Kuki Idol tungtawn in Kuki Nampi kigawmkhawmni: Khaipao Haokip
LR Ruata Khohreng in Kuki Idol 2010 hihna ngah
Lamka, Jan 27: Tunitaklam dak 6:30 apan in Royal Academy D. Phailien ah Kuki Idol 2009-10 prize distribution program thupitak in om a, huai ah mipi 10,000 val in program uap uhi. Assam, Nagaland, Tripura, Mizoram leh Arunachal Pradesh tanpha apan mipi paikhawm in, Kuki Idol award hawmkhiakna hun lawhchingtakin zinglam dak 1:30 in zou pan uh chih thu kiza hi. Hiai hun ah Tripura apan hong kipan LR Ruata Khohreng in Kuki Idol 2009-10 hihna ngah

Rev Dr Lhunkhohao Haokip Founder & Presiddent ACMC in top 10 a telpha tante thumsakna nei a, Kuki Inpi CCpur President Khaipao Haokip in amaute hasotna a neihban ah Kuki Idol tungtawn in Kuki Nampi kigawmkhawmni chi’n mipi paikhawmte chialna bawl hi. Kuki Inpi Manipur, KSO GHQ, Kuki Mothers Assn, Manipur leh social orgn tuamtuam makaite apan thugen ngaihkhiakna om a, Kuki Idol masapen Lienchung Haokip in mipi paikhawmte chibai buk kawm in, tutung a Kuki Idol latu kiang ah cash award Rs 1,000,00 (Rs 1 lakh) cheque piakkhiakna leng nei hi. Kuki Idol 2009-10 final hun ah Chief Guest Dama Vaiphei Special Contractor in Rs 1 lakh in organising committee panpih a, Thiena Touthang Social worker in Rs 20,000, functional president Helien Kipgen, Social worker in Rs 30,000 leh Special guest Benny Thouthang Special Contractor in Rs 10,000 in vaisaite phungvuh uhi.

Mizoram apan lasiam(artists) hunkhop hongtung
Concert thupitak tawh kithuah Album honna om ding
Lamka, Jan 27: Khangthah Zuun Pawl(KZP) Golden Jubilee Committee saina in January 28,2010 nitaklam dak 5.00 in Rayburn College ah Concert thupitak om ding a, huaia lasa ding Mizoram akipan lasiam(arists) hunkhop tuni’n Lamka hongtung uh a,amau telin local artists tamtakin lasa ding uhi. Huaima sunnung dak 2.00 in Simveng a SYO Hall ah Simte Music Video album “Tutkhawl Zaikhiang” kichi Khanthang Tonsing khuallian a pang in hong ding a, Rev P.Soilian in Album latna nei ding hi. Huai ah Guest of Honour in V.Letboi, Chief of Zenhang Lamka pangding hi.

“Tutkhawl Zaikhiang” chih kiminvuah Simte Music Video Album bel Khangthah Zuun Pawl(KZP) Gen HQ in Golden Jubilee lopna kawma a bawlkhiak uh hi a, huaia lasate Mizoram a lasiam minthang ngen Mimi Renthlei,Mami Varte, Zomuanpuii, Lawmi Khiangte, C. Sanga, Sanglura leh Joseph Zaia hi uh a,musician bel PB Lianhming ahi hi. Music Video Album honna uap ding leh Concert a tel dingin

Mimi Renthlei, Mami Varte, H.C Sanglura, Zomuanpuii, Lawmi Khiangte, C.Sanga leh Musician P.B Lianhminga tuni’n Aizawl akipan in lenna(flight) in Imphal hongtung uhi. KZP Golden Jubilee Celebration Committee makaite’n Imphal Airport ah vadawn uh a, nitaklam dak 3:30 in Simveng a SYO Hall ah vaidawnna(reception program) om a, SYO Hall dim in mipi paikhawm uhi.

ZEPADA makai ding telkhia
Lamka, Jan 27: Muanhuaitak apan thusuak kingahdan in, Zomi Economic Planning and Development Agency (ZEPADA) Delhi working group Chairman ding in Biaklun Shoute, Vice Chairman Khupminthang, Secretary K Thangzalun, Asst Secy Swanzalian, Finance Secy Zamlunmang leh Information secy ding in T Thanghnun telching in om uh chih thu kiza hi.

MTC kiphuhkhiak zawh kum 1 ching
Lamka, Jan- 27: Manipur Tribals Council(MTC) pawlin a kiphuhkhiak nung uh kum 1 chinna(1st anniversary) tuni sunnung 1:00 akipan in Tuibuong a DM Veng Community Hall ah zang uh a, huai ah CDSU, ZSF, KSO, PTC, MPC, Hmar Inpui, Zomi Council, TTC, DCTA makaite ban ah mi poimawh tuamtuam hunkhawp in uap uhi. MTC President HK Joute leh Gen Secy H.Pauzalal in MTC kiphuhkhiakna ziak tangpi, nasep tuamtuamte leh District Council election phutna a panlakna tuamtuam omte taklang uhi. Huai hun ah Hmar Inpui, Zomi Council, MPC leh TTC heutute ban ah CDSU leh ZSF President te’n thugen uhi. Heutu paikhawmte’n MTC nasepna pahtakthu gen uh a, Tribal issue thila panla a demand neite lak ah MTC lawhching baihpawl hi’n leng gen uhi.

Mizoram Art & Culture Minister Zoramsangliana in uap ding
Santing khua ah YMA general conference kipan
Lamka, Jan- 16: Lamka khawpi apan tumlam km 67 vel agamla Santing khua ah Jan 27-29, 2010 sung Young Mizo Association (YMA), Manipur Group Annual Conference 25 veina om ding a, tuni in gari 76 vel in Lamka nusia in Santing khua Tipaimukh road tawn in zuan uhi. Huai lak ah bus, truck, scorpio, bolero leh car tamtak hi a, pei 2 nei a tai gari hunkhop om a, huaite tawh sim in gari 100 val in tuni’n Santing zuan uhi.

Zingchiang Jan 28, 2010 zinglam dak 11:00 in Mizoram apan Transport, Art & Culture ban ah Printing & Stationery Minister P.C.Zoramsangliana in khuallian hihna tawh uap ding hi. Minister pu leng tuni’n Mizoram’ Lengpui airport apan Lamka hongtung suak hi. Functional President in T.Manga Vaiphei, Chairman MTDC ban ah Henglep MLA pang ding a, Guest of Honour in Ms. Jacintha Lazarus, IAS, DC/CCpur pangding hi. Jan 29, 2010 zinglam dak 10:00 a kikhopna ah Chief Guest in Ms Laltanpuii, MCS, SDO/Thanlon pang ding a, Fuctional President in LS Gangte, Vice Principal CCpur Govt College pangding hi. Mizoram leh Manipur apan lasiam tamtak leng hiai program ah tel ding ua, cultural exhibition; Duet kidemna ban ah lenkhawm kidemna leng omding a, 2010-2012 sung YMA(Manipur Group) makai ding telna leng omding hi. HYA, ZYA leh KKL apan makai tamtak in leng zingchiang Jan 28 2010 in Santing khua zuan ding uh chih thu om hi.

ZYA Anniversary & Annual Function
Lamka, Jan- 27: Tuivel Area ZYA kiphuhkiaknung kum 10 chinna leh Annual Function kithuah Feb 4-6, 2010 sung Maukot khua ah om ding hi. Huai hunsung in
T.Hangkhanpau, MLA (Singngat A/C); Herbert T.Sumpu, President ZYA HQ;
D.Kamsuan, Gen Secy ZRO; G.Suanchinpau, Spl Contractor; Maukot hausa; C.Tuivel hausa leh Mongken hausa te’n uap ding uhi.

DC in staff- te meeting neihpih
Lamka, Jan- 27: Miss Jacintha Lazarus, IAS, DC/CCpur in tuni sunnung dak 1:00 apan in a office chamber ah DRDA, Revenue, FCS, Planning leh Election Deptt te meeting neihpih a, huai ah attendance thu, file movement leh nasepdan tangpi thuhilhna nei hi’n kigen hi.

Thousilen 200 val hawmkhia
Lamka, Jan- 27: Dr.F.Thienkhogin, DMO/CCpur in tuni zinglam in Sagang PHC nuai a Siden PHSC veh a, khua 8 ah thousilen(mosquito net) hawmkhia hi. DMO in Khojanglok, Kananphai, Lunjang, S.Gampijang, Mongjang, T.Mongnonphai, Siden leh Changpikot khua ah thousilen 200 val hawmkhia a, numei naupai (pregnant women) 7 kiang ah thousilen khat chiat pia hi’n kigen hi.

IFCD Minister in enkhia
N.Biren Singh, Minister IFCD in tuni sun dak 12:00 in Saikul khua apan Khuga Dam Right side main canal nasepna enkhia a, nitaklam in Imphal ah kiknawn hi.

MLA(Thanlon A/C) omlel
V.Hangkhanlian, MLA (Thanlon A/C) in a tanu Nenem pasal nei Jan 30, 2010 in khakna a neihding tuni’n Lamka hong giaklut a, Feb 1, 2010 tan om ding hi’n kigen hi.

Ni 3 sung training om ding
Dist Mental Health Committee saina in Jan 28-30, 2010 sung Dist Hospital a Lecture Hall ah “Mental Health Training” omding hi. Huai ah Dr Gyneswar Singh, Psychiatrist in sinsak ding a, GNM 6 leh ANM 25 training ding uhi.

SUUNNA

M. Jangkholun Haokip
(Special Contractor-cum-founder
member of Haokip Peoples Council)
s/o(late) M. Onkhothang Haokip of
Tuibuong village damlouhna ziaka GNRC Hospital, Guwahati a ki-enkol damzoulou in tuni(Jan 27,2010) in si hi. Aluang hong kipua a, Jan 28,2010(Thursday)
in a upa M. Chungkhosei Haokip,ex-Minister’ tenna inn(opposite Tuibuong Petrol Pump) ah sunna programme om ding a, huaizawh in Tuibuong cemetry ah
kivui ding hi.

Upa B.Luaizachin(82) f/o Upa B.Goumang of New Lamka, Vengnuam tuni sunnung dak 2:00 vel in BP sanglua(stroke) in si a, Jan 28, 2010 in YPA New Lamka hanmual ah kivui ding hi.

Republic Day Beating of Retreat
Imphal, Jan-27: Tuni nitaklam dak 3.30 in 1st MR Parade ground ah Republic Day lopna hunkhakna kawmin Folk Dance Festival leh Beating of Retreat om hi. Huai ah Manipur Governor Gurbachan Jagat khuallian in pang a, aman kipahman tuamtuam pekhia a, hausa(village chiefs) khenkhat leng thilpia hi. Folk Dance festival ah Thadou Cultural Organisation, Motbung te’n khatna la in, Geeta Ideal Dance Academy in 2na la uh a, Khamba-Thoibi Dance Institute, Moirangte’n 3na la uhi.
Huai hun ah Chief Minister O. Ibobi n zan a Republic Day a March Past atel contingent tuamtuam 1na akipan 3na tan late kiangah kipahman pekhia hi.

IG/AR(South) in khaw tuamtuam pha
Imphal, Jan-27:Major Gen. C.A. Krishnan, IG/AR (South) in tuni’n Shaibol COB vapha in huai area a om sepaihte omna mun tuamtuam leng pha hi. Major General Krishnan in mipi vantang leh public leader tuamtuamte leng kimuhpih in thil omdan tangpi genkhawmpih hi. Aman Shaibol khua banah Yongkhul, Sairal Saisem, Narum leh Moriengthel khua pha a, khaw tuamtuam in nampuan pia uhi. IG/AR(South) in khaw tuamtuam a phaknate ah khantouhna ding tawh kisai khawsung mite genpih hi.
IG/AR South in khaw tuamtuam a phakna ah 26-Sector Commander Brig SK Bhanot in zui hi.

Cycle tuanglai Oil Tanker gari in phulum
Imphal, Jan-27 : Sekmai PS huamsung Maharavi Lamkhai mun ah tuni zinglam dak 10:50 vel ding in Oil Tanker gari(No. MN-01/6469) in cycle a tailai Langkham Ranjit (19) s/o Ng. Chingkhei of Maharavi Awang Leikai phukha a, amun ah si chihthu om hi. Hiai ziakin Sekmai Police te’n Oil Tanker gari hektu man in case register uh a, misiluang tuni’n post mortem bawl dingin RIMS a puaklut himahleh apa a omlouh ziakin zingchiang a bawl dingin koih in om hi.

JAC-te ceasework strike ni 12 ching
Imphal, Jan-27: All Manipur Trade Union Council(AMTUC) leh All Manipur Govt Employees Orgn(AMGEO) kigawm Joint Administrative Council(JAC) pawl in Jan 1,2006 akipan 6th Pay Commission report zat ding leh point tuamtuam tel govt ah a thilnget uh phutna in January 16,2009 akipan hunchiam omlou dia nasemlou a kiphinna(ceasework strike) a pat uh tuni in ni 12 ching hi. Chandel district a govt office tuamtuam ah employee-te kai mahle uh nasem omlou uh a, govt in ni 12 tana leng a limsaklouh lai lungkimlouh thu puang uhi. Tamenglong district ah leng govt nasemte’n JAC strike a support ziakin office tamzaw ah nasem omlou uh hi’n gen uhi.

Combined team in KCP 4 mankhia uh
Imphal, Jan-27: Imphal West Commando leh 26-Assam Rifles kigawm combined team in zan nitaklam in Wahengbam Traffic point kiang akipan KCP(City Meitei faction) atel mi 4 mankhia uh a, huaite laka khat helpawl a telding lakna(recruitment) thila kigolh hi’n gen uhi. Combined teamin a matkhiak mi 4te bel mipite lak kia hilouin contractor leh govt employee-te lak akipan sumkhon atel uh hidan in Police thusuak in gen hi.

Pensioner pawl mun tuamtuam ah kiphin uh
Imphal, Jan-27: Manipur State Pensioners’ Union pawlin tuni’n Leimakhong, Thoubal, Yairipok, Bishnupur leh Keishampat junction ah sit-in-protest tu uh a, Keishampat junction kia ah leng mi 200 val uhi. Manipur State Pensioners’ Union thusuak dungzui in state government in pensioner-te’n a muh ding uh kha 174 a Dearness Relief(DR) arrear tutan piak ahihlouh ban uah July 1,2008 a muh ding Dearness Relief 7%, January 1,2009 akipan muh ding Dearness Relief 10% leh July 1,2009 akipan muh ding Dearness Relief 9% piaklouh a om den chi’n lungkimlouh thu puang uhi.

EDITORIAL:

Tuni thupi: “Bawngtal tampiin hon um suak ua: Basan gama bawngtal hat taktak ten hon um suak dedup uhi.”- Sam 22: 12

CM thugen naaknuai kamsiam man hia?

India in zalenna bukim a ngah kum 60 chinna Republic Day zan in gamsung pumpi ah zat hi a, Imphal khawpi leh Lamka ah leng thupitak in lop in om hi. Zan zinglam dak 11.00 a 1st M/R Parade Ground ah Chief Minister O. Ibobi in March Past atel contingent-te leh mipi paikhawmte’ mai ah thugenna nei a, Manipur singtanggam kilkoi leh singtangdawn (remote & interior areas) a khua omte development scheme tunsuaksak vek ding state govt in tum chi hi. Manipur khantouh na dia khantouhna taktak tuntheihna ding in lemna(peace & stability) alou theilou a poimawh chi’n Chief Minister in genbeh a, state dang tawh tehin Manipur atuantual dan leng taklang zek hi.

Chief Minister Okram Ibobi Singh thugen pen atak a sepsuah lunggulhhuai mahmah a, naak nuai kamsiam lel a hihkhak ding lauhuai mahmah hi. Ahitak in gen le hang Politician te himhim mipi mai a thugen zei mahmah ngen hi ua, a sepsuahlouh ding pi uleng sepsuah sawm ahi, plan kibawl ahi, a fund kidelh ahi, project mansa hita chih te thangsak mahmah uhi. Chief Minister in thuzuau gen ahi chi bel ihi kei, ahihziak in, singtanggam kilkoawi leh singtangdawn tanpha puahsawm ahi a chih lel leng kipahhuai law mahmah a, ahihziak in bangchi hun chiang a sepsuah ding ahia chih bel mang amat bat ahih louh lai khak ding lauhuaitak ahi hi.

Manipur government in singtangbial puahna ding in vision zaw neikha mah unteh! Hilele, a vision uh a tak a muhding tawm thei mahmah hi. Centre government in scheme tuamtuam tungtawn in Manipur singtangbial te puahkei mai zeen le uh state in bang fund zang in apuah mahmah dia oi chih hun tam mahmah hi. Naak nuai kamsiam a thugen lel in Singtangmite’ lungtang zounawn ding in uphuailou hi. State government in singtang dawn tanpha puah ut ahih ua leh, bangziak a muhtheih a nnasem zungzunglou hiam chih theih a, singtangbial puahna ding teng phaizang bial ah heikawi (divert) ahihkhak ding lauhuai hi. NEC fund a kibawl Guite road bangleng Border Roads Organisation khut ah piakkhiak ding in CCpur mipite’n naktak in phu ua, ahihziak in state government in amau thunuai a om dia a koih ut tinten bang uleng thil lamdangtak hi a, singtang dawn tanpha puah ut ahih ua leh nasepna bangkim BRO khut ah apiakkhiak kin uh poimawh ding hi. Huchi ahihkeileh, state government in singtangbial puah utlou himhim bang a ngaihsut theih ding hi.

Chief Minister in hill area lung himawh a nei taktak ahih a, muhtheih a khantouhna tungsak ut ahihleh bangziak a office leh building poimawh tuamtuam te phaizang bial chauh ah koih hiam chih theih in om nawn hi. Kum bangzahhiam paisa in National games i zintun ua, huai hun in Games Village hi hen aw, stadium tuamtuam-te Imphal khawpi sung ngen ah koih in om a, Imphal apan Hill district headquarter naipen leh Manipur adia khawpi 2 na Lamka in bangmah tangkha lou hi. A ut ua leh hockey stadium, indoor stadium, swimming pool leh a tuamtuam koih thei ua, himahleh, hill district te tuabang hamphatna a ngah khat mah leng om lou hi.

Tualou in Central Agricultural University, Manipur University, GPO, BSEM office, CoHSEM office, Manipur University, RIMS, JNIMS, Airport leh building poimawh pipite Imphal ngen a siatkhop in om lemlum a, thamlou in secretariat, DGP leh department teng a head office Imphal khawpi ngen ah om vek hi. State government in tanggam ah khantouhna tung heh a chih taktak ua leh building leh office poimawh bangzahhiam tanggam district headquarter teng a bangzahhiam tan beek a hawmzak uh thil kilawm leh alou theilou ahi hi.

Lemna leh muanna omlou in khantouhna om theilou ding chi a Chief Minister in speech a piakpen a dik mahmah hi. Ahihziak in, lemna leh muanna om na ding in state government in bangchi’n pan ala a chih te dotna thamching ahi. Kumlui July 23 in BT road ah mi 2 kaplup in om a, huai tungtang ah state government in kintak a panla hileh CBI khut ah piakkhiak ngailou dia, student te’n kha 4 val school kailouh lawh in om lou ding uhi. Lemna leh muanna om taktak na ding in state government in helpawlte bangtan ah a zol ua, phaizang helpawl leh singtang helpawlte’ kal ah bangchi bang in nna asem ua chih te ngaihtuah tham pha mahmah a, huai ziak in Chief Minister in mipi mai a athugente lungsimtak a agen ahihdan a chetna ding in development ah hita leh lemna leh muanna om na ding in state government in pan hon la zungzung le uh chih huai mahmah hi. Huchi ahihkei leh singtangmite’n Chief Minister ah muanna nei nawnlou khong ding uh bang hi.