Camp Salem ah KNO Raising Day lawm uh
Lamka, Feb 24: Kuki National Organisation (KNO) kiphuh khiaknung kum 23 chinna tuni zinglam dak 11 apan in Camp Salem ah “Celebration of Unity” chih thupi zang in program nei uhi. Zomi Council Chairman N.Songchinkhup in Chief Guest hihna tawh uap in KNO flag kaipalh a, Functional President in D. Joseph Hmar, Vice President Hmar Inpui, GHQ pang a, Guest of Honour in Kamkholal Vaiphei, President VPC, M.Ginsuanhau, President UZO GHQ leh Khaipao Haokip, President KIC pang uhi.

Kuki Army te’n KNO flag zahna pia in salpha sisa te suunna nei ua, Motilal Anal in PS Haokip, President KNO Message simkhiakna nei hi. Huai hun ah UPF apan makai tuamtuam, hausa, Organistion tuamtuam apan makaite, Student makaite ban ah mipi tamtak in uap uhi. Kom cultural troupe; Hmar cultural troupe leh Zou cultural troupe Nam laam lahna nei ua, lasiam tuamtuam in laa sa uhi.

Zomi Council Chairman in agenna ah Manipur a Non-Naga te Manipur ading in fencing mahbang in om a, daai (fencing) bang a pangmai lou a, Gam ineih theih nang un kithutuahna, pankhawmna poimawh hi’n gen hi. Mahni nambing pau(language) i itluat ziak un kithuahna taktak omthei lou leh hon kainiam tu ahi chi hi. Mahni kitoudelh, mahni khe adin sawm in kuapeuh pangkhawm chiat ding in Songchinkhup in ngen hi. Aman agenbehna ah Bristish te honsapna leh chihna te tunitan theisuah nailou a omlai ihihdan uh gen a, chikni chiang hiam a ihihna diktak uh theihsuah apoimawh dan leng gen a, mi khat sa khat leh phung khat ihi uh chi hi.
Functional President D.Joseph Hmar in agenna ah I gam-leh nam ading asem, mimal pawlpi leh thautawi te’n Gam ineih nang ua kituaktak leh gin omtak a sepkhawm poimawh hi’n gen a, midang kuamah omtuam lou mi khat leh Zo suan te ihihdan uh gen hi. Guest of Honour Kamkholal in agenna ah Chin-Kuki-Mizo-Zomi-Hmar kichi te kikhen theilou, mi khat sa khat, inn kuan khat ahihdan gen a, Nam bawl nang in huai inn sung khat a omkhawm vek aloutheilou hi’n gen hi. Nam sepaih te’n mipite Nu-le-Pa chih theih a zahtakding, mite etton a om ding, mahni sang a upa zawte zahtak ding, discipline hoihtak a omding, zu-le-sa, khamtheih a kibuallouh ding in ngen hi. Zalengam diktak iphuhkhiat nang un mi khat, sa khat, sisan kizawm leh inn kuan khat ihihlam uh manggilhlouh adeihthu gen hi.
Ginsuanhau in agenna ah I nam, I gam sung uah UPF leh KNO makaite munkhat ah a tutkhawm theih uh kipahpih leh mipi’n ngak lah mahmah ahihdan gen a, UPF leh KNO makaite’n kituaktak a nna ahonsep khawm uh mipi’n ngak lah mahmah hi’n gen hi. Nam sepaihte’n zu mawk dawndawn louh ding, mi mawk a vuaklouh a thudik kanchian a thudik leh thutak a vaihawm adeihthu gen hi.Akua akua pau kitheihtuah, mi khat sa khat, suangtu kibang ihihman un pankhawm hatna chih manggilh louh a kuapeuh pangkhawm diamdiam ding in ngetna nei hi. Khaipao Haokip in agenna ah KNO Raising hun ah nam tuamtuam, UPF makai te ban ah student makai tamtak paikhawm a, Naga hilou singtangmi te ading in kithuahkhawmna akipatna hileh adeihthu gen a, makai tuamtuam kithuah khawm chiang in kituahna, ki-it semna leh pankhawmna tun hi’n gen hi. Mipite lungmuang leh khamuang tak a omtheih nang in UPF leh KNO makaite’n kituaktak a nna semkhawm ding in ngetna nei a, mipi’n leng kithuahpih poimawh hi’n gen hi.

Khuga Dam tui New Lamka ah luang!
Lamka, Feb 24: Kum 30 val vingveng bawl ahihnung a zawhsiang theihlouh a om Khuga Dam apan tui khahkhiak tuni in New Lamka a Go Chin Khup veng’ CYA road lutna bul ah tuilawng kiphum apan in Khuga Dam tui luangkhia hi. A kigendan in hiai tuni a tui luang khiakna/pawtna mun tan pipe kiphum a, huai ban kiphum nawnlou hi. Tulai a tui haksat ziakin rickshaw-pu leh kim leh kianga te’n pha ze sa in tawi nainai uhi.
Khuga Dam tui hiai mun ah aluankhiakna 3 vei hita a, tuma inleng gintaklouhpi in luangkhe mawk a, huai hun in nin petmah in nin lom lak ngen luangkhia chi uhi. Huai nung kalmasa kiginni lak inleng luangkhe nawn a, hiai in bel tam lawlou chi uhi. Tuni in ahihleh a pipe dimphial in luangkhia a, lampi gei a nullah lak ah luanglut hi. A gei a omte gendan in, tui a luangkhiak masakna pen ahihleh a lampi khanglam a pipe kikhun pen inn bawlte’n a hihtan khak ziak un hiai lam ah tui hong pawtkhia a, himahleh, kintak in a department-te zaksak in om ua, amau leng a tui luangkhe pen kham kawl ngal uhi. Tuni a tui luangkhe pen bel siang mahmah a, nin neng muh ding leng omlou a, tui haksat ziakin mi tamtak in hiai tui tawi uh hidanin kigen hi.

Mrs Nempi in Nursing Suptd len ding
Lamka,Feb-24: Mrs Kh. Bimola Devi, Nursing Superintendent, Medical Directorate, Manipur a sepna akipan January 31,2010 in retired a, Mrs Vungzanem Valte @ Nempi, Deputy Nursing Superintendent, Medical Directorate,Manipur in Nursing Superintendent hihna len dingin Govt in tunai chin in order suah hi. Aman Nursing Superintendent banah Registrar, Manipur Nursing Council hihna tawh leng lenkhawm ding hi’n govt in order suah hi. Mrs Vungzanem Valte in kum 1980 in CMC Hospital, Vellore ah B.Sc(Nursing) zou a, kum 1981 in School of Nursing & ANM,Imphal ah Sister Tutor sepna mu a, 1992 in School of Nursing & ANM,Imphal ah Principal in kaisang hi. Kum 2002 in Deputy Nursing Supdt a kaisang in Medical Directorate ah sem hi.

BSF te’n thaukap ding
Lamka, Feb 24: STC BSF CCpur apan thusuak kingahdan in, zingsang baihtak akipan nitak zan sawt tanpha long/short/grenade leh 51-mm mortar kap nawnding ua, huai ziak in Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah husa om ding ahihziak in March 1-15, 2010 sung a kimnai a khua omte apan kuamah va pailou ding leh ganvulh leng khahdan zoulou ding in DIG/Commandant, STC/BSF in tuni’n mipite ngen hi.

JAC te’n OPD khak
Lamka, Feb 24: JAC of AMTUC & AMGEO te’n 6 th Pay Commission leh Jan 1, 2006 apan arrear phutna in strike aneih uh ni 40 val bang phata a, nuakna khauhsak sem uhi. Tuni apan in JN Hospital tel in District teng a Hospital omteng a OPD khak sak uh a, CCpur Dist Hospital OPD leng kikhak in casualty ahihleh angeina bang in kihonglai hi.

Blood donation camp omding
Lamka, Feb 24: Medical Suptd Dist Hospital saina in tuni zinglam dak 10 apan Dist Hospital a Blood Bank ah “Voluntary Blood Donation Camp” om hi. Huai ah phatuam ngai 30th Assam Rifles apan mi 4 leh 46th Assam Rifles apan mi 10 te’n sisan unit khat chiat thoh uhi.

Acident ziak in mi 3 liam
Lamka, Feb 24: Pauzaching (19) d/o Tuanzamuan of Mualtam zannitak dak 6 vel in tuisa singpibel a domlai kipukpih in a awmsuk tuisa in ki buakkha a, Dist Hospital ah admit in om hi. Letzahau (45) h/o Hatneitling of Kangvai tuni nitaklam dak 4:30 vel in S.Kotlian ah scooter in accident a, amai liam in Dist Hospital ah admit in om hi. Shimaran (6) d/o Ibobi Singh of Khumujamba Meitei Leikai tuni nitak dak 5:30 vel in SBI mai ah anu tawh lampi kaan (crossing) lai passenger Jeep (MN 05 A/1114) in phukha a, a awm (chest) lak nasa in Dist Hospital tut himahleh Imphal ah puak in om hi. Accident na mun ah Shimaran apan sisan pawtkhia bangmah muh in omlou hi.

17 Assam Rifles te’n Myanmar mi 2 man
Imphal, Feb-24 : 17th Assam Rifles te’n tuni zingkal dak 7:00 vel a Rajai area lak operation a bawlna uah Myanmarese National mi 2 mankhia uhi. Mat a omte bel Khongo (24) s/o Ahou leh Ngaphaw (30) s/o Zelang of Sumra hi ua, amau apat in puak thei (explosive) bawlna ding van tuamtuam 130kg vel mukhia uh chihthu kiza hi.

18th AR te’n Poppy chiinna tamtak susia
Imphal, Feb-24 : 8th Assam Rifles leh State Narcotics & Affairs of Border department kithuah te’n Feb. 14-22 sung in Indo-Myanmar gamgi lak a Poppy chinna tamtak hihsia uh hidan in kigen hi. A kigendan in CCpur district a Khaikual leh Houpi area leh Chandel district sung Chakpikarong Sub-Division a Khongpal, Chahjol leh Thingbajao munte tel in a kigawm in hectares 235 vel ding a lian Poppy chinna hihsia uhi. Hiai a hihsiatte uh a sum a tuat in Rs. 5, 12, 00, 000 vel man zou ding hidan inleng Narcotic department te’n taklang uhi.

National Integration Camp om
Imphal, Feb-24 : 175th Raising Day of Assam Rifles tawh kiton in 17th Assam Rifles leh Nehru Yuva Kendra pangkhawmte’n Feb. 22-28, 2010 sung Somsai mun ah National Integration Camp nei uhi. Hiai camp bel Ministry of Youth Affairs & Sports, Govt. of India panpihna a neih hi a, tua ah, cultural tuamtuam, educational lectures, meeting leh Guest lectures chihte neih in om hi. A kigendan in hiai hun in Adventure Tour leng neih ahih ding banah, gam leh nam tawh kisai a film kibawlte suahna leng om ding hi. Hiai camp ah mun tuamtuam apan tuailai tamtak kihel uh hidan inleng thusuak in taklang hi.

MPP President din Nimaichand Luwang tuhtu omlou a telching in om
Imphal, Feb-24 : Manipur People’s Party (MPP) Organisation Election-2010 neih a om ah President ding in tuhtu omlou in Dr. Nimaichand Luwang telching in om hi. Hiai election ah Vice-President ding in mi 5, Disciplinary Committee din mi 4, Working Committee din mi 10 leh Election Committee din mi 8 tuhtu omlou in telching in om uhi.
Hiai bang a election lawhchingtak a neih zawh ahih tawh kiton in tuni in Central Committee leh Party Conference kithuah nei ua, huai ah MPP makai dia a kigawm a mi 28 telching ahihdan uh puang uhi. Hiai hun in President thak Nimaichand Luwang in, Manipur ah 2012 a Assembly Election a om chiang a MPP in Congress Party tellou a party dangte tawh pangkhawm a solkal bawl zou ngei dia panlak hiding in gen hi.

Kerala apan team khat in Sharmila award hongpia
Imphal, Feb-24 : Manipur a Armed Forces Special Power Act (AFSPA) lak khiakna dia anngawl a nuakna nei a om Irom Chanu Sharmila tuni in a omna JN Hospital a Security Ward ah Kerala apan team khat in kimuhpihna nei in MYILAMMA Foundation Award-2009’ kichi piakna hong nei uhi. Hiaite bel Foundation a Secretary MN Giri makaihna in mi 5 hong hawh a hiai award a hong khuksak uhi.

Misi luang koihkhiak hiding
Imphal, Feb-24 : North AOC, Hapta Minuthong a lampi kianga apaisa Feb. 21, 2010 nitak dak 8:10 vel a kisual buaina ziaka a liam a dam zoulou a sihna tuak Thomas Kamei (37) s/o K. Kadundai of Leisap village, Nungba, Tamenglong district, tulel a Langol Laimanai a om luang RIM morgue ah tunitan koih in om hi. Hiai tawh kisai in tuni in OC, Imphal Police station in tuni a thusuah bawl a, huai ah misi luang Feb. 26, 2010 tan a lak khiak ahih kei a leh dan (law) dungzui a koihkhiak hiding in taklang hi. Hiai sihna tawh kisai in JAC bawlkhiak in om a, huaite’n CM kiangah memorandum pia uhi. Huai ah thiltung tawh a ziak diktak Gazetted Officer, DSP rank sang a niamzaw lou suisak ding, local tuailai thum Saumthorei, P.G. Robert Kachakopuang leh Samson Kamei te Police-te’n a mat uh thu leh la omlou a khahkhiak ding, misi sungkuante service benefit leh amuh ding uh kilawmte piak ding phut ua, hiaite sukpichin ahih kei a leh siluang lak louh ding in gen uhi. Hiai bang a JAC pawl memorandum tunitan solkal in pichin ding leh ding louh bangmah dawnna a muhlouh ziak ua siluang lak louh a omlai ahi hi.

Handgrenade va paih uh
Imphal, Feb-24 : Kshetrigao Awang Leikai a om Md. Shaji (35) s/o Abdul Manat tenna inn ah tuni zingkal dak 8:00 vel in meltheihlouhte’n handgrenade khat va paih ua, himahleh puaklou in a zinglam dak 10:00 lak in police bomb siamte’n vala khia in mun thoveng ah hihpuak uhi.

Meltheihlouhte’n nupi khat thau in kapliam
Imphal, Feb-24 : Yuorbung Khunou a om Anganwadi heutu Shrimayum Mani Devi (50) w/o Ibongou Chand tunitak in meltheihlouh te’n a tenna inn ah thau in va kap ua, kintak a Shija Hospital puaklut in om hi. A kigendan in apaisa Dec. 4, 2009 in hiai mun mah ah meltheihlouhte’n thau va kap ua, si leh liam bel omlou uhi. Tua zawh Dec. 13, 2009 in va pain awn in bomb va paih puak ua, huai ah a pasal Ibongou Chand in liamna tuak hi. Feb., 18, 2010 nitak dak 8:30 vel in va pai nawn in thau round bangzahhiam va kap nawn uhi.

ATSUM in Academic Consultation nei ding
Imphal, Feb-24 : All Tribal Students’ Union, Manipur (ATSUM) a Asst. Gen. Secy. Robert Leivon min a tuni a press release kisuah kimu in a taklatna ah, ATSUM in maban a District Council Election om ding hoihtak a nungzuih kawm in, singtangmite kum 20 val vingveng haksatak a om nung a hiai bang neih nawn ding pen ngaisiamlou in Election ah kuamah kihel lou ding in gen uhi. District Council tawh kisai a suizuina uah ATSUM in thuneihna banah hunpaisa, tu hun leh hun hongtung ding etna a Academic Sonsultation March 16, 2010 a neih hiding in gen uhi. Hiai hun in Academician, Intellectuals, Senior Citizens leh Mandated Apex Civil Society makai kuapeuh kihel a, ngaihdan sungkhawm chiat ding inleng theisak in ngetna nei uhi.

Bawngkawn ah vai siluang 1 mukhia
Aizawl, Feb 24: Tuni February 24 zing dak 6 in Bawngkawn Bazar Baptist biakin bul ah vaite Najir Uddin (21) sisa in muhkhiakin om hi. Najir Uddin ahihleh.J.Lalbiakmuana of Bawngkawn tenna inn ah khawsa hi a, J.Lalbiakmuana te’n Pathian thu hoihtak a ahilhkhitnung un January 2010 a piangthak a, Baptisma leng tang chi uhi. Najir Uddin ahihleh Madhya Pradesh mi hidanin kigen hi.
Najir Uddin om in tuma zek in a khaw lam uh phak ut ahihdan Lalbiakmuana tapa kiang ah genkha ngei a, huchih lai in Kiginni paisa in a om na theihlouh in mang chi uhi. Tu zingkal in Bawngkawn bazar ah a siluang muh in om a, veng mite’n leng lamdangsa mahmah uh chi uhi. Huchih lai in tu zingkal mah in Valeicha Company nuai a sem kum 45 a upa Madhyapradesh mi khat leng suang in delhlum a, siluang 2 te postmortem bawl ahihnung in a khawlam tuak uah puak hiding in gen uhi. Aizawl a Muslim Welfare Association in tuni a thusuah abawlna uah Mizoram state sung ah Muslim mi 19 in lamdangtak in sihna tuakta ua, huai lak ah luang 7 te state dang ah puakkhiakin om chi uhi.