Meikang phelhna ah mi 7 ki suliam kha
New Bazar’ innkang ah room 25 kangtum dimdem

Lamka, July 14: Tunitak dak 7:10 pm velding in a kipatna theihlouh meikuang thupitak New Bazar ah om a, huai ah tenna inn bangzahhiam kangtum a, a room dan in 25 bang kangtum dimdem zou hi’n kigen hi. Hibangkalah, New Bazar Area Development Committee Chairman Singa Tangpua in CCpur in fire brigade tamsem i poimawhta uh chih chiang mahmah chi hi.
Lamka khawpi lailung (heart of the town) New Bazar a building kumlui mahmah ‘El-ray restaurant/building’ chih a om tunitak in naktakin kang a, inn sung apan van tamzaw tuahkhiak manlouh in om a, meikuang pen a hat mahmah ziakin, a kim leh kiang a sing inn om te baan peh gawp hi. Meikuang kipatna pen El-ray building hilou in a kiang a building khat a hotel te’ ann huanna apan kipan hizaw chi a gen pawl leng om a, ahihziakin thudik theih haksa mahmah lai hi.
Fire brigade te leng ahun in tung thou mah le uh tanker gari khat chauh ahihziak un huai akap beikhit nung un khutsam mahmah ua, meikuang nasa mahmah ahihziakin para-military force tuamtuam-te’ panpihna nget in om a, amau leng tui paw gari tawh hong tung ngal ua, guta venbitna ah leng phatuam ban sim un kilang hi.
El-ray building ahihleh Mrs Phungchawngi a hi a, hiai building a luah tam petmah hi. Inn luah a om Momocha in agenna ah, a godown kangtum dimdem a, a sung ah chi, chini, daal, antang, sathau leh a tuamtuam a koih teng kangtum vek a, tu-le-tu a hiai zah man (value) kangtum chih gentheih vual ding hilou chi hi. Hiai building a top floor a teng Simeon, Liantawi, Thangkang, Moinu leh Hoihnu te’ inn kangtum a, Ist floor a om Rumbiaksang, Nenem, Abung leh Mumung te’ van leng laktheih ding omlou in kangsia chi uhi. El-ray nung a Pa Vungzamang building leng avek in kang tum sipsip a, huai pen tamtak te’n godown a azat uh hi a, inn luah khenkhat leng om hi’n kigen hi. Phatuam ngai mipite’ ziakin New Bazar pumpi kangman lou meikuang phelhmit theih in om a, huchih lai in guta pawlkhat in van kihemkhia khenkhat ana tuah tultul uh hi’n kigen hi.
Meikuang kipat tung in electric post tuamtuam sat in om ngal a, phatuam ngai bangzahhiam in aphelhnung un meikuang phelhmit ding vual hilou a, mipi thahatna tawh phelh ahihlai in mi 7 in liamna tuak kha uhi. Amaute ahihleh Auto pu Nehru (40) of Mata, Thathang (16) of Headquarters veng, Akar (36) of New Bazar, Nemhoih (50) of New Bazar, Songkhanmung (30) of Hiangtam Lamka, Kimmalsawm (32) of Hiangtam Lamka leh Paukhanlun (18) of Hiangtam Lamka te hi ua, Akar leh Nemhoih pen a liamnaak deuh ziak un damdawi inn ah admit in om uhi.

Account ah tutan a lutlou tam
Lamka, July-14: CCpur district a Govt deptt tuamtuamte’n UBI/CCpur Branch ah account tungtawn in khalawh(salary) lazel uh a, himahleh UBI a sem staff kidaihlouh ziakin Deptt hunkhop in bank ah kal 2 paisa akipan a lawh ding uh deposit mahle uh account ah lut tuanlou in March 2010 apan lawh la theilou tamzaw hi’n kigen hi.Govt Deptt liandeuh Education leh Medical deptt te’n March kha apan kha 3/ 4 ading kha lawh a deposit nung uh ni 15 val hial mahleh tunitan account ah lut tuanlou hi’n kigen hi a, mi tamtak in March 2010 apan lawh a laklouh ziak un buai mahmah uh hi’n kigen hi.

DC in SP ah mat dingin theisak
Lamka, July-14: Census Operation 2010 nasepna teng July 15, 2010 tan a zawhsiang ding in govt in program bawl a, huchi kal ah Census Operation a kuan dia seh a om Jangkhosei, Superviser of Dampi JB School leh N.Nabachandra , Enumerator of P.Hmunte Jr H/S a kuanlouh ziak un DC/CCpur in tuni’n SP/CCpur kiangah akin lama matkhiak ding in theisak chihthu om hi.

Pension(Red Card) sum la mitam
Lamka, July-14: Lamka Police Station ah tulai in zinglam dak 10:00 apan nitaklam dak 3:30 sung National Old Age Pension Scheme(Red Card) neite ading in sum kihawm in sum la dingin pitek-putek tamtak kuan uh a, amau tha a paizouloute leng Autorickshaw in a innkuante un tonpih uhi.

Dist Advisory Committee meeting
Lamka, July-14: K.Thansang, MCS, Addl DC/CCpur makaihna in a office chamber ah tuni’n “Dist Advisory Committee on Nehru Yuva Kendra(NYK) Youth Program” meeting om a, member hunkhop tel uhi. Huai ah kum 2010-2011 ading NYK/CCpur Annual Action Plan genkhawm uh a, NYK/CCpur in 2010-10 sung in program tuamtuam 98 conduct thei ding uh a, huai a zatding in Rs.6,88,000/- bikhiah uhi. Program tuamtuam lak ah capacity building of Youth training ah Rs.1,00,000/- bei ding a, mi 110 training piak ding in bikhiah uhi.

Commissioner(Home) kiknawn
Vumlunmang Vualnam, IAS, Commissioner (Home/ Health & FW) in hihding poimawh tuamtuam a neih ziakin zan in Lamka hongpha in giak a, tuni nitaklam in Imphal ah kiknawn hi.

Red Cross Society meeting
Red Cross Society, CCpur Branch pawl July 15,2010 zinglam sak 11.00 in DC/CCpur office a BRGF Resource Centre ah meeting ding uhi. Jacintha Lazuras,IAS, DC/CCpur tulel in Red Cross Society, CCpur Branch a President ahi hi.

SP/CCpur in earned leave la
G.B Sharma, IPS SP/CCpur in July 18 apan Aug 15, 2010 sung earned leave(suti) la in Texas University ah a tanu admission bawl hding in hawhsawm a, amah omlouh sung Manimohan Singh, MPS, Addl SP/CCpur in incharge lending hi’n kigen hi.

Training-cum-demonstration
Lamka, July-14: District Fishery Officer/ CCpur saina in Tuibuong a office complex ah July 16, 2010 in “Cage Culture and its benefit for Rural Economy” chih thupi anei in Fish farmers’ training -cum- demonstration program om ding hi.

Chakka Bandh in district 4 buaisak
Imphal, July-14: All Naga Students Association Manipur(ANSAM) te’n July 12, 2010 nitaklam dak 6.00 akipan dakkal 72 sung Manipur singtanggam a Naga mite tenna teng ah Chakka bandh puan un Senapati, Ukhrul, Chandel leh Tamenglong ah nawngkaina thupitak tun hi’n kigen hi. Imphal-Dimapur kikal National Highway No. 39 a Senapati district ah Gari pai muh ding omlou a; Ukhrul, Chandel leh Tamenglong district ah leng gari tailou hi. Imphal-Jiribam lamlian ah leng Gari tai muhding omlou chih thutut kingah hi.

Assam Rifles- te’n helte 2 mankhia
Imphal, July-14: Tuni zingsang dak 5.30 velin 23-Assam Rifles-te’n Lamlai bazar ah operation bawl uh a, KCP(MC) atel mi 2 mankhia uh chihthu om hi. Huaite Amarjit(20) of Lamlai Makha Leikai leh Khaidem@ Sashikanta(32) of Lamlai Makha Leikai hi uh a, Assam Rifles-te’ huai mi 2te akipan in Chinese hand grenade 1, semi-rifles tang 5, Chinese CM tang 1 leh atang hom 15 mukhia uh a, mi 2 a matkhiakte uh leh van a muhkhiakte uh Lamlai Police Station ah pekhia uh chihthu om hi.

Meitei Council te’n bandh puang
Imphal, July-14: Helpawl in zan nitakin Meitei Council, Moreh a makai khenkhat pimang(kidnap) sawm uh chi a lungkimlouh latsakna in Meitei Council, Moreh pawlin tuni nitaklam dak 4.00 akipan in Moreh khawsung banah Imphal-Moreh kikal lamlian National Highway No. 39 ah leng Gari tai om theilou ding in bandh puang uh chihthu om hi.

B.Sc(Agri) & B.Tech(Agri Engg)
Imphal, July-14: Iroisemba a Agri College ah kum 2010 akipan B.Sc(Agri) sinding, Gangtok a College of Agri Engg & Post Harvest Technology ah B.Tech(Agri Engg) sin ding leh Tura a College of Home Science ah B.Sc(Home Sc) & B.Tech(Process & Food Engg) sinding lakna ding a selection test om tuni’n a result suak a, B.Sc(Agri) sin dingin Thangniang Kimboi Vaiphei(Roll No. 174) leh B.Tech(Agri Engg) sin ding in Thongkam Singson(Roll No. 597) telkha uhi.

Assembly News:
Assembly ah Demand 3 pass uh
Imphal, July-14: Manipur Assembly Session ah tuni inDemands for Grants,2010-2011 akipan Department 3 in March 31, 2011 tan a zat ding uh Demand tuamtuam 3 kigawm Rs. 3,79,15,22,000 (Rs. 379 crores) pass uhi. Huaite

1. Demand No. 4- Land Revenue Stamps &
Registration and District
Administration : Rs. 43,20,55,000
2. Demand No. 8- Public Works Deptt : Rs. 318,83,22,000
3. Demand No. 26-Administration of
Justice : Rs. 17,11,45,000

High Level Officers Committee in sui
Imphal, July-14: O. Joy,MLA leh Dr Ng. Bijoy,MLA in Primary Teacher lakna dia DPC result hi a kigen tuma a Newspaper suak tawh kisai in tuni’n Assembly ah Calling Attention Motion pawlut uh a, Education Minister L. Jayentakumar in huai a dawnna ah Chief Secretary makaihna High Level Officers Committee in thil omdan suizui lai uh a, Committee report muh hunhun in bangchidan a action lak ding hiam chih et hiding chi’n gen hi. Huai thu genkhawm lai in member khenkhat in DPC cancell a a thak a DPC om dinga deihthu gen uhi. Hileleng Education Minister in Committee in thil omdan a sui uh zawhma in bangmah thuchian gen theih hilou hi’n puang hi.

Kal 1 sungin Manipur govt a piak hiding
Imphal, July-14: Manipur govt in BRO akipan National Highway No. 53(Imphal-Jiribam road) la hiam chihthu O. Joy in tuni’n Assembly a dotna a bawl Works Minister K. Ranjit in a dawnna ah huai lamlian kal 1 sungin Manipur govt a piakkhiak ding thu Centre in notification suah ding hi’n gen hi. Works Minister in a genzelna ah Chief Minister leh amah tuma a Delhi a hawhlai un July 1,2010 in Prime Minister leh Union Minister(Surface Transport) tawh huaithu genkhawm uh hi’n gen a, Surface Transport Ministry in lamlian dinmun enkhe dia official-te hong sawl dingin leng genpih uh ahihdan Works Minister in gen hi. Lamlian bawlna din tender suahkhiak kal ngakzawh ahihlouh ziakin contractor 7 in labour 235 zangin nasem uh a, machine 49 zang uh hi’n leng gen hi. Tu’n lei 3 bawlzawh hi a, a neuzaw 3 kibawl lel lai hi’n leng Minister in gen hi. Barak-lei(bridge) Rs. 66 lakhs bei bawl hileh van gik tak pua Gari leng paithei ding hi’n leng gen hi. Works Minister in National Highway No. 39 a Mao akipan Moreh tan bawlna ding fund khahkhiak(released) hi a, tuktui luan(monsoon session) bei hunhun in nasep kipan ding chi’n gen hi.

Committee 3 telna ding pawlut
Imphal, July-14: Chief Minister O. Ibobi in tuni’n Assembly Session ah Financial Committee 3 tel ding tungtang pawlut a, huai dungzui in July 23, 2010 in 1) Committee on Public Accounts, 2) Committee on Estimates leh 3) Committee on Public Undertakings ading in member 7 chiat tel(elect) hiding chihthu om hi.

NSCN IM in Zeliangrong-te’ panlakdan theihpih
Dimapur, July 4: NSCN (I-M) thusuak in tuni a agenna ah, Zeliangrong te’n Naga movement a pan alakdan uh NSCN IM in theihpih mahmah a, Naga political struggle ah Zeliangrong te’ panlakdan pen Naga khangthu ah mang nawnlou ding chi uhi. Zeliangrong Nampi sung ah Pou Jadonang in Nam leh Gam a iitdan lamdang mahmah a, amah sulnung zuithei ding Nagate’ lak ah tawm mahmah lai chi uhi. NSCN (I-M) nuai a MIP thusuak in agenna ah, Naga nuai ah Nampi tamtak kikhai khawm a, Zeliangrong tel a Nam tuamtuam te’ panlakna ziakin Naga movement lawhching tou zel chi uhi.
NSCN (I-M) general secretary Th. Muivah in leng zanhal in Zeliangrong leader te Peren mun ah kimuhpih a, “Nagalim,” tungtang ah ngaihdan thuktak kikum uh chi uhi. Steering Committee convenor, “Lt.Gen(Retd.)” V. S. Atem in agenna ah, Pou Jaduanang ahihleh 2006 kum in NSCN (I-M) collective leadership in Nagate’ adia mihangsan in ana chiamteh khinta chi hi. NSCN (I-M) “Kilo Kilonser” Raising in Zeliangrong Nam te’n Naga sung ah poimawhna liantak nei ua, amaute’ ziak a hiai tan ah lawhchinna om ahihleh maban ah kalsuanna thupisem a hon neih uh deihhuai chi a, Pou Jaduanang, Phizo, Isak leh Muivah te Naga khangthu ah mang nawnlou ding chi hi.

Numei khat amah leh amah kithat
Aizawl, July 14: Zan nitaklam dak 2:30 velding in Zothangpuii (30) w/o Lalthansanga of Saron Veng, Aizawl sisa in muhkhiak hi a, amah leh amah kithat hiding in muanmawh ahi chi uhi. Zothangpuii in tapa 2 nei a, a tapa naupang pen Jessie Lalremruata ahihleh kha 1 leh ni 6 lel in upa a, July 12 nitaklam dak 6 in Septicemia ziakin si a, zan in a tanau te han veh ding in va kuan uhi. A kiklam uh a inn uah Zothangpuii ana omlou a, amau leng mun tuamtuam a zon nung un a sa zuakna mun uah sisa in mukhia uhi. Amau nupa ahihleh sa zuak a kivak hi uhi. Sa tem a amah leh amah kithat hiding in muangmawh ua, Saron Veng hanmual ah tuni’n vui in om hi. Mi tamtak in a sihdan gim neih huai sa uhi.