(Medical & Scientific reason for not eating Pork)

By: Shyama Neihsial

Bible in sa thienglo ana gente lakah vawksa atel hi. (Leviticus 11-na ah akimui, chun, Isai 65:3, 4 leh 66:17 na ale akimui). ‘Sa thienglo ne kiu’ kiti hi science lam apat i-etlehle dikin akilang hi. Dr. Rex Russella, Baylor School of Medicine, Houston, Texas in hiti hin agên hi. “Bible-in vawksa nêk aphalloh ziek ahihleh, a thiengtho puoh bêka ahi. Vawkcha te’n amuh phawt uh aneu a, mihing êk leh amau êk nasan le ane chûlchûl u a, anêk tamtak luot ziek un agil un athainêl (digest) zopuou. A thaihnel zawhloh uh a tambêk ziekin ataksau’ ah a um den a, bacteria, virus leh hût kitihaw a tamsak chuom hi. Zieziek tak chun vawksa hi ahisêl puoi” ati.

Vawksa nêkzieka natna umthei chi chuomchuom:
Influenza : Vawkcha chuop ah influenza virus atam a, vawksa gawihnêl (sausages) kiti ah vawkchuop atel khai. Sausages, influenza virus umkhate mihingin a nêk tieng leh, chuop ah bu asep ngala, itaksa ahâtloh deuh tieng leh na ahun sêm pan u a, Vawksa inêk haw zieka Influenza vei kitamlawh ahih dan muhdawk ahi. Kidopi masa 1918 a America sepaih tamtak influenza vei zieka thi zungzung haw kha vawksa apat kikaisáwn ahih dan sût dawk ahi. Vawkchuop apat influenza kikaihsawntheih ahih ban ah, Turbercles (TB hik) le a umthei a, vawksa in mihingte TB aveisak thei hi atiu.

Hût chikhat Tapeworm: Vawksa apat hung umthei tapeworm kiti chu tizat-umtak ahi. Amal mal (segments) in aum thei u a, zie mal/ segment te chun amau ah hinna (complete sets of organ) anei chiet ui. Alawm/ chûn neuchacha itih haw chu atui/ ano ahung hiu hi. Tapeworm khat in tui/no maktaduoi khat vel piensak theihna anei a, atuihaw ahung keuh tieng leh baihlamtak in thisan gui leh taksabâk chuomchuom ah alut zungzung u a, mun chuomchuom ah atai zâk u a, mit nasan le adûk sak thei hi. Thuok leh zângguh (spinal cord) atun tieng vâng leh sukdam haksa tak ahi tai. Doctor khenkhat in sukdam theihloh ahi a tihiel ui.

Zie tapeworm hin thuoklam atuntieng uleh ummun akhuol u a, thilbâwk neucha Cyst kiti ahung um a, zie thilbâwk neucha haw chuh ahung lien hiei hiei a, thuok natna Neurocysticerosis atih uchu a um thei hi. Zie natna veikhate chun Kaih kiti anei ui. A kaih diekdiek sek u a, mahleh kaih, damdawiin a damthei puoi. Thuok ât (operation) ahihloh leh ahihbeihna ding umlo ahi. Chun, phungzâwl itihsek uhi kaih zieka pûksek khenkhat hi hût neihzieka um thei ahi. A ziek chuh, hût haw hi alawmlawmin thuoksungah a um khawm thei a, a thihlawh hiel le a um ui.

Los Angeles, USA a naupang kum 10 mi a thuoka hût (tapeworm) alût a, a changleh kaih chu apuong nasa sek hi. A chang leh ahat (breathe) ahung cháwl (stop) a, hatna khâwl (ventilator) nasan mangin damdawi in a kawihin a um hi. Times Union Albany, August 1997, New York, in agen dan chun, zie naupang hin a thilnêk haw apat hûttui anêkkhak, gilsungah achi hung pungin, athuok sung susie kha hi in akigen hi. Zie tapeworm itih haw hi vawksa laka atam diek ziekin vawksa a hût um haw chuh achuom deuh khel hi. Sa dang nêkna ale a um thei tho hi. Zieziekchun, sa kiti phawt phataka huonmin apawimawh taluo a, zieban achun, mihing êk akipat inle akaihsawn theih hi. Zunthak leh êkthak zawh chenga phataka sahbawn a khut silthien zingzing a pawimawh takzet hi.

Mithisa âttu Doctor thugen mak taluo: Damdawi in a nasemtu khat damdawi supply kawih dinga achieh leh, Doctor mi âtzo phet tawh a kituok u a, doctor kawmah, ‘Na mithi âtna lakah vawksaa hût a gensek haw khu na mu kha ngei hi? ti’n adawng hi. Doctor in, ‘Ka mu namah hi, tu tak khan le numei khat ka ât a, a thuok ah hût adim tavang hi, zie chu athihpih ahi’, ti’n a dâwng hi. ‘Ahihleh, death certificate ah athihna ziek leh na thilmuhteu na zik u leh?’ ti’n adawng kit a. Doctor chun nuikawmin, ‘Ziklo e, thuoka hût dim hiela thi hitawp mai chuh, a inkuonpihte a dingin na taluo deuh ding ahih ziekin, ‘Lungphu chawla Thi’ ti’n ka zik mai hi. Ziechula, lepchieh buhalawm ahi diek puo a, hût haw chun lungchang a ummun akhuol ziek u a thihna chanpha tungthei ahi ngala’ ti’n a dâwng hi.

Vawksa a hût chikhat, Trichinae in natna lauh um siemthei: Trichinae worm hût itih chu neucha ahi a, etletna /dulbin hâtpen a le muhdawk haksa tak ahi. Zie hût neihzieka natna neikha haw chu Trichinosis akiti. Zie natna hi natna dang Guhna leh typhoid fever (khawsikpi) kiti haw tawh hêtkhelh khak baihlam mahmah ahi. Khawsik sáng leh taksa pumnat, mit vung chieichuoi tih haw hi a um thei hi. Trichinosis hi vawksa minlo nêkna apat kai/ nei atam pen a, gamsa dang nêkna apat inle a um thei hi. Ziktu khenkhatin hût umna vawksa thikkhe khat chauh nêk ziek inle thihna tuok theih ahi atiu.

Trichinosis lauh umdan Doctor in genchien: Tuma lamin German gamah nungak kum 19 mi khawsikpi (typhoid) in athi a. Zie mithi âttu Dr. Zenker chun athihna ziek ahechien taktak thei puoi. Himahleh, nungak taksa (muscles) mun tamtak ah tibâwk Trichinae hûtlawm mun tamtakah amu dawk hi.

Zie nungak gilsunga chun hût piting tamtak a mu dawk a, Dr. Zenker in a thil muhdawkte chuh Zoologist Parasitologist thiemte adawt nungin, “zie nungak chuh khawsikpi veia thi ahi puoh a, Trichilonosis zieka thi ahi zawi” ahun ti dawk ngam hi. Zie nungak sunga hin hût piting tamtak a um a, ano haw chu taksa bâk chuomchuom ah avâkdalh sohsoh u a. A thihma thakhat vel chiehta khan vawksa apat kibawl sausage nê ahih dan autopsy alaknau ah hêtdawk ahi.

Hût lauh um mahmah Trichinae chanchin saulo taklang hitiu – Zie hût haw hi sa huon minloh leh sasiel inêknau apat inêkkhawm khak uh, gilsung ah thisan leh taksa haw sen (base) leh muongin, akivak/ akhawsa den ui. Zie hût haw hi a hung pien tung un inchi khat mun 50 a khen in alien u a, a saulam inchi khat mun 25 a khen mun 1 vel ahi. Awngthawl takin ahung khawsau a, ummun a khuol u a, ni 4/5 sungin chi suong theikhawp dingin ahung piting ui.

Vawksa a Hût umte’n natna lauh um Hydatid apiensak thei hi: Hût zieka umthei Hydatid atih uhi natna lauh umtak ahi kit hi. I gensa guolin vawksa a hût segments neuchacha haw amau khamkhamin hinna anei u a, aneuh takluot ziekun mit a muhtheih ahi puoi. I taksa’n zie hûttui (larvae) te chu a umkuola, zie chun tibâwk (cysts) neuchacha asiem a, hung khanglien zêl ahiu. Ummun asiemna mun taksabâk (organ) haw chun na asep ding bang semtheilo in a um ui. I taksa bâkzâmte laka pawimawh mahmah thin (liver) ah ummun asiem thei ui. I taksa’n hûttui haw atuom khum ziekin damdawi hâttak tenle that theilo ahiu. Zieban achun, zie tibâwk neuchacha igen háw ina hêtdawk vakloh ziekin, ihêt dawk takleh ât loh chu lampi dang um theilo ahi. At dawk nunga le damdawi hât taktaka ki-etkawl ngai nalai ahi. Mi 34 a etsin nau ah 22% te chun kum thum sungin tibáwk ahun vei thakkit ui tih muhdawk ahi. Zie natna hydatids kiti hi gancha dangten le neithei ahih ziekun iva khawihna khut haw phataka silthien zel ding ahi.

Vawksa ah Histamines leh Imidozole atih uh atam hi. Zie hi tithak leh hitáng phatheilo bawldawktu ahi. Vawksa nêkzawh tiengleh tithak leh tibâwk lien taktak a um sek hi. Vawksa ngeihloh (allergy) ziek ahi. Tithak zieka taksa ahung bawk dawk tiengleh, zie a bâwk haw chu hung lienin ahung vûng (inflame) thei ui. Guhkisuktuohna kal bang ahung vûnga, guhkal natna apieng thei hi. Zielochun, vun pawlam abâwk theih guolin, isunglam le a bâwk thei a, taksa bâk chuom chuom nasepna ahih buoi thei hi. Chun, vawkcha haw khawsak dan i-et leh khuom leh thingbul vêl ah atithak uh atat tat / nawt nawt ui. Histamines leh Imidozole, a sachung u a atam takluot ziek ahi.

Vawkcha thaudan ahihleh thaudan lauh-um chi (saturated fat) ahi. Chun, cholesterol phalo haw atam mahmah hi. Thau lauh-um Cholesterol in thinkha a suong (gall stone) a umsak thei hi. Zie thau haw chun thisan sang (High BP), lungchang natna leh lungphu chawlh haw a vei/ nei thei ui. Tulaia thingtangmite laka BP nei atam ten uhi Vawksa ahah nêk ziek uh hidinga ginchak ahi. Thau lam thil him him in Cancer chi chuom chuom atun thei hi tih Doctor muhdan ahi.

Vawksa hi taksa damtheihna ding tawh kisai gen ding atawm mahmah hi. Vawksa lakah natna chi chuom chuom 200 val a um hi ti’n akigen hi. Hiselna dinga ki-etkawl thientho chu Bible deihdan ahi. “Deihtak, na thagauin malsawmna amuh guolin, bangkima malsawmna na muh leh na damtheihna dingin ka paucham zel hi” tih 3 Johan 2 a muh in aum hi. Hinna pietu leh hihdamtu Pathien in a siemsate hiseltaka um dinga ei deih ziekin, itaksa a dinga hisello / thiengtholo himhim kawihchuomsa ana hi. (Thiempudante 2, Pawtdawkna 23: 25). Pathien in nekloh ding atih haw nêkloh chu ei a dinga thilpha pen ahi.
Zonun Wellness (94368 53358)