi). Chairman in a ziek gen khello in loan pielo thei ina.
Section (3). Pawl dang/nam dang/Welfare member hilo te Loan dieh aum uchun, Chairman in “repayment reliability” enkawm in document lakhawm intin, Welfare member laka lawh nei khat in Surety apiek chun, achunga section (2) (i) – (vi) dan nuoi ah, Loan piek hina.

PART XI. AUDIT

Article 1. Welfare fund himhim kum cheng leh khatvei bek audit neih hintin zie hih February thasung ngei a bawl ding ahi.
Article 2. Auditor ding in Welfare in Committee a member hilo guot ina.
Article 3. Audit hi thakhat sung ngei a zawh teitei ding ahi.
Article 4. Audit hunsung in Auditors te’n file leh Committee a member pawimawh asak teucheng saptheihna thuneihna nei inau.
Article 5. Auditors te’n audit na a athil muhdawk chengu leh ngaihdan, deihdan (comments/remarks/recommendation) audit report a azik lut tei ding uh ahi.

PART XII. DAN-LE-MUOL THEN DING DAN

Article 1. Zie Dan-Le-Muol kisiem hih then/beh/paihkhen/sukdik ngai aum chun INPI member sehthum suoh sehnih(2/3) bekin lung kituok taka thupukna aneih dinguh ahi.
Article 2. Zie Dan-Le-Muol kisiem hih then/beh/paihkhen/sukdik theih nadin Welfare member atawmpen in mi sawm (ten) tieng bekin lehkhazik in Executive te kawm ah ngetna pie’ntin Executive GBM sam inau.
Article 3. Zie Dan-Le-Muol kisiem hih then/beh/paihkhen/sukdik apawimawh chun Executive member te’n thupukna siemin INPI sam khawm thei inau.

PART XIII. QUORUM

Article 1. COMMITTEE:
Executive meeting himhim Executive member (abawna) laka sehtum-suoh-sehnih bek hintin, Chairman ahihloh leh General Secretary, khat zawkzawk bek, atel teitei dinguh ahi.
Article 2. GENERAL BODY MEETING (GBM):
Section (1). GBM himhim Inpi sehnih-suoh-sehkhat (1/2) tieng telna lohin neih theih hipuona.
Section (2). Dan-Le-Muol then/beh/paihkhen/sukdik chuleh Executive member nawh thak nading in Quorum chuh INPI member abawna kigawm sehthum suoh sehnih (2/3) hina.

PART XIV. GBM SAP DING DAN

Article 1. GBM himhim Executive member te lung kituok taka ahihloh leh sehthum-suoh-sehnih (2/3) thupukna in sap theih hina.
Article 2. Zielo chun member abawna kigawm sehsawm-suoh-sehkhat(1/10) tieng bekin aziek zik in Executive te kawma petition bawl in sap theih hina.
Article 3. GBM sap theihna Hunbi:
Section (1). GBM himhim Executive Coimmittee in asap ding chun, ahunding ma hapta nih (15 days)masang ngei a hetsakna umlo in sap theih hipuona.
Section (2). EMERGENCY GBM MEETING:
Apawimawh dungzui a Emergency meeting sap a ngaih chun dakkal sawmnih le li (24 hours) sungin saptheihna thuneihna Chairman khutah piek ahi.

PAUMAT HILH CHETNA

Zie Dan-Le-Muol sunga um tawh kisai a paumat hilhchetna haw:

1.Welfare – Gangte Welfare Association(Delhi)/GWA(D) tihna ahi.

2.Executive – GWA(D) a Executive Committee te tihna a kimang ahi.

3.NCR – ‘National Capital Region’ tihna ahi. NCR in ahuopchuh Gurgaon, Ghaziabad leh Noida ahi.

4.Inpi – Delhi leh NCR a um Gangte mipi te tihna ahi.

5.Quorum – Thupukna siem theih nadinga mi atawmpena um teitei ding zat.

6.Member – Kuo hitaleh Welfare kivaipuokna danpi nuoi a um nuom/kikan nuom a membership fee dan dungzui a pie ta chuh Welfare member ahi.

7. April – April – April akipat akumkit April tieng tihna ahi.

*****