hey ganggam te idam2 nau moGospel Centenary – II
Posted by benj on March 16, 2010 , Print , Email , CommentS.Benjamin
(Gospel Centenary – I sim dingin zietak hih click ah)
Gospel Centenary tawh kisai a I tulai dinmun uh etthakna Thiemzilna chungchang ah ina nei tau a, tuhin bangtieng in nek-hawlna leh lungpuokdan ah lamdanna I nei tau em tih ana enkit hitiu. Pathien thu hung lutma leh ahung lutnung bangchan ahim chuh pi-le-pute khah khawsa-ul pawta thaguma nek-hawl, zingkhang apat zansawt taktak chana nasemte ana hiu hi. Kum khat nekkham a thodawk vang mahmah ui tih ding ahi. Nek ding le kitinglo chuh neih-le-lam (go), leh sum-le-pai tasam a khawsa ahiu tihna ahi. Zie haw ziek khan hiselna lam ale achau ua, mel-le-pang le mi ana bangzo puou hi. Khutih sa khan le a mamawh uh midang apat athawn a lak/muh khah thil zahchakum leh muolpho in ana ngai sek ui. Zie malak chun, amau sanga haksa zawte panpih theihdan ding ana hawl sek uh ahi. Lohtheihloh a midang panpihna alak khak uh a um chun a hengilh ngei puou a, bangtikni ahim a ditkit ding khah athiltup lakua khat ana hi zing seka, a chateu kawm nasan ah a thumawp malam bek sek uh ahi. A hatlopen leh khawsamawhpen inle mahni kitodelh khah ana tup ui tihna ahi. Zie umzie chuh mahni kizahna (dignity) ana nei hoih mahmah ui tihna le ahi. (Zie thu ahin I mizieu ahi nalai dem tih sim dingin zie hih click ah). Zie behlap chun Pathien thu hunglut nunga kisinsakna lultak kum 100 hiel ina chan uhaw chuh: khawvel leh a sunga um haw ngaihnat loh ding ahihzie, kumsawt daih a umlohzie, nek ding leh dawn ding nei a lungkim ding i hihzie, alamlopia hauhsakna mute awhchakloh ding ahihzie etc haw, eimau mai kisulungkimlo a neilahte leh zawngkhalzawte panpih ding i hihzie leh sum-le-pai, neih-le-lam chungchanga lunggel dan ding phazaw/hawihzaw leh Pathien deihdan hinkhuo haw hih ahi.
Zie haw khel ahin vangphatna, thiemzilna (education) ziek leh hun in ahun puokdawk dungzuiin lamchuomchuom a khantohna, nek-hawlna baihlamzaw le I chanbeh nalai ui. Sorkar nasem a khawsa-ul pawtlo a thalawh mu a nek-hawlna bang, sumkawlvei a ummun a nekmuhna bang, khutthiemna zatchuomchuom a chawl taluolo a nek-hawlna nei bang i tam tau hi. Zie behlap chun nek-hawl baihlamna khawl (machine) chi chuomchuom, etsakna’n puonkhuihna, puon gatna, pat phanna, buh hekna, thing thek/tanna, gari etc manga nek-hawl dan bangle i zildawk tau hi. Sum-le-pai muhna lemchang ziekin van matchak phazaw, tha-awlna leh kisuk-halhna dinga hun awng tamzaw, nek-limzaw muhna a hung pieng hi.
Achunga kigen haw cheng, Pi-le-pute lungpuokdan hoih takmai behlap a, kum 100 sung Pathien thu golul takmai i kisinsaknau leh khawsakdan changkangzaw dinmun I chanhawu apat a agahdawk muhtheih vantang haw chuh huoihamna – deihbehna, awhchakna, nawpchen guotna etc haw hih ahi die aw tih aman hiel ahi. Sepna nei haw hin anasep man dinga sorkar apat lawh alak khela vantang ahamphatpihte akipata sum muhbeh aneihloh leh sep guolo i hi tau hi. Sumkawlveite haw chula chawmkhatlo kala hauhsak zieng guo ngawn hileuhing kilawm. Lawiupatna dinmun tukha cheng leh mi vantang hile eimau lawkna ding bei a, midang phatchuompih ding semdawk i um ta puou hi. Siet tuokte – thihna tuok, mei kang tuok, kiel-le-chak tuok, haw chanding dawl zangna dawpna/panpihna sorkar apat a khuotdawksak thei haw hinle Percent bangzat ahim kinem kihivek tamai ei ve, mawle?
I gam khantohna ding deihna a khuo lamlien laihna ding, lo laia tui luonlutna dinga tuilam laihna ding, guoh zuk changa i In uhaw guohvat lohna dinga langva khuocheng chan ding a kihawm, zana athim lohna dinga meivak tunlohna muna mat ding solar lamp kihawm etc, etc haw bang i nekguk vek mai uhih ngaihtuoh tiem u, eimah a ding le eimah in nekguk mai chuh mak na sa puo? (Zie haw chungchang – Sum deih leh mamawh kikal - sim dingin zietak hih click ah). Zie haw ziek hile hitading ahi a, I lakah a sum muhna hetpihloh, kilawmlo tienga hausa le khawsathei (amassing wealth disproportionate to known source of income) i tam tau hi. A thu i hetdan uleh i hinkhuou a i zuihloh dan uhih “Sum hih suol tincheng bul ahi a, lungkhamna, kinakna leh buoina tincheng hun thuoksaktu ahihziekin, na sum neih cheng kei ei pienla, gitlohna leh buoina cheng apat in bitin” tinuom leuhing kilawm nasa puo?
Gospel centenary chuh lawp tak mah hinapi’n, Gospel hin I nek-hawlna leh lungpuokdan dikzaw leh thiengthozaw ei kawkmuh haw hih bangtiengin I zui zo um, Pathien thu ziekin mi bangzat in lepguk, piekguk, alamlopi a sumpung hawl, i namat khelloh ding khuotlut hamham guotna haw hih i haihsan tau em, ahihloh leh Pathien thu hunglutma sang ale kieniemzaw i hiu em, tih hawhih eimah chiet kikhuoltuokna huna mat phazaw lo ding ahim tih hih ka ngaihdan ahi.
