‘Sovereignty’ thu ah GoI leh NSCN IM kikang
NSCN IM Vice Chairman Khodao Yanthan si, ni 7 sunna neih hiding
New Delhi/Dimapur, March 2: National Socialist Council of Nagalim (Isak-Muivah) leh Government of India in tuni in New Delhi ah ‘Indo-Naga peace talks’ nei ua, huai hun ah Union Home Minister Mr P Chidambaram tel in Intelligence agency, military forces leh government top official tamtak tel uhi. Huai hun ah Nagate’n demand tuamtuam aneihte uh nouneltak a genkhawmna om a, ahihziak in, India thuneihkhum a omlou a mahni kivaihawmtuamna ‘Sovereignty’ a om ding chih NSCN IM in a phut tinten ziak un, kihouna dinkhawl tadih a, zingchiang March 3 2010 in sutzop hiding chih thu kiza hi. NSCN IM leh GoI in New Delhi ah peace talks aneih lai un Nagaland ah a Vice Chairman uh Khodao Yanthan in damlouhna ziak in sihsan a, NSCN IM in Nagalim sung ah ni 7 sung sunna neih hiding chih thupuan nei uhi.

NSCN IM in tuni in Prime Minister Dr Manmohan Singh leh Home Minister Chidambaram te akimuhpih zawhnung un, NSCN IM Gen Secy Th Muivah in Press te’ dotna adawnna ah, kihouna pe’n lamzangtak in pai a, NSCN IM in demand abawlte zukkik mawkmawk lou ding a, leitung a politics kipei NSCN IM in banpha saam ahihman in, India nuai ah NSCN IM kuun ngeilou ding chi hi. Tuaban ah, Centre government in palai dia a seh R.S Pandey tawh houlimna a tuam in neihlai hiding chi hi. Thiltungte tungtawn in NSCN IM leh GoI in Sovereignty chih kammal buaipih mahmah in, huai ah kikang lel chi’n media khenkhat in tunitak in report bawl uhi.

NSCN (IM) in ahihleh, Assam, Manipur leh Arunachal Pradesh banah eastern Myanmar ah Naga tamtak om a, Nagate’n a pu apa khang ua pan aluahna gamte uh kuaman suhsak theilou ding ua, Nagate’n midangte’ gam thagum in suhsaklou ding ua, mi’n leng Naga gam thagum a a opkhum sawmlouh ding uh ahi chi uhi. NSCN IM Steering Committee Convenor V S Atem in Delhi a thuthaksaite’ kiang ah “Naga gamteng Nagalim nuai ah om hi a, suahtakna chauh ahi a kiphatmawh uh” chi hi. Tutung a Indo-Naga talks pe’n India genlouh gam tuamtuam in leng bildawh mahmah uh hi’n kigen hi.
Hibangkalah, thudang khat kizadan in, NSCN (I-M) a Vice Chairman (Vice President) lenlel Khodao Yanthan zan nitaklam dak 5 in a tenna mun Wokha district (Nagaland) Lakhuti Village ah damlouhna ziak in si a, zingchiang (March 3, 2010) in zahna liantak tawh aluang vui hiding hi. A innkuante’ leh NSCN IM makaite’ gendan in, ‘Sir Khodao’ ahihleh kum 89 in upata a, zi neilou (tangval) hi a, kumlui apan in a taksa lam hatnawnlou in lupna ngak hita chi uhi.
Khodao ahihleh Naga helpawl masapen Naga National Council (NNC) a Ist batch hi a, 1950s in NNC ana zom in, A Z Phizo nuai ah galvan ana tawipan chi uhi. Nagalim apan helpawlte soisakna leh delhkhiakna hun atun lai in Naga Nampi maban ding khualna ziak in United Kingdom (England) tung a, huai apan in East Pakistan (Bangladesh) ah lut a, a dinmuh uh alauhthawnghuai ziak in England lutkik nawn uh chi uhi. Hun hongpaitou zel in Khodao in NNC ah Vice President tanpha hon letnung in 1994 kumbul in NSCN (I-M) zom a, Vice President/Vice Chairman post piakin om ngal chi uhi. Helpawl tuamtuam leh intelligence agency khenkhat in thah atup ziak in India zuankik ngam pahlou in, 2000 kum in England apan Nagalim lut a, mipi a sang asim in ana vaidawn uh chi uhi.
NSCN IM chief functionary Isak leh Muivah te’n Khodao sihthu azak utawh kiton in Delhi apan suunpih thu puang ua, Khadao ziakin Naga Nampi’n lam tuamtuam ah vualzawhna thupitak ngah a, aman lampi a gelsiam ziak in gam tamtak ah Naga heutute thawl a, a’ ma Nam itna pen tehpih ding omlou ahi chi uhi. Khodao in leitung anutsiat pen Naga Nampi adia manna liantak hi a, ama khekhap zuiding khangthakte’ adia chouna lianpi ahi chi uhi. NSCN IM Vice Chairman Khodao in sihna atuah tawh kiton in NSCN IM in tuni apan in ni 7 sung ama zahtak etsakna leh a nasep sate pahtawina dan in ‘His Excellency,’ the vice president, Khodao Yanthan zahtakna in Naga Nampi’n ni 7 sung suunthu apuang chi uhi. Hiai tungtang ah, NSCN (I-M) chief principal secretary, Samson Jajo in leng tuni in thusuah bawl a, ni 7 sung Nagalim ah kuaman nopbawlna himhim neilou ding in ngen a, revolutionary leader zahtak etsakna in Naga inhabitat area teng ah Naga Nam puan akimkhat a khai hiding chi hi.

Mizoram ah Hmingthantluanga sisa in muh in om
Aizawl, March 2: Tuni zinglam dak 5:15 am vel in Samtlang khawlutna bul ah Hmingthantluanga of Missionveng sisa in muhkhiakin om hi. Mi tamtak in tuni a agenna uah, Mizoram kichi India gamsung ading in galmuangpen banga chiamteh hi a, himahleh, tuni chiang in kithahna phualpi mah bangta in niteng in siluang top ding om zouhialta chi uhi.
Hmingthantluanga ahihleh, Pa Vala chi’n leng mi tamtak in thei ua, amah kum 45 vel a upa hi a, Lungleng lam zuan a tai Tripper gari a tuangte’n lampi siik ah mu ua, amah khupbawhsa in om a, ataksa mun 5 ah soisakna ma muhding om chi uhi. A Sleeper buh tawh ft 10 in kigamla a, sisan leng tamtak pawt chi uhi. Aman hun sawttak bus hekkha a, ahihziak in, cancer aveikhak ziak in nna sem zou nawn lawlou hi’n gen uhi.
Hmingthantluanga luang ahihleh kulikawn Police station duty leh Forensic Science Laboratory Staff te’n etchetna aneih nung un Posmortem bawlin om a, police in thil omdan suizui ngal in matkhiak bel neinailou uh hi’n kigen hi. Mizoram state sung ah hiamgamna uang deuhdeuh chi’n mi tamtak in patauhthu gen uhi.

(L) M. Thangtual Memorial Open Football :
Semi-final & final kimawlna om ding
Lamka, March 3: Bungmual khaw sat-tu (L) M. Thangtual Memorial Open Football Trophy-2010 Bungmual playground a neih a om semi-final, 3rd place leh final match kimawlna tukal in om ding hi. 1st semi-final kimawlna March 3, 2010 (Nilaini) nitaklam dak 2:30 in om ding a, hiai hun V. Chinzason, Mahajon, H. Thuamsanglian, Mahajon leh H. Khanpau, Mahajon te’n Chief Guest,. Functional President leh Guest of Honour hihna tawh uap ding uhi. Huai ah BAPS leh MYC kimawltuah ding uhi.
2nd semi-final March 4, 2010 (Ningani) in om nawn ding a, hiai hun in Letboi Valte, Chief of Zenhang Lamka, Thangkhosuanmung, Chief of Hiangtam Lamka leh H. Thuamkhanmang, Chief of Bungmual te’n Chief Guest, Functional President leh Guest of Honour hihna tawh uap ding uhi. Huai ah JFC leh MS te kimawl ding uhi.
Semi-final a vuallel tuakte’n March 5, 2010 (Sintawpni) in 3rd place kituhna nei ding uhi. Hiai hun in L.K. Mung, Contractor, H. Gouchinthang, Contractor leh Hlunminthang, Contractor te’ Chief Guest, Functional President leh Guest of Honour in pang ding uhi. Semi-final a vualzawhna tang club te’n March 6, 2010 in Final kimawlna nei ding uhi. Huai ah R. Sanga, Director, Angels’ Place, Siamnunlian Valte, President SSPP GHQ leh H. Mangchinkhup, Social Worker te Chief Guest, Functional President leh Guest of Honour in pang ding uhi.

Helpawl KRA cadre 3 man
Dimapur, March 2: Nagaland khawpi Dimapur kiim a om Dhobinala ah zanhal nitaklam dak 4 in Manipur helpawl Kuki Revolutionary Army (KRA) cadre 3 mat in om chih thu kiza hi. Police thusuak dan in, mat a omte KRA (U) member ahihdan uh kipuang chi ua, amau lak ah mi khat “highway commander” hi’n kigen chi uhi. Dimapur police ten a genbehna uah, KRA (U) te’n Manipuri driver khat Padumpukhri area apan pikawi in Dhobinala tunpih ua, Rs 5000 “yearly tax.” dan in ngen ua, thagum in Rs 3,000 suhsak uh chi uhi. Mat a om KRA (U) member kichite ahihleh, John Singh, James Singh leh Nao Metei hi’n gen uhi.

Financial adiviser lending
Lamka, March 2: Muanhuaitak apan thusuak kingahdanin, hun sawtkuamtak Shillong a North Eastern Council (NEC) a dinmun poimawhtak len Mr Kiamlou @ T.K. Hangzou, IDAS in Kolkata ah Controller of Accounts (Factories) ava letkhitnung in tu in Financial Adviser (Eastern Air Command), Shillong lending in transfer/posting order suak a, April 2010 apan in Financial Adviser (Joint Secretary level) hihna charge la ding chih thu kiza hi.

ZSP Singngat block khawmpi
Lamka, March 2: Zou Sangnaupang Pawlpi, Singngat Block in March 4, 2010 chiang in Singngat Community Hall ah 46th Annual Conference zang ding ua, chief guest in bialtu MLA T. Hangkhanpao pang ding hi. 30th Assam Rifles Commanding Officer Atul Kumar in guest of honour hina tawh program uap ding a, Zou Nam sung apan makai tamtak leng telding uh chih thu kiza hi.

EFCI makaihna in Gospel Centenary lawm ding
“Ani (date) in ka buai kei uh” – Rev. J. Huoplien Neitham
Lamka, March-2: Evangelical Free Church of India (EFCI) makaihna in Southwest Manipur a Pathian thu honglut kum 100 chin lopna Sielmat Christian Hr Sec School Campus ah March 4-7, 2010 sung om ding hi. Hiai ah Upa Lalhmingthang, Hmarkhawlien; Rev. L.L. Buongpui, Vice-President EFCI; Rev. Dr. H.K. Khawlkung, Secy.(retd.) EFCI; Rev. Dr. Ruolneikhum Pakhuongte, President Emeritus, EFCI; Dr. Paul Watkin Roberts, Canada leh Rev. J. Huoplien Neitham, President, EFCI te’n thugen ding uhi.
EFCI heutute’n Sielmat ah Press-te kimuhpih uh a, Pathian thu honglut nung kum 100 chinna thupitak a lawm ding in kisakhawl uh ahihdan gen uhi. Huai hun ah Watkin R. Roberts tapa Paul Roberts in Wales apan in Gospel Torch hon tawi in EFCI Moderator Dr. Rochunga Pudaite pekhe ding hi. EFCI President Rev. J. Huoplien Neitham in, ‘EFCI makaihna a Gospel Centenary lopna pen EFCI kia ahi kei a, mi tengteng ading ahi a, hiai tawh kisai Phase-I Senvon ah zat zawh hi a, tua Sielmat a pen Phase-II na ding hidan in gen hi. Aman EFCI Saptuamte a ni (date) in a buai kei a, a kum pen ahi ka lop uh, chi hi. Senvon hausa Kamkhawlun in Centenary hall lamna ding in a gam lianpi pia a, huai ah EFCI in Hall liantak leh Guest House banah Pastor Quarter ding lam a, Dec. 31, 2010 a Centenary lop hunkhakna Senvon mun a neih hiding chi’n gen hi.
Rosangzuala in a gendan in Gospel Centenary lop hun ah ‘Open Feast’ om ding a, huai ding in Sial (Mithun) 22 thah ding lem kisa chi’n gen hi. Tutan in Sial 5 hongtung a, adangte awl a hongtung lai ding hi’n gen hi. Centenary lopna a tel din Tripura, Aizawl, Sakawrdai, Delhi leh India gamsung mun tuamtuam akipan mi tamtak Lamka hongtung uhi. Akigendan in Imphal Airport ah Watkin Roberts tapa Paul Roberts hongtun chiang in 4-wheeler 600 vel in va dawn ding ua, 2-wheeler leng 200 tel ding hi.
Hiai Gospel Centenary lopna ding ah mihing 15,000 vel tat theihna ding hall liantak bawl hi a, flag leh balloon 100 tuak zang a chei hiding a, khawkim leh kianga om atel utte ading in a tuanna ding uh gari sawlkhiak hiding a, huaite a tuanman lak hilou ding hi. EFCI saptuam sung ah nam(tribe) tuamtuam 28 om a, district 16 a kithehdalh in milip 50,000 vel pha uhi. Amau Missionary field 170 nei in huaite field 8 a neihte uah sawlkhia uh a, a kumkhat budget uh ahihleh Rs. 17 crore tungpha chihthu om hi.

DC in free textbook hawmkhia
Lamka, March-2: Miss Jacintha Lazarus, IAS, DC/CCpur in tuni in Red Cross Road a SSPP Residential School ah Class VIII nuailam student-te kiang ah free textbook hawmkhia hi. Aman a genna ah SSPP Residential school a naupangte thawm ging a tenna inn apan zazel mahleh tuni’n naupangte ataktak a mu hi’n gen a, SSPP te’n fund ahuntak in mukei mahle uh school hoihtak a sunzom in student-te laibu kia hilouin uniform tanpha apiak uh kipahpih thu gen hi. School ading fund ahuntak a hongtun theihna din amah level a hihtheih omte ah panla ding hi’n gen a, Class VIII student topper bangzah hiam class IX azil chiang un sponsore ding hi’n gen hi. Tulel in SSPP Residential school ah student 500 om a, student-te ading free textbook a tunkim chiang in free textbook neivek ding uh a, uniform neikim nailoute leng tunung sawtlou in School Managing Board in ngaihtuahsak ding uhi.

Dr.P Nengzadou in Med Suptt hihna la
Lamka, March- 2: Dr Tualkhankham, Med Suptt, Dist Hospital in a sepna apan Feb 28,2010 in pension(retired) a, tuni nitaklam dak 4:00 vel in Dr P.Nengzadou,District TB Officer in Med Superintendent/Dist Hospital hihna charge la hi. Dr Paulginthang,Medical Officer/Saikot in District TB Officer hihna len ding chihthu om a, aman March 3,2010 velin charge la ding chihthu om hi.

Mission Compound gam kang
Lamka, March- 2: Tuni sunnung dak 1:00 vel ding in Mission Compound gam mei in kang a, khawsung a inn kang ding mipi’n vengbit man uh hi’n kigen hi. Thu kingahdan in Fire Brigade-te’n leng Pearsonmun tan delh man uh a, innkang ding mipi’n avenbit manziak un kiknawn uhi. Tulai in khua keu in huih hat mahmah a, lou hal leh niin hal te’n pilvan mahmah ngai a, innkang apan kivenbit theihna ding in kuapeuh pilvang chiat poimawh hi’n Fire Brigade apan thutut kingah hi.

DC in OPD hong dingin theisak
Lamka, March-2: JAC of AMTUC & AMGEO te’n 6th Pay Commission leh Jan 1, 2006 apan arrear piak dia phutna in nasemlou a kiphinna a neih uh kha khat(one month) valta a, Feb 24, 2010 apan in Dist Hospital OPD leng khaksak(closed) uhi. OPD kikhak ziak in damlou tamtak in haksatna tuak uh a, tuni’n CDSU te’n DC kiang ah lehkha pia in panla dingin ngen uhi. DC in CDSU makaite tonpih in tuni sun dak 12:30 in Dist Hospital a OPD enkhia uh a, Med Supdt tawh leng kimu uhi. DC in March 3, 2010 apan ageina bang a OPD hawnga nasem ding in Med Supdt theisak a, Doctor akailou leh nasemloute tung ah action lak hiding inleng theisak hi’n thusuak kingah hi.

Khengjang- New Lamka electric luttheilou
Lamka, March-2:132/11-KV Khengjang Power Sub-Station apan 33/11- KV New Lamka Sub-Station ah current lutna transmission a hoihlouh ziak in 33/11- KV New Lamka Sub Station ah electric current lut theilou a, Singngat khua tan leng electric current omlou hi’n Electricity Deptt/ CCpur Division apan thusuak kingah hi.

Fare khandan tamlua sakthu puang
Lamka, March-2: KSO/Ccpur, GSO/Ccpur leh NCYCF in Joint Press Statement suah uh a, huai ah Jeep/Taxi Owners pawl leh Town Bus Owners Assn pawlin ngamkhat thu in Gari tuanman 50% a a khansak uh puaknat thu leng lungkimhuailou sakthu puang uhi. Student-te leh mi gentheizawdeuhte khualna ziakin Gari neipawlin a thupukna uh enthak dingin ngen uh a,fare(gari tuanman) khang tamlua ziaka thiltung a om leh KSO/Ccpur, GSO/Ccpur leh NCYCF in mawh pawlou ding hi’n taklang uhi. Gari neite’n kuamah kithuzakpihlou a bhara a khansak uh thilhoih hilou a taklang kawmin bhara a khan ding leleng student-te adin Rs. 3 hihenla, mipi vantang adin Rs. 6 hileh chih ngaihdan leng taklang uhi.

DC/CCpur in New Delhi pha ding
Lamka, March- 2: India govt nuaia Home Ministry saina in March 4, 2010 in News Delhi ah India gamsung a DC teng in Census Conference neiding uhi. Huai conference atel ding in Miss Jacintha Lazarus,IAS, DC/CCpur in March 3, 2010 in Lamka akipan New Delhi ah zinding a, a programme dan in March 5, 2010 velin hong tungkik ding hi.

CBSE exam kipan ding
Lamka, March- 2: Central Board of Secondary Education saina in JNV, Tuinom ah March 3-April 1, 2010 sung All India Senior Secondary Certificate Examination -2010(class XII examna ) om ding hi. Huailouin March 5-31,2010 sung All India Senior Secondary Examination (Class X examna) om ding a, exam om hunsung teng Police te JNV/Tuinom ah duty om gige ding uhi.

DLCC meeting omding
DC/CCpur makaihna in March 8, 2010 zinglam dak 11.00 in DC office a BRGF Hall ah Dist Level Co-ordination Committee(DLCC) meeting om ding a, huai ah SDO/ BDO leh Dist Level Officer teng telding in Ms Chawngpui, Branch Officer/ DC office in theisak hi.

DI gari apan kia in liam
Radha (48) w/o Ibotombi of Tronglaobi tuni zinglam dak 8:00 vel in New Bazar ah DI gari apan meh zuakding lakhe deklai kia in alu tatkha a, a awm (chest) taklam leng nasa in Dist Hospital ah admit in om hi.

Behiang ah Eye Dection Camp
Behiang PHC ah March 4, 2010 in ‘Cataract Eye Dection Camp’ kichi omding a, huai ah ASHA member-te ban ah Link Workers-te telding uhi. Huai atel ding in Imphal apan medical team hongkuan ding uh hi’n leng kigen hi.

Audio Cassete honna om ding
Synod Hall, IB road ah March 3,2010 zinglam dak 11.00 in Audio cassette thak “Activa Lanu” kichi honna om ding a, huaiah Paolal Haokip,Social Worker khuallian a pang in hong ding chihthu om hi.

Malaria positive 10 mukhia
District Malaria Deptt. te’n February 2010 khasung in damlou mi 1721 sisan test uh a, huailak ah mi 10 in Malaria natna hikpai hi’n mukhia uh a, huaite PF 8 leh PV 2 hi’n thusuak kingah hi.

Combined team leh helpawl kikap
Imphal, March-2: Thoubal district a Maryland ah helpawl om uh chihthu zak ziakin tuni zingsang dak 5.00 velin Thoubal Police Commando leh 15-Assam Rifles kigawm combined security team in huaimun delh uh a, zingsang dak 7.30 vel akipan in combined teamte leh helpawl kikap pan uh a, thautang leng in civilian khat kapkha in Police te’n Thoubal District Hospital tun uhi. Kikapna mun ah Security force tamtak lut behlap a, nitak nungin leng avangkim in thauging kiza chihthu om hi.

Electoral Roll et-theih ding in om
Imphal, March-2: Tamei, Paomata leh Purul Sub-division huamsung a District Council constituency leh Assembly Constituency tuamtuam a Electoral Roll zawhsiang hidan in huai Sub-division 3 a ERO chiat in thusuah bawl uh a,a en nuamte adingin office kai hunsung in et-theih ding chihthu om hi. Electoral Roll apan min paihkhiak ding hiam behlap ngai ahihkei aleh bawldik ngai a om leh akisaipih form zangin March 17,2010 tan hithei ding chih thusuak om hi.

Combined security te’n helte 1 kaplum
Imphal, March-2: Thoubal district sung Kakching PS a Wabagai Hiranmei ah tuni zingsang dak 8.00 velin Thoubal Police Commando leh 21-Assam Rifles kigawm combined teamte leh helpawl kikap uh a, combined security team in helte laka khat kaplum uh a, a taksa tung akipan in 9mm pistol 1, Chinese Hand grenade 1, 136-hand grenade 1 leh thautang 4 mukhia uh a, misi kuahiam chih suichet ding in RIMS ah misi koihna ah puaktung hi’n kigen hi.

Inn varandah a bomb 1 kimukhia
Imphal, March-2: Thoubal Yairipok Ningthouna Leikai a inn khat ah tuni zingsang dak 7.30 velin innkong a varandah ah polythene bag sungah hand grenade khat kikoih muhkhiak hi a, Police a bomb squad teamin lakhia in hihsia uhi. Huailou thudang kizadan in Imphal West Police te’n Pathianni(Feb 28,2010)nitak dak 11.00 velin Thangmeiband College gate kiang apan Prepak cadre 1 mankhia uh chihthu om hi. Sr Supdt of Police/Imphal West in thusuah a bawldan in huai Prepak cadre pen police in tuma in 3vei a matkhiaksa hi a,tutung in amah akipan in 9mm pistol 1, agazine 1 leh atang 2 kimukhia chi’n taklang hi.

Transfer/posting
(IPS/MPS(grade-II) officers)

1. Kamei Angam Romanus,IPS, Dy SP(Ops),Imphal East as Dy SP(Cdo),Imphal East.
(Newly promoted from Inspectors)
2. NL Kongam Anal,MPS as Asst Commandant,8-M/R.
3. Swelling Hope Chiru,MPS as Asst Commandant,6-IRB.
4. G. Jenkhansuan Paite,MPS as Asst Commandant,1-IRB.
5. H. John Lokho,MPS as Asst Commandant,5-M/R.
6. Ch. Adani Mao,MPS as Asst Commandant,5-M/R.
7. S.Y. Lumason Tangkhul,MPS as SDPO/Phungyar.
8. A. Willabon,MPS as Dy SP(CAR),Ukhrul.
9. Paozalam Kipgen,MPS as Dy SP(Vigilance).
10.PS Daiho Mao,MPS as Dy SP(CAR),Senapati.
11.Moon Tangkhul,MPS as Asst Commandant,6-M/R.
12.G. Ngaihte,MPS as Asst Commandant,4-IRB.
13. H. Lianchinthang,MPS as Asst Commandant,7-M/R.