ZHRF in Sang-ga Muon Inn veh
Lamka, Jan 25: Zomi Human Rights Foundation (ZHRF) Hqtrs in zan in Bijang a om Sang-ga Muon Inn (orphan home) vehna nei in, naupang-te tawh kithuahkhawmna hun zang uhi. ZHRF Secy General Suanmoi Guite in thugenna hun saulou azatzawh in ZHRF Chairman Siamzading in Sang-ga Muon Inn a Director Nu Lhingnu leh Accountant Nu Hatsie kiang ah panpihna in Rs 1600/- pekhia hi.

Home Director Nu Lhingnu in agenna ah, Kuki Women’s Union, Manipur in Pathian hatna muangkawm in tagah-naupang te kepna ding in hiai orphanage dinkhia uh ahi chi a, gamsung leh gampua apan funding agency bangmah neilou uh ahihdan leh regular income koimah apan aneihlouh ziak un a changchiangin haksatna tuak zeuhzeuh ua, ahihziak in kum 12 vingveng bang Pathian hatna tawh naupang te ann ngawl in om nailou chi hi. ‘Jehova Jireh’ ka hatna uh ahi a, huai mah ka muanpen uh ahi chih beh hi.

Oct 15 1998 in ‘Sang-ga Muon Inn’ dinkhiakin om a, naupangte kemtu home director hi’n warden leh accountant te’n leng lawh (salary) bangmah neilou in iitna ziak tawh naupang te’ nulepa a pang uh ahihdan gen hi. Accountant Nu Hatsie ngial in agenna ah, tu in ka upa mahmah ta a, lawh neilou in naupangte tawh hinkhua ka na zang toutou a, lunglelhna bangmah ka nei naikei, Vangam a lawm man khol ka hihman un tung lam ka etchiang in ka lung akim mahmah a, huai mah in hon hanthawn zel chi hi. 1998 apan Sang-ga Muon Inn ah naupang (nu-le-pa neilou) 100 phial bang kepin om ua, huai lak ah mi 3/4 graduate ta in, tulel in naupang 50 kemlel uhi.

Lamka ah DC/CCpur khuallian in pang ding
Kangla ah State Level Republic Day lop hiding
Imphal, January-25: India in British vaihawmna apan zalenna bukim a ngah Republic Day 61-veina India gamsung mun tuamtuam ah January 26,2010 in kizang ding a,Manipur ah leng state-level a lopna zinglam dak 8.00 akipan in Kangla ah om ding hi. Huai ah Manipur Governor Gurbachan Jagat khuallian a pang in India flag a kaihpalh banah March Past atel contingeny-te akipan in salute la ding a, huaizawh in Award tuamtuam pekhe ding hi. Zinglam dak 11.00 in 1st M/R Parade Ground ah Chief Minister O. Ibobi in March Past atel contingent-te ma ah kipahthu gen ding a, Jan 27,2010 in 1st M/R Parade Ground mah ah Folk Dance Festival leh hunkhakna function om ding hi. Lamka Public Ground ah leng Jan 26,2010 zinglam dak 9.00 in kipan ding a, huai ah Miss Jacintha Lazarus,IAS, DC/CCpur khuallian hiding a,aman India flag a kaihpalh banah March Past apai contingent-te akipan salut la ding hi. Huaizawh a DC in thu agen khit in Cultural Dance leh kipahman tuamtuam hawmkhiakna om ding hi.

State Level a Republic Day lopna ah Governor in India flag a kaihpalh khit in Manipur Rifles Band te’n National Anthem play ding uhi. Award hawmkhiak khit in March Past in zui ding a,huchi’n Chief Guest in Kangla mun nuse ding hi. Jan 27,2010 sunnung dak 1.30 in 1st M/R Parade Ground a Folk Dance Festival leh Beating of Retreat ah lam kidemna(dance competition) om masa ding a, huaikhit in Prize leh Award tuamtuam hawmkhiakna in zui ding hi. Huchi’n Band Display leh Beating of Retreat in zom ding a, Chief Guest a paikhiak tawh kiton in zou ding uhi.

Lamka a program zatna ding ah zinglam dak 9.32 in Chief Guest in Parade inspection bawl masa in huaikhit in National flag kaipalh ding a,March Past in zui ding hi. Huaizawh in thugenna in zui ding a,huaikhit in Cultural Dance leh programme tuamtuam om ding hi.Huchi’n Assam Rifles te’n Band lahna nei ding uh a, huaikhit in Chief Guest in Stall tuamtuamte enkhe ding hi. Huaizawh in Prize leh Award tuamtuam hawmkhiakna om ding a,Social Worker 8, Ex-Serviceman 1 leh hausa(Chiefs) 10 kiangah puansan(red blanket) piak hiding uh a, Govt employee mi 13 kiangah pahtakna certificate piak hiding uhi. Programme zawh sunnung dak 12.30 in DC’ XI team leh Chiefs’ XI team in football exhibition match kimawl ding uhi.

List of Govt employees selected to receive Award of Appreciation Certification on the 26th Jan. 2010 at Public Ground, CCpur.
1. S. Robert Gangte Heads of Deptt.
CCpur Govt. College Political Sc.
2. Dr. Lalzagou Neihsial Heads of Deptt.
CCpur Govt. College Geography
3. Thanghaulian Section Officer
EE/PHED
4. T. Chinzaniang Matron
Medical Supdt. Dist. Hospital
5. Songkhogin Gangte Technician
Medical Supdt. Dist. Hospital Blood Bank Service
6. H. Haukung UDC
DFO (Forest)
7. D. Paokholun AI School
CEO/Dist. Council, CCPur
8. Lunkhothang Baite Peon
BDO, Tuibuong
9. Dongchinthang VLW
BDO, Samulamlan
10. Th. Ibomcha Singh AE-I
EE/NH-Divn. No. V PWD
11. Richar Varte SO
EE/NH-Divn. No. V PWD
12. Chingzasiam Primary Teacher
Phungkhothang H/S
13. Simon Touthang LDC
DC Office/CCpur

R-Day adia kisakkholhna thupi
Lamka, Jan-25: Lamka Public Ground ah Jan 26,2010 a Republic Day lopna ding ah Ms Mannuamching, MCS, SDO/CCpur makaihna in kisakkholhna thupi theipen in om a, tuni sunnung in zou uhi. Autononous Dist Council/Ccpur te’n Police Station kong ah Gate bawl uh a, Public Ground lutna bul ah PWD te’n bawl uhi. Dept tuamtuam te’n activities a neihte uh mipi in a muhtheih ding in lahkhiakna neih sawm uh a, ICDS, IFCD, PHED, PWD, DACO, Dist Leprocy Officer, Sericulture, Agriculture, TB, Social Welfare, Medical Deptt leh Fishery Deptt te’n a nasepte uh mipi’n a muhtheih dingin lakkhia(display) ding uhi.

Awllen-2010 zatna om ding
Lamka, Jan-25: Young Vaiphei Association(YVA) Gen HQ panlakna in Feb 2,2010 zinglam dak 10.30 in New Lamka(G) a Vaiphei Community Centre ah “Awllen-2010” zat hiding a, Chief Guest in Khanthang Tonsing, Social Worker pang ding hi. Huai ah Functional President in P. Kamkholal, President, Vaiphei Peoples Council pang ding a, Guest of Honour in T. Lala,Special Contractor pang ding hi. Huai hun zatna ah lasiamte akipan lasak ngaihkhiakna leh special items tuamtuam leng om ding hi.

MTC Anniversary zang ding uh
Lamka, Jan-25: Manipur Tribals Council(MTC) pawlin a kiphuhkhiak nung uh kum 1 chinna(1st anniversary) January 27,2010 sunnung 12:30 akipan in Tuibuong a DM Veng Community Hall ah zang ding uh a, huai ah MTC kiphuhkhiakna ziak tangpi leh District Council election phutna a nasep tuamtuam omte taklatna leng om ding hi’n thutut kingah hi.

Mi 8 ordinatian piak hi uh
Lamka, Jan- 25: Mission Veng a Lamka Evangelical Lutheran Church ah zan zinglam dak 10:30 in Eastern Evangelical Lutheran Church Special Synod Conference- 2010 om a, huai ah Rev.H.Nengzalam in mi 8 ordination pia hi. Pastor dinga ordination piak a om John L.Hauzel hi a, Ministerial ordination piak a om Ningthouzam Moti leh PH Johseph Muan hi uhi. Deacon dinga ordination piak a omte S.Langkhogin; KB John leh Surrendro Singh hi uh a, Deaconness dia ordination piak Niangzachiin leh Zenman hi uhi. Huai hun ah Rev Goukhenpau Tunglut leh (late) Rev P.K Englian pahtakna memento piak hi uhi.

Security-te patrolling paikual
Lamka, Jan- 25: Lamka Public Ground ah Jan 26, 2010 zinglam dak 9:00 apan in Republic Day lopna om ding ziakin huai programme hihbuai sawm a om khak ding dalna kawm in tuni nitak apan Lamka khawpi sung ah Police, IRB leh Army- te patrolling pai uh a, Public Ground mun ah zan khawvak in security-te duty uh hi’n thusuak kingah hi.

KNO-UKRA akipan suspend puang
Lamka, Jan-25: S.BB. Kom, Secretary(Info & Pub)/KNO-UKRA apan thusuak kimu in a taklatdan in KNO armed wing United Komrem Revolutionary Army(UKRA) High Command/Cabinet thupukna bangin Town Commander Ccpur district L. Lulun Kom @ Rohit Kom in SoO tawh kisaia pawlpi dan a kalh(violate) ziakin Jan 25,2009 akipan suspend hi’n puang a,suspend a koih ahih sungin pawlpi kalhin bangmah thil ah gamtang theilou ding in puankhum a, huai kalh a a gamtat aleh huaini mahin tawpsak(terminate) hidin leng taklang hi.

Thangtual open football tourney kipan
Lamka, Jan 25: Bungmual Village Authority nuai Bungmual Platinum Celebration Committee saina leh CDSA theihpihna in tuni in Bungmual hausa (late) M Thangtual Hauzel memorial open football trophy 2010 kichi kipan a, huai ah Thuamzagin Samte, President CDSA in khuallian hihna tawh uap a, H Thuamkhanmang Chief/Bungmual in Guest of honour hihna len hi. Hiai tournament ah, team tuamtuam 15 pang a, leaque system ahihban ah, quarter final kimawlna Feb 6, 2010 in kipan ding a, Semi final ahihleh Feb 11 in kipan nawn ding a, final hun ding pen Bungmual khua ki satnung kum 75 chin lopni geih in neih hiding a, a hun puankhiak pah hiding chi’n H Mangtungnung Secy, BPCC Tournament Board in gen hi. Hiai kimawlna ah winner in trophy ban ah Rs 10,000 sangding a, Runner in Rs 5,000/- ngahding hi. Opening match ah AFC (A) leh BAPS te kimawl in, 1-1 in ki sialpi puuk uhi.

PDS antang hawmkhia
Lamka, Jan- 25: HQ Veng a FCS Godown ah tuni zinglam apan in Fair Price Shop Agent-te tungtawn in Ccpur A/C a January 2010 quota ding PDS antang quintals 969 leh Sangaikot ading quintals 243 hawmkhia uhi.

Bike in phuliam
Lamka, Jan-25: Kapkim @ Kapi (67) w/o (late) Sangthang of Saikot zan nitaklam dak 5:30 vel in innlam zuana pailai Saikot ah bike in phukha a, alu leh ataklam liang liam in Dist Hospital ah admit in om hi.

MO i/c te’n thousilen laktheih
Lamka, Jan-25: Dr.F.Thienkhogin, DMO kiang ah numei naupai(pregnant women) te laka hawmkhiak ding thousilen bangzahhiam om a, PHC Medical Office i/c te’n laktheih ding hi.

SUUNNA
Tualzalam (59) s/o P.Chinkham of Sim Veng zan zinglam dak 8:00 vel in sungna in si a, sunnung in Simveng hanmual ah kivui hi.

Manipur Governor akipan message
Imphal, Jan-25: Manipur Governor Gurbachan Jagat in India Republic Day 61veina kipahpihna ziakin Manipur mipite deihsakna thuchah(message) puang hi. India in January 26,1950 akipan in zalenna bukim ngah a, huai akipan India in leitung gam tuamtuam in leng lamdang a sak hial uh kong tuamtuam ah lawhchinna thupitak ngah ahihdan puang hi. Muanna leh khantouhna paikawm ahih bangin Manipur in leng field tuamtuam ah masawnna leh khantouhna ngah hi’n Governor in taklang a, maban ah leng panlak ding thupitak omlai hi’n taklang hi.Republic Day zatni tawh kituak in Manipur ah muanna leh lemna banah masawnna leh khantouhna omna dingin kuapeuh in panla chiat dingin leng Governor in hasuan hi.

Dr. Khaizalian training ding
Imphal, Jan 25: Dr. Khaizalian, IFS, Chief Conservator of Forest ninih sung training in Dehradun ah kuan ding hidan in kigen hi. A kigendan in Jan. 28 & 29 sung ‘Training Workshop on Survey & Demarcation of Forest Boundaries using Geomatic’ chih thupi a nei in Dehradun a Forest Survey of India ah training in va kuan ding hi.

Bomb khat mukhia
Imphal, Jan 25: Manipur DGP Y. Joykumar tenna inn Naoremthong Yumnam Leirak inn gei a a dukan kiangah tuni zingkal dak 6:00 vel in bomb khat a nu’n mukhia hi. Hiai tawh kisai in amau leng police ah report ngal ua, police bomb siamte’n vala khia uh chihthu kiza hi.

Bomb puak ah Commando 2 liam
Imphal, Jan 25: Minuthong a Khuman Lampak lutna kianga lampi gei a AR transit camp fencing bul ah tunitak dak 7:25 vel in bomb khat lei a kiphum puakzak a, kintak in Imphal West police Commando-te’n delh ngal ua, bomb puahna muntak a zonglai un a kiang uah khat puakzak nawn hi. Hiai hun in Imphal West Police Commando a tel mi 2, Longjam Samarjit (33) s/o (L) Ngoubi of Haobam Marak Keisham Leikai leh H. Binoy (28) of Oinampok hi ua, kintak a RIMS a puaklut in om uhi. Liamna tuak tegel ahihleh a khe, khut leh mai lak bomb hal neng in dengkha a, serious lawlou uhi.
Hiai tawh kisai in KCP (MC) Lanheiba Group-te amau thilhih hidan in kipuang uhi. Tua tawh kiton in Leimakhong a army gate No. 2 kianga Scooter khat a leng bomb om ahihdan taklang ua, ahihziakin, hiai thugelh ahihtan in a puah lam kitheilou hi.

KYKL (MDF) khat mankhia
Imphal, Jan 25: Thoubal Commando te’n Jan. 23, 2010 ni a Wangjing Heitupokpi lak a helpawl vakvel om chihthu a zak uh tawh kiton in frisking bawl ua, nitak dak 7:30 lak in KYKL (MDF) a tel Self-Style Amarjit @ Debo @ Nongsaba (25) s/o (L) S. Maimu of Wangjing Khodomba Pukhri Achouba Maning Leikai mankhia uhi.

Manipur Gun Agency mei in kang
Imphal, Jan 25: Thangal bazaar a Axis Bank kianga om Manipur Gun Agency dukan tunitak dak 8:15 vel ding in koi a pan hiam chih theihlouh in mei in kang a, Fire Brigade te’n kintak a a delhman ziak un kangse law manlou hidan in kigen hi.

Kuki Idol top 10 result
Slno: Name Address

14. Hoineng Touthang Janglenphai
18. Haoneo Touthang N. Lambulane
44. Shokhopao Molnom, Cdl Dst.
56. MS Lienna Kuki Mollien, S/Hills
62. Mamang Kipgen Haipi S/Hills
68. Jack Jamkholen Lhungdim D. Phailien, CCpur
83. LR Ruata Khohreng Tripura
93. Lamginlien Chongloi L.Munlui
105. Shei Haokip Khengjang CCpur
106. Thangtinlen Haokip Leisan

Orissa tawh kisai ah thuthang diklou om
Bhubaneshwar, Jan 25: Orissa state sung ah kum tamtak paisa apan Christian te gelgawtna leh siampu tamtak mulkimna bei a thah ahihnung in tulai in Mobile SMS tungtawn in Christian te’ thuakdan leh thumpih apoimawh dan uh taklat in om a, hiai tungtang ah Mobile SMS tungtawn a Nam kal buaitheihna ding a na taklang kuate’ hiam om ahi chi’n tuni’n Christian makaite’n taklang uhi.

Orissa state sung ah zan mahmah in Pastor 14 thah in om a, Rev Raikia kial a motor cycle tawh hallup a om ahi chi’n SMS tungtawn in leitung pumpi ah kapzaak in om a, hiai pen thuzuau hidanin taklang ua, Pastor RK Digal ki chi leng thah a om lou ahi chi’n tuni’n Cuttack khawpi pansan a om VL Rema RIM manager leh Pastor Stephen-a te’n taklang uhi. Hibang a thuzuau leng ahi chih Orissa state mah a om Rema leh Stephen ten a theih un mun tuamtuam phakual mah le uh hiai bang thil omlam kuaman theilou ahihdan gen ua, buaina om munna pen a gen a om Kandhamal Dist ngial tulai a thawveng laitak ahi chi’n tunitak in taklang uhi.

Zarzokima sihthu ah mi 1 mannawn
Aizawl, Jan 25: Tangval Zarzokima Bungthuam sihna tawh ksiai in tuni in kigolhkha dia muanmawh mi 1 matnawn in om a, amah ahihleh, MBDPF a General Secretary len lel R.Laldawngliana hidanin gen uhi. Laldawngliana mat a om na tawh kisai n MZP Gen.Hqrs in kipahthu puang in Mizoram government phatthamching mahmah a, tualthat-te kuamah suahtak saklouh mawngmawng ding ahi chi uhi. MBDPF Gen. Secy mat a om tungtang ah tuni in Bru te thangpai mahmah in Naisingpara leh Asapara khua ah kiphinna nei uh hi’n kigen hi.

Manipur a AR major 1 in Ashoka Chakra ngahding
New Delhi, Jan 25: India pumpi a helpawl-te douna kong a mihangsan leh hinna pengam a nasemte’ dia pahtawina sangpen kipesek ‘Ashoka Chakra Award’ kichi Manipur a om Assam Rifles Major khat kiang ah piak in om ding a, hibang pahtawina sangtak pen hun paisate ah Punjab leh Jammu and Kashmir a sepaih officer te’n ngahsek mah le uh tutung in India malsuah bial a state neuchik Manpur a Assam Rifles Major khat in ngahding hi’n official thusuak om hi.

Galdouna a mihangsan India Army te’ kianga piak a om sek ‘gallantry medal’ kichi tuni January 26, 2010 Republic Day lopna hun ah piak hiding a, Manipur pansan a om 39th Assam Rifles a Major D Shree Kumar in Manipur state ah helpawlte douna kong ah ahih fuh mahmah ziak in sepaih vai a pahtawina sangpen ‘Ashoka Chakra Award’ ngahdia telkhiak ahi chi uhi. Delhi apan Official thusuak in tuni a agenna ah, Manipur state ah ‘Operation Hifazat’ kichi Indian army te’n hun bangtanhiam paisa apan nei ua, Army te’ nasepna lawhching mahmah in ‘Ashok Chakra award’ tanpha ngahthei dia chin mi om ahi chi uhi.

Assam Rifles Major khat in a nasep azawhthawh mahmah ban ah intelligence network ah leng lawhching mahmah ahi chi ua, amah mimal panlakna ziak in helpawlte’n a tup le ngim tamtak uh subuching zoulou ahi chi uhi. Major Kumar in ‘Operation Hifazat’ nuai ah nna sem in amah hun (2009) sung in Manipur ah helpawl (terrorists chih a om) 12 thah in om a, 23 te hingmat in om chi uhi. Major Mohit Sharma of 1st Para (Special Forces) leh Havildar Rajesh Kumar of 11 Rajputana Rifles te kiang ah leng Ashok Chakra award piak in om tuak ding uh chi uhi.

Dr. Rini Ralte in Manipur leh Myanmar thu Minister kiang ah tun
Bangalore, Jan 25: Union Law and Justice Minister Veerappa Moily in Karnataka khawpi Bangalore a India malsuah bial mite’ tenna inn khat pha a, inn neitu’n leng hibang thil hamphatna ala in mipite’ poimawh mahmah memorandum khat ana pelut geih chih thu kiza hi. Manipur a AFSPA kintak a lakkhiak ding thu leh Myanmar gamsung a sepaih vaihawmna om gige pen mipi vaihawmna tunding na ding in Minister pa’ kiang ah ngen hi.

Union Minister Moily in hihding tuamtuam nei in zanhal Bangalore vapha a, mun tuamtuam aphak nung in Civil society summmit uap ding in pai hi. Huchih lai in Bangalore khawpi a United Theological College a Associate Professor sem Dr. Lalrinawmi @ Rini Ralte tenna inn leng va pha in Rini Ralte in India malsuah bialte’n tu-le-tu a ka mamawh uh chi’n ngetna point 2 pia chi uhi.

Rini in Union Minister kiang ah AFSPA (Armed Forces Special Power Act) kichi Manipur leitang apan kintak a lakkhiak ding ahi chi a, AFSPA omsung teng Manipur ah lemna leh muanna om ngeilou ding chi’n leng taklang hi. Irom Sharmila in AFSPA lakkhiakna ding in pan naktak in la ta chi hi. Burma gamsung ah mipite’ vaihawmna om theihna ding in Indian government panlakna pen hun tawklou a, huai ziak in maban ah kal thupisem hon suanlai uhen chi’n Dr Rini in ngetna bawl hi. Dr. Lalrinawmi @ Rini Ralte ahihleh, United Theological College, Women’s Studies Department, Bangalore a Associate Professor semlel ahi hi.