Pawl khat in rail sung ah N-E mite vua
Bangalore zuan lai Lam Za Kung Sektak omna kitheilou
Lamka, Feb 13: Karnataka khawpi Bangalore a septheih-theih sem dia kuankhia Lam Za Kung (16) s/o Pau Thah Thang of Selam, Mizoram a omna theihlouh in West Bengal state sung ah mang chi¬hthu kiza a, a innkuanpihte patau mahmah in mun tuamtuam dapkual lel uhi.

Lamka apan Bangalore zuan Lam Nei Lal Sektak s/o Go Khan Pao, Lam Suan Lal Sektak s/o S Lal Thian Muan, Lam Za Kung Sektak s/o Pau Thah Thang, Kap Do Lian Tombing s/o Zam Thang leh Hau Mung Tombing s/o Lang Kap te hi un kigen a, Lam Suan Lal ahihleh Bungmual khawmi hi a, midang 4 te ahihleh Mizoram a Selam khawmi ngen hi un kigen hi. Lam Nei Lal, Lam Suan Lal leh Lam Za Kung te ahihleh pate unau ngen hi ua, Kap Do Lian leh Hau Mung te leng a pate uh unau hi’n kigen hi. Muanhuaitak apan thusuak kingahdan in, Bangalore ah kum 3/4 vel om sa Se-lam khawmi Lam Nei Lal Sektak leh a sanggam pasal 4 te tunai zek in Lamka hongtung ua, Bungmual New Lane a om a paneu uh S Lal Thian Muan kiangah hong kinga uh hi’n kigen hi. Bungmual apan in Feb 7 2010 (Pathianni) in kipankhia ua, Lal Thian Muan tapa Lam Suan Lal in leng zui in Lamka-Guwahati bus ah tuang in, Guwahati apan in ‘Super Fast train’ man uh chihthu zak in om hi. Super Fast train a General boggie ah tuang ua, a innkuanpihte uh kiang ah Assam state apan West Bengal state alut dek tan uh hilhkha uh hi’n kigen hi.

Bangalore zuan mi 5 te’ lak ah mi 4 te Nilaini Feb 10 2010 zinglam dak 11 vel in Bangalore tung ua, nitaklam dak 2 vel in Bung¬mual a om a innkuanpihte uh phone in, Lam Za Kung in Howrah station kiimlak apan zui nawnlou leh mukha nawnlou uh ahihdan hilh uhi. Manipur Express in tu zingkal in amaute lak a makai deuh Lam Nei Lal telephone tungtawn in houpih a, tuaban ah, Lam Suan Lal nu Chingmuanvung te leng va houpih hi. Lam Nei Lal in agendan in, “Kolkota a Howrah station nitak dak 12 vel in ka tung ua, huai hun in leng ka sanggampa Lam Za Kung a om nawnkei” chi hi. Aman ataklatdan in, West Bengal state sung a Howrah train station tunma in train sung ah buaina khat hong om a, huai ah Meitei-te leh Vaite hong kisual ua, Howrah station ma a station mas¬apen ah security te’n cabin/boggie sung a om teng hon kumsak ua, bangtanhiam nung in ka kal nawn uh chi hi. Vaite’n kou lawi Nepali maw khawng hon chi ua, kei leh Kap Do Lian hon vawkha uh chi a, huai hun ah Lam Za Kung pen train ah hong kal kha manlou hia ahihkei leh koilai a tangkha hiam chih gen haksa mahmah chi hi. Lam Za Kung tanaute khat in agenna ah, train sung a buaina om na lak ah Lam Za Kung pen train apan lotkhiak a om mawkmawk kha hiam chih leng theih haksapi suak a, mipi buai vengvung lai a Train apan lotkhiak a om hia chih ka theikei chi a, a hoih lam ka kipe phot uh chi hi.

Lam Za Kung ahihleh, Feb 8-9, 2010 kikal a West Bengal state sung a rail sta¬tion mun khat a mang ahihdan chiang mahmah a, boggie sung a buaina om ziak a pawlam a sawlkhiak a a om hun a mang hid¬ing in ginmawhthu kigen hi. Zanhal in Lamka apan in a sanggamte N K Naulak makaih in pawlkhat in delh ua, Bangalore apan in leng Lam Nei Lal makaih in Howrah station banah West Bengal state sung ah muanmawhna munmun dapkual ding in Howrah zuan uh hi’n kigen hi. Lam Za Kung in ahihleh, a sumbawm (wallet) banah a bag tanpha pawlou in om a, vaipau leh sappau theilou hi a, a thuzakna (bil) leng hoih lawlou hi’n kigen hi. A innkuan-pihte patau mahmah in amah mukhate’n Mobile Number 9862252093 ahihkeileh, 09008616256 ah hilh ding in ngen uhi. Thiltung in mi tamtak lungsim phawng hi’n leng kigen hi.

Zomi Council in thupuan bawl
Lamka, Feb-13: Zomi Council Gen HQ in Li¬anlemsiam @ Siasiam of Singngat sihna tawh kisai case ngaihtuah dia la(take-up) uh hi’n thupuan bawl uh a, huai thu buaipih leh panla civil societies tua¬mtuamte’ pahtakthu puang kawm in tuban kuamah dangin huai thu buaipih nawnlou ding leh Press Re¬lease hiam Internet tung-tawn leh Media zanga thu suahlou ding in ngetna bawl uh a, huai bawhsiate tungah Zomi Council in mawh pawlou ding chi’n leng taklang uhi. Zomi Council in khawtang(society) hoi¬hna ding deihna in Tribal culture leh Customary law dungzui in huai thubuai tungtang ah panla ding chi’n Secy(Info & Pub), Zomi Council in thusuah bawl hi.

Mission khawmpi & Gospel Centenary
Lamka, Feb-13: Mission & Evangelism Deptt, Evangel¬ical Churches Association (ECA) Manipur saina in Tuibuong Peace Ground ah Feb 11 nitak apan “The 6th ECA Mission Conference 2010-cum- Southern Mani¬pur Gospel Centenary Cel-ebration” thupitak in kipan hi. Tuni zinglam dak 9:30 in ECA Jubilee Compound, Molnom ah Centenary Monument Stone honkh¬iakna om a, huai ah Rev (Retd) Ngamjalhun Baite, Senior Pastor in Centenary Monument suang hong a, centenary balloon leng kikhah hi. Tuibuong Peace Gound ah tuni zinglam dak 11 apan in Centenary lopna program om a, huai ah Jilkhosei & Party te’n Centenary pengkul mut uh a, teltuam heutu mi 40, delegate leh area leader mi 60 te’n khatvei chiat Centenary Dakpi khen uhi.Tuni Centenary lopna ah mi poimawh tuamtuam tamtak in uap uh a, Miss Jacintha Lazarus, IAS, DC/CCpur in leng uap uhi.
Conference sung in mipi 20,000 val telna bi¬akna kikhopna omsek a, huai sung mah in Rev. David P.Saunders, Senior Pastor Rocksforth Essex, UK; Rev Michael Healey, Pastor Horham Baptist Church, Sufflock, UK; Rev John Merson, Pastor Aberdeen Church, UK; Rev Dr Tony, Sargent ,Ambassador for ICC, UK leh Rev Dino L.Touthang, Exe.Director EFICOR te’n Pathian thu¬gen uhi. Centenary lop hun in mun tuamtuam apan choir te’n Pathian phatna in lapawl sal uh a, Feb 14, 2010 nitak kikhop tawp in Elder D.Paokholun, Ex¬ecutive Chairman , ECA in program hun khak ding a, Rev Nguljathang in Benediction in biakna khak hing hi.

One day Kuki Leaders Summit om
Imphal, Feb-13: Kuki Innpi Manipur (KIM) te saina in tuni zinglam dak 11:00 in Hotel Imphal Confer¬ence Hall ah ‘One-Day Kuki Leaders Summit on Unification of Kuki Tribes’ kichi neih in om hi. Hiai hun in PHED Minister TN Haokip, HAC Chairman Thangminlen Kipgen, Doukhomang Khongsai, MLA te banah makai tuamtuam leh Officer hunkhop paikhawm uhi.
KIM President Thangkhosei Haokip in tulel a KIM in panlakna a neihte pulakna nei a, pangkhawm a iki gawmkhawm theih kei a leh ki suakta lou ding ahihdan gen in, makai tuamtuam inleng pankhawm a dinmun bawlhoih thak deihhuai a sakthu uh taklang uhi. Tua tawh kiton in thupukna point 5 vel la uhi.
Huaite bel : Thadou- Kuki pau zangte kitheihsiam tuahna dia panlak ding, Social & Custom re¬form bawl ding, Chiefship Institution leh Land holding reform bawlthak ding, Thautawi pawlte tawh pangkhawm a Kuki Society sung bawlhoih ding leh Kuki Re-unification paitouh sak zel ding chihte ahi hi. Hiai teng banah Imphal capita ahihdungzui a office khat dinkhiak a, makaite zat ding gari khat neih hoih sakthu leng gen uhi.

Pune bomb puak ah mi 8 si
Pune, Feb 13: India gamsung adia siamsinna (edu¬cation) lam a minthang mahmah Maharashtra khawpi Pune ah tunitak in bomb puak om a, huai ah mi 8 in sihna tuak in tamtak liam chih thu kiza hi. Police thusuak in agenna ah, November 2008 in Mumbai ah bomb puak thupitak om a, huai nung India adia bomb puak thupi a khatveina hiding in gen uhi.
Pune khawpi laizang a om German Bakery ah tunitak in bomb hat leh ngaih mahmah puakzak a, huai hun in gamdang mi khualzin tamtak leng bakery kong a a om lai uh hidanin kigen uhi. Joint commissioner of Police Rajendra Sonawane in agenna ah, mi 8 si in 33 liam chi hi. Union Home ministy thusuak dan in bel mi 8 si in 40 liam chi uhi.
Home Ministry official thusuak dan in, US in helpawl tawh kizom hi a amuan mawh mahmah uh David Headley leng hiai area ah a omlaitak chi ua, thil tung sui zuiding in CBI leh National Investigative Agency (NIA) te mawhpuakna piak hingal uh chi’n Union Home Secretary Gopal Krishna Pillai in thuthaksaite ki¬ang ah gen hi.

April apan Right To Education Act
New Delhi, Feb 13: Centre government in fundamental rights a om ‘rights to education’ kichi a taktak a tangtunna ding in mi siam hunkhop kiang ah ngaihdan a kaihkhawm nung un ‘Right to Education Act’ kichi April 2010 apan zatpat hiding chi uhi. Huai a sum beidi teng ahihleh, centre leh state government in a seen ding uh chi uhi.
Centre government in tuni a thusuah abawlna uah, ‘The Right of Children to Free and Compulsory Education Act’ kichi kumlui August kha a parliament in pompihna abawl hi a, naupang kum 6 apan 14 tante a lou theilou a school akaiding uh ahi chi uhi. Khawsak haksa leh namniamte’ adia private school te’n seat 25% a reserved ding uh ahi chi uhi. Government in abawlkhiak expert committee in hunsawtkuamtak hiai Act zatding dan a ngaihtuah nung un kum 5 sung in Rs 1.71 lakh crore poimawh ding ahi chi ua, centre government leh state government te’ sum sen dingdan leng taklang ngal uhi. Tua dungzui in a kum masapen ah centre in 55 % leh state in 45 % seng ding ua, akum nawn apan in 65-35, 75-25 chi’n paitou tou ding chi uhi.

Centre government in ngaihdan a piaklutna abel centre in 65% seng henla, state in 35 % hileh chih gen ua, ahihziak in India malsuah bial te ah bel centre government in 90% seng ding a, state government in 10% lel seng ding chi uhi. Union HRD Ministry in tu in April 1 2010 apan hiai Act zatkhiak dingdan buaipih mahmah lel uh hi’n kigen hi.

Telangana’ panel te’n meeting nei
New Delhi, Feb 13: Union Home Ministry in Telanga¬na state bawlkhiakna ding tawh kisai a thil omdan ngaihtuah khawm masadia abawlkhiak high-level committee/panel te’n tuni in New Delhi ah Justice B N Srikrishna makaih in meeting masapen nei uhi. Government in ahihleh, zan in Panel te’ zuih ding daan bangzahhiam khunkhum khinta ua, a thilmuh (find¬ing) uleng December 31 2010 tan a government kiang ah apiaklut ding chi uhi.

Tuni in Vigyan Bhawan ah meeting a kipat dek in student tamtak in kiphinna va neih khum ua, Delhi po¬lice te’n student 7 hentang lel uhi. Kha 2 vingveng Andhra Pradesh state sung ah Telangana issue ziak a buaina om nung in, Cen¬tre government in feb 3 2010 in Telangana committee kichi khat dinkhia uhi. Amau Andhra Pradesh state apan Telangana state bawlkhiak hileh piching zou taktak na ding uhiam chih te ngenteltak a enkai ding uh hi’n kigen hi. Com¬mittee ah member 5 om a, Supreme Court Judge lui Srikrishna in committee makaih hi.

Centre government in tukum sung vingveng thil study na dia committee te hun apiak ziak un huai lungkimlou in Andhra Pradesh a Telangana region teng tuni in bandh in om a, Osmania University student te’n leng centre thusun naktak a nial uh ahihdan puang uhi. Union home ministry in Telangana mite’ haksatna hiai zah zouzai a theih nung ua, committee te’ adia a zuih ding uh ‘Terms of Reference’ bang¬ziak a pe sese uhiam chi uhi. State Road Transport Corporation in bus aneihteng a taisak louh ziak in tuni in kikawmtuahna buai mahmah a, Joint Action Committee of Osmania University Students te’n khauhsem a pai ding uh ahihdan puang kawm in, centre government in Telangana state abawlkhiak kin kei leh mipite’n haksatna thupi sem tuak toutou laiding chi uhi.

29th Assam Rifles te’n numei 2 tel in KCP mi 3 mankhia
Imphal, Feb.-13: 26 Sec-tor HQ IG/AR (South) nuai a om 29th Assam Rifles te’n zan nitaklam dak 5:15 vel a Tengnoupal leh Savom village kikal a Mobile Vehicle checkpost mun ah gari a checkna uah KCP (City group) a tel numei 2 leh pasal khat mankhia uhi.

Thusuak in a tak¬lat dan in Maruti Van (MN-04L/2635) a check lai un hiai a tuang mi 5 te a guk in kihep mang sawmlai mankhia uhi. Amau thudotna apan in KCP (City group) a Self-Style Sergeant G. Rupa Sharman (27) of Lilong Chajing Karam tel in numei 2, M. Abem (28) w/o (L) Inaoton of Bishenpur leh L. Ibemcha Devi (32) w/o Joynangoi of Irom Maijao, Wangoi te mankhia uhi. Tua banah, KCP (City Group) a tel dia training la ding a tonpih uh minih L. Arjun Singh (18) leh Ng. Guneshwor (18) of Luwangshangbam Mayai Leikai te leng mankhawm uhi. Mat a omte ahihleh Imphal West Police station ah pekhia uhi.

Arunachal puahna di’n Rs 500 cr
New Delhi, Feb 13: Indo- China border tawh kisai centre government a patauh kawmkawm un tuni in Empowered Group of Ministers (EGoM) on Road Sector te’ deihna bang in Arunachal Pradesh a lampi poimawh diak 4 puahna ding in Rs 500 crore sanction in om chi uhi. Minis¬try of Road Transport and Highways ten BOT (Annuity) Projects nuai ah lampi 4 bawl hihen chi’n pro¬posal ana pelut ua, hiai pen EGoM in pomsak in, Cabinet Committee on Infrastructure (CCI) ah luikhiak hiding a, tua zawhchiang in Rs 500 crore zang in lampi bawlna kipan ding chi uhi.

Lampi 4 te ahihleh, km 311 a sau Trans Arunachal Highway (Nichipu to Hoj), km 407 a sau Trans Arunachal Highways Potin to Pangin te hiding a, hiai te 2 laning tuaktuak hid¬ing in kigen hi. Km 25.8 a sau Dhola leh Sadiya kal ah lei thupitak dawh hiding a, Debang valley ah lei thak 5 bawlbeh hiding chi uhi. Union Finance Minister Mr Pranab Mukherjee in leng mimaltak ah Arunachal Pradesh state awlmawh mahmah chi ua, EGoM ah Chairman ahihzawk mah tawh Arunachal Pradesh puahna ding in sum tamtak sanction in om chi uhi.

Army te’n Medical camp nei
Imphal, Feb.-13 : 9th Sector HQ IG/AR (South) nuai a om 39th Assam Rifles te’n tuni zinglam dak 10:00 in Imphal West district sung Luwangshangbam a om Carmel Jyoti Child Care Centre ah medical camp nei uhi. Hiai hun in damlou tamtak enkol in damdawi leng a thawn in hawm uhi. Major General C.A., Krishnan in hiai centre a omte a ding in kimawlna van tuamtuam leng pia hi.

Tualou in, 31 Assam Ri¬fles te’n Feb. 12 in in Moreh ah ‘Medical camp-cum-HIV/ AIDS Awareness Camp’ thupitak in nei uhi. Hiai hun in khaw tuamtuam apan damlou mi 513-te etna nei in damdawi leng a thawn in hawm uhi.

2010 Winter Olympics honkhiak in om
2010 Winter Olympics zan nitak in Vancouver ah Canadian Governor General Michaelle Jean in honkhiakna nei hi. Hiai hun in mipi 60,000 val BC Place Stadium ah paikhawm ua, General Michaelle Jean in ‘Vancouver in a zintun a 21 veina Winter Olmpics ka hongkhia ahi’ a chih tawh kiton in 2010 Winter Olympics patkhiak in om hi. Tutung a Canada a Winter Olympics honkhiak ahih tawh kiton in Canada gam in Olympics 3 vei a zintunna hita a, IOC President Jacques Rogge in, Canada in hiai bang a Winter Olympics a zintun pen thupi a sakdan taklang kawm in, kimawlmite ki¬angah nou a ahi, chi’n piak khiakna nei hi.

2010 Winter Olympics honkhiakna bel Georgia mi Luger Nodar Kumaritashvili sihna ziakin nawngkai zek a, amah suunna leng neih in om ngal hi. Nodar Kumaritashvili ahihleh hiai Winter Olympics a tel dia kisakkholhna a neih lai in kihih kha in si mawk a, Georgian team-te mipi mai a hongpai un a ban(arm) uah badge vom belh chiat ua, mipi paikhawm tamtak in amaute Nodar zahna piakna in a mun chiat uah ana ding(stand) uhi. Hiai Winter Olympics ah gam tuamtuam 82 apan kimawlmi 2,500 kimawlna tuamtuam in kidemna ding ua, Feb. 12-28, 2010 sung neih hiding hi.

Tuni thupi
“TOUPA aw, nang nuam nasa hi; na thusehte hon zilsak in.” – Sam 119:12
Sisan thohkhe ngam
Tuni World Blood Donation Day hikei mah leh, poimawh i sak ziak in sisan thohkhe ngam chih tawh kisai houlim leng uthuai isa hi. Blood i chih chiang in sisan hi a, mite sisan hopsawnna bangzah ta a poimawh hiam chih a tuakkha lou te’n theilou ahihman in mi damtheite ading in theihlouh theih mah hi a, ahih ziak in mihingte damthei gige ding chi ngam i om louhman in sisan poimawh dan pe’n kuapeuh in i theih ding ua hoih mahmah ahi.
Sisan leh damdawi inn kichi ki naih mahmah hi. Inn lum ah sisan kipiaktuahna hih theih mawk louh ahihna ah, damdawi inn naih ngai a, damdawi inn a blood transfusion centre tungtawn in hiipkhiak ana hizel hi. Private leh Government hospital te ah blood bank om in sisan kihop tuahna leh sisan thawh kichi te om sek hi. Leitung pumpi ah World Blood Donation Day zat ahih dek chiang in kha khat sung blood donation awareness programme neih in om sek a, ahihziak in Lamka zang ah tuabang thawm ging zaak ding om vang mahmah hi. Donation day leh day louh hilou in, sisan poimawh dan tawh kisai in awareness campaign kichi himhim om ngeilou hi.
Centre govt nuai a Director General of Health Services, Dr. R. K. Srivastava in agenna ah, kumkhat in mi phatuam ngaite apan sisan unit Million 5 bang thoh khawm in om sek a, India gamsung in a poimawh zah 60% in hu zou a, 40% te huklouh in om lai ahi chi hi. Sisan thohtu (blood donor) kichi poimawh petmah a, kuaman a sisan uh midangte ading in pe ngam kei mawk leh leitung ah amah kia in kua ahing zou dia chih ngaihsut tham ahi hi. Indian Red Cross Society panlakna ziak in kum teng in India gamsung state tuamtuam ah sisan tamtak kaihkhop in om sek a, huai hikei leh sisan duh a dangtak tamtak in sihlawh kha sek ding hi. Misiam te’n agendan un mi khat in sisan 2/3 a donate/piakkhiak leh a ma taksa adia poi banlou ding ahi chi uhi. Sisan kichi chi tamtak (component plasma cell) in ki khen mah leh mi tuamtuam in sisan a thoh khawm chiang un damlou khat teitei a tawh a sisan thoh uh ana kituak kha thouthou hi. Huai ziakin sisan/blood group khat peuh in leng sisan thoh thei veve ahi chih na ahi hi.
Mihingte taksa ka hiang (organ) te a poimawh vek bang in sisan leng poimawh penpente lak a khat hi a, sisan omlou in mihing om theilou hi. Mi khenkhat te’n a sisan uh it chih tak in it ua, kuamah kiang ah leng pekhe ngam mahmah lou uhi. Sisan kichi amah leh amah hong ki form theizel hi a, i thil neek apan sisan thak hong piang khe zel ahihman in sisan pe’n it tentun luat ding hilou hi. Lamka a om nailou state dang a om khat genta le hang, vaigam bang ah misi dek khenkhat in ka sih chiang in ka mit, ka khut, ka khe leh ka kal (kidney) te la khia unlan, a damlaite adingin ana zangun chikhawng in agreement khawng sign toptopuhi. Mite kiphaldan ana sa mahmah a, eilawi bang hile, taksa bukim lou a kivui kichi ding ihi. Mite’n bel a sihpih ding thouthou uh chi in, damlou dangte adia phatuam thei¬ding ngimna ziak in a taksa ka hiang uh ana it hetlou in lungsim liantak leh kiphaltak in ana thoh (donate) sek uhi.
Eilam a thiltung khenkhat enle hang, damlou sisan piak ngai om chiang in sisan petu (donor) ding kimu vang mahmah in Army te khawng i phone sek ua, army te tungtawn in mi tamtak in damna i ngahtak uh gintak huai hi. Hithei hileh, veng tuamtuam a philanthropic organization omte’n blood donation pi bawl tuak mahmah hi. Khawsung/vengsung a tuailai om teng sapkhop a a blood group uh kankhiak a, banghiam emer¬gency hun a zat chetchet theih ding in om leh damlou tamtakte hinna humbit i hi keiding maw…
Blood cancer te thutuam hita leh, damlou khenkhat te bang sisan unit 1/2 piak a dam maiding tamtak om ua, a petu ding muh zawhlouh ziak in si maimah pawl om uhi. Huchi kawmkal ah, damlou khenkhat bang sisan i piak zek leh halpah sungsung mai pawl bang leng om ahihman in, accident ka tuak keiding, sisan ka poimawh kei ding chi i om leh thutuam. A hih theih liai leh kuaman sisan it lou a, blood donation lam uang bawl poimawh mahmah hi’n kilang hi.