hey ganggam te idam2 nau moNa Lampi zuih chun Van-gam atun theih die?
Posted by benj on July 16, 2010 , Print , Email , CommentBy Shyama Neihsial, Zonun Wellness
Thumapui : Baibul a imuh guolin malama zuih ding lampi nih a um zingzing hi. Hinna leh Thihna, malsâwmna leh gâwtna (Deut. 28). I damsung ni haw hi kum 60/70 leh 80 vel ahi a, himahleh chawm taluo ahi. Zingkal mei kai tabang phet ahi. Khuolzin guol phet hinkhuo mangte ihiu a, zawtna lam neiin ichieh chiet ui. Thagau lamah I kumsâwt mun ding zuonin I chieh ui. Zie khawvêl ahin bangtin chêngin kikhuol kâwmin go leh gam khawlin, inbul det leh khawsathei takin um mahleh hinle, nichenga zie I kumsâwt mun ding zuona chieh, nikhat a naihzêl ihi chauh ui. Zieziekchun, ikumsâwt mun ding zuona ichieh lai hin bang lampi hawh malam in ichieh kha, mahni lemhêtna, hâtna leh hêtna dan a vân-gam tun-guo ihi kha diem? I lampi zuih haw hin vân-gam ei tut taktak na diem tih kigel kâwm ngai mahmah ahi.
Vân-gam lampi chuh lampi neu ahi: (Mat. 7:13-14): A neupen apat alien pen chanin vân-gam tun i-ut chiet uh a, himahleh a lampi a chieh peih i-um puou hi. Baibul in “Kawtkhák neu ah lut un, manthaina kawtkhák chu alien a, ziea lut haw chule a tam ui. Hinna kawtkhák vang nêucha chîptak, a lampi le neu, a mute le tâwmcha ahiu” tih ahi. Baibul in vân-gam tun theihna chu bangguol ahim tih kichien takin ei hilh hi. Vân-gam lampi vang lampi nêu leh chîp ahi. Bangzieka zie lampi chuh nêu leh chîp ahi die? Pilvang taka chieh leh zuih ngai tihna ahi. Khawvêl lamlien haw guola ut dandan leh muongchang taka chieh theihna hilo tihna ahi. I tawhna ding mun phataka et pawimawh ahi tihna ahi. Ziechuh ahihziekin, paukam, nasep leh thilhih-ah pilvang taka Krista nung zuih ding tihna ahi. Gimna tâmtak thuoka vân-gam lut ding ihih dan leh hûkdamna na lau leh lîng kawma sepdawk ding ahih dan hetngilh loh ding ahi.
Isu Vân-gam zawtna lampi leh kawtkhak ahi. (Johan 14:6): I pahchakna la’n “Vân in zawtna lampi Kros ahi, chiehkâwma hêt chu nuom kasai” atih hi, adik mahmah hi. Vân-gam tun theihna ding lampi umsun chu I Lalpa Isu leh a Kros thil hihtheihna chauh ahi (Johan 14: 6; 10:1-21). Krista leh A Kros hawh malamlo a vân-gam tun theihna ding lampi dang himhim umlo ahi. Thisana luonkhum lampi chuh na zuihloh chun tung ngeilo ding na hi. Krista hawh malam itih tieng leh a hûkdamna kineih a Amah deih dana hinkhuo mat ding tihna ahi. Ei leh ei kihe ngilh a, nichenga Kros iput ding, anung izuih ding tihna ahi. Tuni hin Isu Krista hawh malama vân-gam zuon ihi nau hi? Amah kawtkhák a lutlo a mahni lemhêtna manga lamkal-tuikala ut dandana amah nungzui ihih kha dem? Kingaihtuoh khawk angai hi.
Na lampi zuih chu enchien thak kit in (Sunna La 3:40): Kumsâwt mun ding zuona ichieh zing laihin ilampi zuih chu dik ahina (?) tih ki-etthak zingzing pawimawh ahi. Amun itun tienga vâigei tading ahihziekin, lampi hawh khiel sung sau tak ana hithei ahi. Zieziekchun, Baibul “I lampi haw ki-enchien thakin, Lalpa lamah vaikit hitiu (Sunna La 3:4) ti’n ei chiel hi. Thuchingte 14:12 ah “Mihiem a dinga lampi dik hileh kilawm a um a, a tâwpna vâng thihna hithei ahi” ati. Mahni hêtna a ichieh, dik hileh kilâwm mahmaha ihêt a tawpna lungkhamna, mauna leh thihna ahi thei hi.
Ziechuh ahihziekin, I lampi zuih phataka etchet zing ding ahi. Zui khiel kha ihih chun akinthei pen a I Lalpa Isu Krista Kros bula kileh kit ngal ding ahi. Kros mun apat in panpha leng hun sawt lutlo ding ahi. Kumsâwt mun ding zuona ichieh lai hin, mahni taksa lam hamphatna ding chauh hâwl, thagau lam ngaihkhawkna himhim neilo ihih kha diem? Vân-gam lunglutna neucha le neiloa hinkhuo mangkha ina hikha diem?
Thuchaihna: Zie khawvêla kinawh taka ichieh lai hin, a nuomlam leh abaihlam haw chauh zuia chieh hikha thei ihi. Himahleh, Baibul chun kawtkhák neu ah lût guo hamham un ati. Zieziekchun, ilampi zuih hi pilvâng taka enchien in, zuikhiel kha ina hih chun Kros ah panthak hitiu. “Lampi haw a ding unla, en un, lampi pha umna lampi luihaw zui un, ziechun chieh unla, na thagau u a dingin chawlhna mu ding na hiu” (Jer 6:16). Isu Kristan a aw nêm in ahun sam, hâtlo kâwmkâwma thim laka vâklo in hung kileh kit kin in. Isu tihloh ngâl lampi dang umlo ahi.
