Police te’n mi phukha gari mankhia
Lamka, Feb-25: Shimaran(6) d/o Ibobi Singh of Kakching Khullen Makha Leikai tulel a Khumujamba Meitei Leikai a om zan nitaklam dak 5:30 vel in SBI kong Tedim Road ah anu tawh lampi kan(crossing) lai Taxi Jeep(No. MN 05A-1114) in phukha a, Dist Hospital ah admit nung in doctor te’n zan nitak mahin RIMS ah refer uhi. Police te’n a phukha taxi jeep mankhia in Police Station ah koih uh a, FIR No.11(02) 2010 CCP-PS U/S 279/338 IPC register uhi. Police thusuak dan in taxi jeep neitu leh driver Thangvung David Vaiphei (45) s/o (late) Henkhothang of Torbung hi’n gen uhi.

PMEGP beneficiary result suak
Lamka, Feb-25: District PMEGP Task force saina in 2009-2010 adia PMEGP ngah ding telkhiakna dia interview om a result zan in suak a, SBI/CCpur tungtawn in implementing agency DIC apan huhna ngahdingte Sl no M-238, M- 132, M- 331, M- 724, S-172, S-43, S-238, M- 50, M-786, M-393, M- 465, M- 567, M- 466, M- 684, M- 420, S- 146, S-01, S-29, S- 68, S-184, S-71, S-201, S-218, M-121, M-477, M-25, S-93, M-28, M-33 leh KVIC apan huhna ngahding in S-199 telkhiak hi uhi.
Huailouin UBI/CCpur apan implementing agency KVIB apan huhna ngah dingte M- 306, M-415, M-605, M-623, M- 203, M-129, M- 782, S- 206, S-33, M-434, M- 677, M-594, M- 695 leh S-03 hi uhi. SBI/Loktak apan implementing agency KVIC akipan huhna ngahdingte, M-35, M-795, M-614, M- 295, M-737, M-756, M-532, M-490, M-06, M-94, M-821, M- 586, M-682 leh M-95 hi uhi.

Handloom Cluster & Awareness hun khak
Lamka, Feb-25: Dist Industry Centre(DIC) saina leh Ministry of Textiles, India panpihna in YPA Hall, Hiangtam Lamka a “Handloom Cluster and Awareness Campaign –cum- Exhibition” om tuni in hunkhakna function om a, G.Thangkhosuanmung, Chief of Hiangtam Lamka in huai hun va-uap in khakna nei hi. Aman a thugenna ah Self Help Group(SHG) te pahtakthu genkawm in amau mahni khe ading zou in na tamtak semkhia uh ahihdan gen hi.

Lamlian laia Gari park om sek
Lamka, Feb-25: Lamka khua ah khatengin Gari thak kibehlap a, khawpi sung tawnkha lamlian lunpen Tedim Road tanpha Gari a tam ziakin a khenchiangin lamlian neulua hileh kilawm khop in Gari tam hi. Himahleh Gari driver khenkhat in lamlian laia khawlsak(Gari parking) ching uh a, huchibang parking dikloute ziakin Gari khenkhat leh khe a paite adin accident mulkimhuai tungthei ding khopa lauhuai hun om sek hi. Tuni zinglam dak 9.00 velin leng Tedim Road(New Bazar area) ah Town Bus khat lamlian laiah khawl mawk a, huaiin mi tamtak adingin nawngkaina tun hi’n kigen hi.

Doctor-te’ telna ding training
Lamka, Feb-25: CMO Conference Hall ah Feb 27, 2010 in doctor-te’ adingin “Cataract Detection and Referral & Blindness control Strategies” chih training om ding a, Dr.S.Hauzel, CMO in hongkhe ding hi. Huai ah Dr.Rajen Singh, Eye Specialist leh Dr VC Pau, DACO te’n thupi tuamtuam pansan in sinsak ding uhi.Huailouin Feb 26,2010 in Leijangphai khua ah “Eye Camp” om ding a, huai ah Eye Cateract Detection techiniques ban ah mit kepbit dingdan sinsakna om ding a, huai adingin Dr V.C Pau makaih in Medical team kuan ding uhi. March 4, 2010 zinglam dak 11 in Behiang khua ah huchibang camp om ding hi.

Electric meivak ginalou deuhdeuh
Lamka, Feb-25: Manipur adia khawpi 2na hi a minlawh a om Lamka khua ah kum tamkuamtak paisa akipan in electric meivak deih bangzoulouin ni 1 halzel in Load-shedding om a, tuni chiangin electric meivak in hoihlawm nawtsang mahin ginalou deuhdeuh a, loadshedding ni a meivak hunsung sawtlou kia hilouin mei vakni dingte tanpha ah meivak pailouh hunsung sawt semsem a, electric a kingah leh power zanga nasemte adin nawngkai deuhdeuh hi. Electric meivak in ginatlouhlam a nawt sangin hoihzawklam nawt leh chih tamtakin duhthusam gen uhi.

BLO-te adin training om ding
Lamka, Feb-25: DC office a BRGF Resource Centre ah Feb 26, 2010 zinglam dak 11 apan in Booth Level Officers mi 246 te’n Summary Revision of Photo Electoral Rolls 2010 tawh kisai “Pre-Revision Activities” training om ding a, SDO te’n sinsak ding uhi.

Lamlian hoihzawdeuh thei leh
Lamka, Feb-25: Tuma deuh akipan in khawpi sunga IB Road, Red Cross Road, Mission Road,Centre Road leh vengsung kikawmna lamlian tuamtuam contrctor te’n bawl uh a, tu’n mun tamzaw ah block-topping leng kizousiang in leivui khu vengvung leng azia omta hi. Himahleh lamlian kibawl pen sahzoulou in panlua a, tuktui luan taktak hun(monsoon session) hong kipan leh lamlian kinbawl thakna mun khenkhat sawt hoihzoulou in a siatpah khak ding patauh huai sakthu khenkhat in gen uhi.

“1-Day Free Health Camp” om ding
Lamka, Feb-25: Zou Youth Organisation, Gen HQ leh Students’ Union, RIMS saina in Feb 26, 2010 in Tuaitengphai khua ah ‘One Day Free Health Camp’ om ding a, damlouhna tuamtuam neite ki-ensak thei ding uhi. Huai ah Imphal apan in specialist doctor hunkhopin damlou en ding uh a, damdoi leng manbei in hawmding uhi. Damlou en ding in Medicine, Surgery, Paediatrics(naupang lam), Obstretics and Gynaecology (numei lam), Orthopaedics (guh lam), Dermatology, Eye leh ENT banah Psychiatric lam specialist(doctor) hongkuan ding uh chihthu om hi.

Auto Bahara khanglou ding
Lamka, Feb 25: Muanhuaitak apan thusuak kingahdan in, newspaper khenkhat ah tulai in “Joint Satement & public notice” chih thusuak om in, town bus, jeep leh diesel auto tuanman (fare/bahara) March 1 2010 apan khangding chi mah le uh Bungmual-Dorcas road- Central road tawn a tai diesel auto service te’n mipite khualna ziakin bahara/fare khangsaklou ding uh chih thu kiza hi.

Vety Director pimang in om
Imphal, Feb 25: United Kuki Liberation Army (Military Council) pawldia gintak te’n Manipur’ Vety & Animal Husbandry Director Dr Thyambaiyam Jiban of Keishamthong Irom Pukhri Mapal apaisa Feb 22 2010 in pimang uh chih thu kiza hi. Thusuak kingahdan in, Jiban ahihleh, office kai khin innlam zuan apailai UKLA (MC) dia gintakten apimang uh hidanin gen ua, damtak a khah ahihna ding in Rs 1 crore demand uh chi uhi. Tuni in Vety& Animal Husbandary deptt a commissioner I S Raishram IAS in ngetna bawl in, kintak a Thyambaiyam Jiban khahkhe ding in ngen hi.

Dr. Khaizalian training in kuan ding
Imphal, Jan.-25 : Dr. Khaizalian, IFS, Chief Conservator of Forest ni 2 sung training in Dehradun ah kuan ding hi. Feb. 28 & 29 sung ‘Training Workshop on Survey & Demarcation of Forest Boundaries using Geomatic’ chih thupi a nei in Dehradun a Forest Survey of India training om ding a, hiai hun ah IFS top official tamtak telding uh chih thu kiza hi,

Bomb khat mukhia
Imphal, Jan.-25: Manipur DGP Y. Joykumar tenna inn Naoremthong Yumnam Leirak a dukan khat ah tuni zingkal dak 6:00 vel in bomb khat muhkhiakin om hi. Hiai tawh kisai in amau leng police ah report ngal ua, police bomb siamte’n vala khia uh chihthu kiza hi. Bomb ahihleh Joykumar pianna nu’n va mukhia chih thu kiza hi.

Bomb puak ah IW Commando 2 liam
Imphal, Jan-25: Minuthong a Khuman Lampak lutna kianga lampi gei a AR transit camp fencing bul ah tunitak dak 7:25 vel in bomb khat lei a kiphum puakzak a, kintak in Imphal West police Commando-te’n delh ngal ua, bomb puahna muntak a zonglai un a kiang uah khat puakzak nawn hi. Hiai hun in Imphal West Police Commando a tel mi 2, Longjam Samarjit (33) s/o (L) Ngoubi of Haobam Marak Keisham Leikai leh H. Binoy (28) of Oinampok hi ua, kintak a RIMS a puaklut in om uhi. Liamna tuak tegel ahihleh a khe, khut leh mai lak bomb hal neng in dengkha a, a gimselua omlou chih thu kiza hi. Hiai tawh kisai in KCP (MC) Lanheiba Group-te amau thilhih hidan in kipuang uhi. Tua tawh kiton in Leimakhong a army gate No. 2 kianga Scooter khat a leng bomb om ahihdan taklang ua, ahihziakin, hiai thugelh ahihtan in a puah lam kitheilou hi.

KYKL (MDF) khat mankhia
Imphal, Jan.-25: Thoubal Commando te’n Jan. 23, 2010 ni a Wangjing Heitupokpi lak a helpawl vakvel om chihthu a zak uh tawh kiton in frisking checking bawl ua, nitak dak 7:30 lak in KYKL (MDF) a tel Self-Style Amarjit @ Debo @ Nongsaba (25) s/o (L) S. Maimu of Wangjing Khodomba Pukhri Achouba Maning Leikai mankhia uhi.

Manipur Gun Agency mei in kang
Imphal, Jan.-25: Thangal bazaar a Axis Bank kianga om Manipur Gun Agency dukan tunitak dak 8:15 vel ding in koi a pan hiam chih theihlouh mei in kang a, Fire Brigade te’n kintak a a delhman ziak un kangse law manlou hidan in kigen hi.

Yaoshang sungin leng nasem ding
Imphal, Feb-25: DC/Imphal East office a Permit Branch a staff te’n Yaoshang/Holi festival sungin leng permit ngente adia issue theidingin nasem ding uh a, Thabal Chongba/Yaoshang Sports/Loudspeaker leh adangdang adia permit ngen nuamte’n Yaoshang sungin leng zingsang dak 10.00 akipan sun dak 12.00 tan in nget theih zel ding chihthu om hi.

Imphal West Police te’n panla ding
Imphal, Feb-25: Yaoshang/Holi festival sungin Gari accident leh nawngkaina om khak ding venna in Imphal West District Police te’n Special Drive bawl ding uh a, Motor Vehicles Act,1988 bawhsia a gamtangte tungah khauhtak in nasem ding uh chih thusuak om hi. Huai dungzui in driving license tellou a Gari hek hiam kum chinglou naupang gari hek matkhiak a om leh kha 3 sung jail a koih hiam Rs. 500 liausak hiding uh a, insurance certificate tellou a gari hek hiam kum chinglou naupang in a hek gari neitu kha 3 sung Jail a khum hiam Rs. 1000 liausak hiding uhi. Registration certificate tellou a Gari hek a om leh Rs. 2000 apan Rs. 5000 tan liausak hiding uh a, zukham kawma gari hek matkhiak a om leh kha 6 sung Jail a khum hiam Rs. 2000 liausak hiding uhi. 2-wheeler a mi 3 kipua hiam, over load a mi tuanna Car/Gypsy/Maruti Vasn leh Bus ahihkeileh Registration number tellou himhim Rs. 300 liausak hiding uh a, speed khengval a taite Rs. 400 akipan Rs. 1000 tan liausak theih hiding hi. Huailouin gari hek kawma mobile phone zangte kha 6 sung jail a khum ahihkei aleh Rs. 400 liausak hiding uh chihthu leng om hi.

Governor leh saptuam makaite kimu
Aizawl, Feb 25: Mizoram Governor Lt. Gen (Rtd.) MM Lakhera, PVSM, AVSM, VSM in tuni in Mizoram state sung a saptuam tuamtuam makaite kimuhpih in, thu tuamtuam houlimpih hi. Governor in ahihleh, state government in genthei-tagahte khualna ziak in NLUP paipih tou zel a, hiai tungtang ah gendan chi tuamtuam om mah leh, state government in mi zawng leh gentheite dopkangna dia a hih ahihman in saptuam makaite’ kithuahpihna poimawh petmah ahi chi hi. Mizoram ah lou nasemte kuhkal leh thanuam mahmah hi ua, amaute dopsangna ding in scheme tuamtuam om lai ding a, NLUP kichi a kipanpan ahihman in kuapeuh in kithuahpih poimawh petmah chi hi.

NEWS IN PICTURE:

Huih in waiting shed mutsia
Chief Medical Officer kong a CCpur Govt H/S nung zek a Backward Region Grand Fund (BRGF) 2007-2008 a kibawl waiting shed tuni sunnung dak 2 vel in huih in mutsia a, akhuam te leng kipuk in atung langva te ahihleh kelou in a lom atang in leilak ah kinga suk vek hi.