Home > Articles > Gangte Insung kivaipuokna tangpi


Gangte Insung kivaipuokna tangpi

Posted by benj on January 27, 2010 , Print , Email , Comment

By: Pu Thangzasiek

Mihiem hih Pathien melbangpu a siem ihih bang un, ikivaihawm nau hile Pathien insung kivaihawmna ki copy abatna aum hi. Pathien insung kivaihawm dan hile bible thiemten hitihin anagen ui: Lucifer, tu a (Setan) itih uhih pathien in amah vaihawmpih dinga anasiem ahiti atiu hi. Gabriel hih asawlchak dinga ana guot a. Seraphimte hih pahchaknala sadingin aguot a, chun Michael te hih galdodinga ana guotte ahiu tin bible thiemten eina hilh ui.

Mihiem hih Pathien tawh kibang ahi katihna ahi puoi. Iki vaihawmdan uh khenkhat hawhih pathien apat igou chan uh ahidem tizaw kahi. Zieguolchun eiuh Gangte te hinle insung kivaihawm na inei u a, apawimawh diek haw vak sulang leuhing ut um kasai. Dikkim puontin ahin, adikzaw heten zikbeh zel leuhing abutit theihna ding in.

Tucha Behcha:- Gangte intum suongkhat khat chun dahni kipakni a khut leh kenga imat ding un Tucha li (4) leh Behcha li (4) inei ui.

Behcha- Behcha bul/Lien/Pi – (Behcha lienpen ahi)
Behcha- Behcha bul/Lien/Pi – (Behchalien a aneuzaw)
Behcha- Behcha neu.
Behcha- Behcha neu.

Behcha dinghin behte khel khel lakding tihna aum puoi, ahin guolluiten chuh khat leh nihbek hih abehteu ana kawihsek ui. Behchate mawhpuokna hih insunga thupha hin thusie hileh vaihawmtu hihna alauhi. Inneite thasanga gending leh thutanna siemte ahiu hi. Insung vaihawmna hih amau khut ahin aum a, minsiet minphat inneite thasanga mawh puote ahiu hi.Thihna ahim vangsietna ahim aum chang inle sakhau sawk masapen ding ahiu a, Luong puonaduma tuom masapen dingte le ahiu hi.

Tucha - Tucha bul/Lien/Pi- (Tucha lienpen ahi)
Tucha- Tucha bul/Lien/Pi- (Tucha liena aneuzaw)
Tucha- Tucha neu.
Tucha- Tucha neu.

Tucha dinghin chanu lamte khel khel lakding tihna aum puoi, ahin guolluiten chuh khat leh nihbek hih nite/Chanute ahim ana kawihsek ui. Tuchate mawhpuokna hih avantang in insunga tawihna ding thingpi awm tuikhaih thingpuok leh sagilzut tihhaw hih ahi deuh hi. Thihna ahim vangsietna ahim chun kipak ninle Tuchate hih behchate nunga ding zing ding leh Luong puonaduma tuom masapen dingte laka khat ahiu hi.

Zawl:- Zawl kiti hih neihtei tei ding vang hin kahe puoi. Ahin Gangte pasal zawl neilo ana umbek puoi. Zawl hih thingnuoi gamzanga kipawl pihtheih chun I khanguolpih lawite ahi deuh ui. Zawl hih khat auma, insungmi khat guola cha leh nauten a et uh ahi. I umlohna a pa dinmun lathei khawp in aki nei hi.

Nulam:-Chanute/Suohpih numeite pasal nei aum tieng uleh, apasal neih niu in anulam ding uh guonggalhsak ahisek hi.Nulam ding hin suohpih kangte aki guot deuh sekhi.

Zie achung a ivakgente haw hih ei uh Gangte ten insung khat ihun siem tieng uleh I neihloh theih-loh uh mawhpuokna iguot/ihawp teu chuh ahi. Amau haw hih mawhpuokna chauh kipie ahi puo a, insung ahin chanvo anei chiet ui.

Insunga mawhpuokna neite chanvo:- Hatzawh ni thah leh mat (gamsa) ineih niu in achanvo u chuh khuti hih ahi.

Behcha lien sachan- Sachan anei puou.
Behcha lien aneuzaw- Sachan anei puou.
Behcha neu- Sachan anei puou.
Behcha neu- Sachan anei puou.

Tucha lien sachan- Sakawng achanglam amei telin.
Tucha lien aneuzaw- Sakawng aveilam amei telloin.
Tucha neu- Sachan anei puou.
Tucha neu- Sachan anei puou.

Zawl- Sa-zaang aveilam achang ui.

Nulam- Chanvo anei puou.

Mo neihni ahim hatzawhni chichuom chuom danghaw ale achung a kigente hih akitit phawt chun mo-cham puon ahim bel ahim aum thei lam lam ana ki piesek ui. Dan guola piek tei tei ding tihvang chuh ahi puoi.

Zawnni/sietni a Insunga mawhpuokna neite chanvo:- Thihna chung ahinle insunga mawhpuokna neiten chanvo anei chilchel ui. Vakgen theih vantang hawchuh vak en hitiu.

Behcha lien sachan- Sa-mal achanglam.
Behcha lien aneuzaw- Sa mal aveilam.
Behcha neu- Sa pheipak achanglam.
Behcha neu- Sa pheipak aveilam.

Tucha lien sachan- Sachan anei puou
Tucha lien aneuzaw- Sachan anei puou
Tucha neu- Sachan anei puou.
Tucha neu- Sachan anei puou

Zawl- Chanvo anei puou.

Nulam- Midang chung ah Chanvo anei puou, ahin amah nulam hihna nu athih nin chuh sa-ik achan ding ahi.

Zawnni chichuom chuom haw ahin achung a kigente hih akitit phawt chun athite mel a muh din puon ahim bel ahim aum thei lam lam ana ki piesek ui. Dan guola piek tei tei ding tihvang chuh ahi puoi.

Ziecheng hih Gangte ten insung khat ihun siem tieng alo theilo a iguot/ isiem ngai panmun haw chuh hin kahei.
Pienken/piendan a umsa insungtawh kikhen theilo khenkhat, etsaknan Sawnggau, Innpi, Ni, Gang, Tu, Nulam pasal lama, Upa khang chiehdan a, tihhaw hih kahun zik puoi. Tu a kazik hih chuh insunga panmun neidinga ei uh Gangte ten isiem tei tei uh ngaihaw chauh ahi.

Adiklo atam kagingchai, aheten hun sudik zelleu maw Pu Editor.

Comment

You must be logged in to post a comment.