“Manipur singtanggam kilkoi tanpha puah tup ahi” -CM
Republic Day lopna ah Governor khuallian in pang
Imphal, January-26: India in zalenna bukim a ngah kum 61 chinna Republic Day tuni zinglam dak 8.00 akipan in Kangla mun ah state-level a lopna om a, huai ah Manipur Governor Gurbachan Jagat khuallian a pang in India flag a kaihpalh banah March Past atel contingeny-te akipan in salute la hi. Huaizawh in Governor in Manipur Police mi 11 kiangah Police Medal for Gallantry pia hi. Zinglam dak 11.00 in 1st M/R Parade Ground ah Chief Minister O. Ibobi in March Past atel contingent-te ma ah kipahthu gen kawmin Manipur singtanggam kilkoi leh singtangdawn(remote & interior areas) a khua omte development scheme tunsuaksak vek ding state govt in tum hi’n gen hi. Helpawl tuamtuam in tuni a Republic Day lopna a boycott ziakun Imphal khawpi ah security khauh petmah hi.
Chief Minister in 1st Manipur Rifles Parade Ground ah tuni a March Past atel contingent-te kianga kipahthu genkawm in a thugenna ah Manipur khantouh adia khantouhna taktak tuntheihna ding in lemna(peace & stability) alou theilou a poimawh hi’n gen a, state dang tawh tehin Manipur tuantual(backward) lai hi’n leng gen hi. Manipur gam nuam leh masawn banah khangtou hithei dingin kuapeuh in panlak ngai a, pankhawm leng poimawh hi’n gen hi.
Tuni’n Kangla mun a Republic Day lopna ah Assam Rifles, BSF, CRPF, IRB, Manipur Police, Home Guard, Excise, ManipurFire Service,NCC, School leh College tuamtuam, NGO, Cultural troupe leh ex-servicemen apan contingent tamtak March Past a pai uhi. Huai ah deptt tuamtuam 11 apan Tableau leng tel hi. March Past result anuai abang hi.

Uniform group(male)
1na -6th IRB
2na -BSF
3na-CRPF
Uniform group(female)
1na- Civil Police
2 na-Home Guard

NCC Group
1na –NCC Senior Girls
2na –NCC Senior Air Wing
3nd –NCC Senior Boys

School Contingents
1na -1st M/R Unit Boys & Girls School
2na- TG Hr Secondary School
3nd –Johnstone Hr Sec School

College Contingents
1na- GP Women College
2na – DM College of Arts
3na –DM College of Science

Band Party
1na- Assam Rifles
2na -2nd Manipur Rifles
3na –Sainik School

Tableau
1na –Health(NRHM)
2na- Manireda
3na- Education-S(SSA)

Gate Construction
1na –Forest
2na-Tribal Dev
3na-RD & PR

Cultural Troupe(Valley)
1na –Geeta Ideal Training Academy,Khangabok
2na-Leishemba Amaiba Amaibi Pena, Haurou
3na-Amayaima Nat Sankritan Dance Academy

Cultural Troupe(Hills)
1na- Lamhil Kuki Cultural Research Centre, Haokip Veng
2na – Tuinem Dance Troupe,Ukhrul
3na – Tousem Youth Club, Tamenglong
3na – Monsang Pantha Youth & Cultural Club,Chandel.
********************************
Public Ground ah Dist Level Republic Day kizang
Lamka, Jan- 26: Tuni zinglam dak 9.00 akipan in Lamka Public Ground ah Republic Day 61-veina kizang a, huai ah Miss Jacintha Lazarus,IAS, DC/CCpur khuallian apang in zinglam dak 9:32 in March Past atel contingent-te inspection bawl a, huai zawh in India flag kaipalh a,March Past apai contingent 27 te apan salute la hi.
DC thugenna in zui a, India zalenna leh suahtakna bukim ngahna dinga panla leh hinna piate ziakin tuni’n nuamtaka hunzat theih ahihdan gen hi. Ccpur disrict adingin tukum Gospel honglut nung kum 100 chinna ahih zawkmah ziakin kipahhuai tungtuan hi’n leng gen hi. DC in a thugen zelna ah Ccpur district in NREGS nasepna ah India pumpi theihpih phak nasemhoih hihna la a, adiakin numei tamtak adia phatuam ahihdan leng gen hi.Electric meivak hoihsem a ngah theihna dingin 33/11-KV sub-Station thak bawlsawm(proposed) ahihdan leh PHED in khawpi sunga tuinek lakna ding 3rd Zone tukum in pat hiding in gen a, bank branch thak leng honkhiak hiding chi’n gen hi.

DC in a thugen khit in Cultural Dance om a, huaizawh in 64th Assam Rifles te’n Band lahna nei uhi. Chief Guest in Stall tuamtuamte enkhia a, huchi’n in Prize leh Award tuamtuam hawmkhiakna om hi. Parade contingent Group ‘A’ ah 1st in Rayburn NCC 1st Platoon, 2nd ah JNV NCC Jr Wing leh 3rd hihna CCpur Govt H/S NCC Jr Boys te’n la uh a, kipahman in Rs.1200/-, Rs.100/- leh Rs.800/- ngah uhi. Group ‘B’ ah 1st in Donbosco Sr Girls, 2nd ah Rengkai Govt H/S boys leh 3rd hihna JNV scout te’n la uh a, kipahman in Rs.1200/-, Rs.100/- leh Rs.800/- piak hi uh a, contingent dangte consolation prize Rs.500/- chiat piak hi uhi. Social Worker 8, Ex-Serviceman 1 leh hausa(Chiefs) 10 kiangah puansan(red blanket) piak hi uh a, Govt employee mi 13 kiangah pahtakna certificate piak hi uhi.Cultural troupe ah Zenhang Lamka YPA; Zou Cultural troupe ; YMA Lamka Branch leh M.Songgel Y/Club te kiang ah kipahman in Rs.2000/ chiat piak in om uh a, IRB Band party leh 64th-AR band party te kiang ah Rs.3000/- tuak, Police leh Ex-Servicemen te kiang ah kipahman in Rs.1000/- tuak piak in om uhi. Stall award ah 1st in ICDS, 2nd in DRDA leh 3rd in PWD te’ hi uh a, kipahman in Rs.2000/; Rs.1500; Rs.1200/- piak in om uhi. Programme zawh sunnung dak 12.30 in DC’ XI team leh Public Leaders’ XI team te football exhibition match kimawl uh a, DC team in 2-0 in zou uh a, Best player hihna T.Tunzalian, EE/Electricity Deptt in la hi.

Khengjang Sub-Station a part kisia
Lamka, Jan- 26: 132/11-KV Khengjang Power Sub-Station a transformer 20 MVA lightning arrester 3 omlak a khat tuni zingsang baihtak dak 1:30 vel a vuahzuklai takin kekkia(lightning) in dengsia a, huaiziakin Khengjang Sub-Station akipan tuni zingsang in electric meivak piakkhiak theih hilou chi’n deptt apan thutut kingah hi. Tuni’n helpawl in General Strike a puan ziakun Imphal apan electricity deptt a mechanic-te hong kuan ngamlou uh a, Jan 27, 2010 in hong kuan pan ding uh chihthu om hi. A siatna bawlzawh ahih masiah electric vaklou ding hi’n kigen hi.

Security-te’n grenade hihpuak
Lamka, Jan- 26: Police leh 140- Bn. BSF patrolling paite’n tuni zingsang dak 7:30 vel in Sielmat Christian Hr.Sec School a kaite omna Girls’ Hostel compound akipan gamlalou ah Hand Grenade khat kikoih mukhia uh a, huai phet in 64th(Naga Hills) Bn Assam Rifles bomb expert-te sam uh a, huaite vadelh pah in mun thouveng ah tuni zinglam dak 8:40 vel in Police, 140-Bn BSF leh 64th AR te’n hihsia(defused) uh chihthu kiza hi. Huai bomb puak ging ngaih mahmah a, mun gamlatak ah leng kiza hi.

IRB-te Bus accident
Lamka, Jan- 26: HQ Veng a om Ist IRB-te’ bus (No. MN-O1/O935) tuni zing dak 7:30 vel in Republic Day lopna a telding parade contingent- te piding a kuan lai 1st IRB Camp khangzek ah brake fail in lampi lai ah kisikpuk a, driver pa akhe liam zek hi’n kigen a, bus pen recovery gari in kaikhe pah thei uhi.

Kina phelh lai liamkha
Lamka, Jan-26: Miss Chongbiekkim (14) d/o Pauneihmang of Bijang Family Lane, zan sunnung dak 2:30 vel in anu(mother) leh a innvengte uh kiselbuailai ava phelh leh a innvengte un Chongbiekkim’ lu ana khenliam kha uh a, tuni’n Dist Hospital ah admit in om hi.

Truck leh Gypsy kiphukha
Lamka, Jan- 26: Senvon khua a Gospel Centenary lawmzou Lamka zuan a hongpai Gypsy khat zan nitaklam dak 3:00 vel in Munlai gamsung ah Shaktiman khat tawh kiphua kha uh a, Gypsy atuang mi 8 lak ah mi 3 liam uhi. Aliamte Sielmat Christian Hospital ah puaklut hi uh a,mi 3te lakah Dr.P Buhril leh azi Zarzomawi ahihleh dressing bawlzawh paisak(discharge) hi uh a, Ms Lalnunmawi (12) d/o Rodinglien of Hmar Veng ahihleh alu liam in aliangguh taklam a kilawi(fructure) ziakin admit in om hi.

Imphal khawpi ah Security khauh
Imphal, Jan-26: Tuni a Republic Day lopna helpawlin a boycott ziakun Imphal khawpi ah security khauh petmah hi. Zan in Minuthong a bomb puak ziakmah in Police leh security kithuah in khawllou in patrolling pai uh a, mun tuamtuam ah checking leh frisking bawl uhi. Huailou in tuni nitak in leng khawpi sung mun poimawhna deuhte ah Security-te duty uh a, buaina a om khak ding venna in kigingsa(alert) kawm in om uhi.

JAC te’n Ceasework strike tawp sawmlou
Imphal, Jan-26: All Manipur Trade Union Council(AMTUC) leh All Manipur Govt Employees Orgn(AMGEO) kigawm Joint Administrative Council(JAC) pawl in govt ah a thilnget uh phutna in January 16,2009 akipan hunchiam omlou dia nasemlou a kiphinna a pat uh lawhchin masiah tawplou ding chi’n puang uhi. JAC pawlin April 1,2010 akipan 6th Pay Commission zat dinga govt in a puan pomlou uh a, January 1,2006 akipan zat ding in phu uhi. Huailouin govt service-te kum 59 a retire leng kum 60 hihsak ding in phu uh a, pay bikhiahdan dikloute bawldik thak ding leh workcharge/casual/muster roll-te a sepna uh regularise din leng sawtpi apan nawh uhi.
State govt in bel employee 60,000 vel omte April 1,2010 akipan 6th pay piak hile uh kum 1 in senna Rs. 726 crore kibehlap ding a, January, 2006 akipan arrear piak hile uh Rs. 2,000 crore bei ding ahihman in huai din govt in sum neilou chi’n CM mahmah in leng gen hi.

Mun tuamtuak ah bomb 2 mukhia
Imphal, Jan-26 : Leimakhong a 57-Mountain Division a army sentry post kiangah tuni in Scooter a kikoih bomb khat muhkhiak hi’n kigen hi. Huai bomb bel army- te’n tuni zingkal a a muhkhiak uh hi a, kg. 5 vel ding in gik a, mobile phone tungtawn a sukpuak dia kikam hidan in army te’n gen uhi.
Tualouin Imphal West Police Commando-te’n tuni mah in Irilbung PS huamsung a om Kyamgeithong mun ah bomb khat mukhia uh a, a bomb tung ah PULF(MI Khan) group chih kigelhin kinusia hi’n gen uhi. Huai bomb nihte police bomb squad te’n lakhia in hihsia(defused) uhi.

Dist HQ leh Sub-divn HQ-te ah leng kizang
Imphal, Jan-26: Republic Day 61 chinna tuni’n Imphal khawpi kia hilouin Thoubal, Bishnupur, Ccpur, Senapati, Ukhrul, Chandel leh Tamenglong District HQ ah leng kizang a, DC chiat khuallian a pangin India flag a kaihpalh ban uah March Past apai contingent-te akipan in leng salute la uhi. Huailouin district tuamtuam a Sub-division mun tamzaw ah leng Republic Day zatna programme om hi’n thutut kingah hi.

Agri deptt asem mi 6 kaisang
Imphal, Jan-26: Agriculture deptt a sem singtangmi 6 kaisang uh chih thusuak om hi. Huaite bel H. Thuamzathang,UDC/AO HQ kaisang in Sr Accountant(pay Rs. 4,500-7,000) ag kaisang a, DAO/Senapati office asem Lamkhokam,LDC leng Jr Accountant(pay Rs. 4,000-6,000)in kaisang hi. Ms Laltanpui tulela Maize Breeder, Mantripukhri a LDC leng UDC(pay Rs. 4000-6,000) in kaisang a, DAO/Ccpur office a Field Asst semtuak Thangtinlun leh Thangzamung leng Fieldman(pay Rs. 3050-3,950) in kaisang tuak uh a, DAO/Senapati office a Fieldman sem Kimboi Guite leng VEW(pay Rs. 3050-3950) in kaisang hi.

News In Pics: Tutkhawl Zaikhiang