Miss Kut-2009 in Lamka hongpha
Lamka, Nov.-3 : Miss Kut -2009 Miss Nicky Chongneithem tuni in Lamka hongpha in Lanva a vualphaloute kepna Samarth Centre banah Chiengkon a tanaute kiang leh Tuibuong a Sanggah Muon Inn pha hi. Aman Lanva a vualphaloute kepna Samarth Centre a phakna ah naupang omte chikhum leh nektheih tuamtuam pia a, panpihna ding in Supervisor-cum- Warden kiangah Rs. 5,000 pia hi. Hiai Samarth bel Ministry of Social Justice & Empowerment nuai a Ministry of National Trust-te panpihna tungtawn in kum 2006 a patkhiak hi a, tulel in naupang vualphalou leh mi phalou 25 a kem uh a, huaite thil tuamtuam sinsak uh a, a mun a omlou mi 40 val leng class ah vatel zel uh hidan in Warden D. Kamlianmang in gen hi. Samarth te’n Miss Kut Nicky Chongneithem kipahpih latsakna in Thangsuah puandum silhsak uhi. Tua zawh in Miss KUT in Chiengkon a atanaute kiang phazual a, huai zawh in Tuibuong a tagah kepna Sanggah Muon Inn leng pha a, panpihna in Rs. 6,000 pia hi.

Miss Kut-2009 hihna la Miss Chongneithem bel Dilu Gangte leh azi Veikhokim adia tanu neihsun hi a, tulelin Guwahati a Shriman Shankar Academy(SSC) ah Class XII sin hi. Anu’n SAI, Guwahati ah Basketball Coach hi a, amau bel Imphal Old Lambulane a teng hi uhi.

Buonga’s Archieves hongkhia
Lamka, Nov- 3: Pathian’ mizat leh laphuak siam (late) Buonglienkung theihgigena ding in Blessed Choir-te’n Muaolvaiphei khua ah Buonglienkung in Pathian na a seplaia a vanzat tuamtuamte kepbitna ding a bawl uh “Buonga’s Archieves” kichi tuni zinglam dak 11:00 in P.C Lawmkunga, IAS, Principal Secretary; Govt of Manipur in hong a, Rev.Dr.J.L Songate, Executive Secy ICI in Pathian kiang ah thumna in lan hi.

P.C Lawmkung in a genna ah Buonglienkung eite’n i ngaina ua, amah bang a Pathian nungzui leh azat hihchiat sawm poimawh chih gen hi. Buonglienkung sikhin mahleh adamlai a Pathian la a phuahte hing gige ding ahihdan leh ana sepkhiakte om den ding hi’n gen hi. Blessed Choir-te’n Audio Album abawl uh “Kan ngai em che” kichi C.Lalrosanga, Dy Director General , AIR/DDK NE Region in hongkhia hi. Buonga’ Archieves bawlna ah nitha 735 lut in Rs.2,04,280 bei hi’n kigen a, Blessed Choir te’n 28 vei Market bawl in sum kaikhawm uhi. Buonglienkung in adamlai in Pathian phatna la 200 val phuak hi. Amah Nov.3, 2008 in Muolvaiphei hanmual ah ittu leh ngainatu tamtak te’n ana vuiliam hi.

Nov 5 in court ah kilang nawn ding uh
Lamka, Nov- 3: United Bank of India/CCpur Branch ah Oct 3,7 & 14, 2009 a signature diklou zang a MOBC nuai a MSDP 2009-2010 fund Rs.4.54 crore lakkhiat tawh kisai in UBI/ CCpur Branch a Dy Manager Pumkhogin Guite, Head Cashier Benjamin leh Chaoba Singh, Officer ni 14 sung Police custody ah a omnung un tuni’n CJM/ CCpur court ah ding uhi. Sum mang thu a investigation officer N.Mani Mohan Singh, MCS Addl SP/CCpur in CJM ma ah document kimtak a puakkhiak theihlouh ziak in JMC in maban sawn theilou hi’n thusuak kingah hi. Police te’n UBI/CCpur Branch staff 3 te tuni nitaklam in Imphal ah pawsuk nawn uh a, Nov 5, 2009 in CJM ma ah kilang(produced) hinawn ding uh hi’n thusuak kingah hi.

Ngal tawh kisual uh
Lamka, Nov- 3: Lalsang (60) h/o Thliri of Parbung gamlak a lou giaklai Oct 27, 2009 zingsang dak 7:00 vel in alou uah ngal(wild boar) valut a, aman leng thau in kapliam hi. Huainung in Lalsang in gamlak ah huai ngal a kapliam nungzuih a, a kiginlouh laitakin ngal in ana bawh in kisualpih hi’n Lalsang in gen hi.Ngal in a veilam tansa hihliam a,hileleng Lalsang in a thau tawi in huai ngalkhat tuk 7 alian kaplum thei hi. Lalsang bel tuni’n Dist Hospital ah admit in om hi.

DC office ah meeting kizom in om
Lamka, Nov- 3: DC/CCpur office a BRGF Hall ah tuni zinglam in DC/CCpur makaih in DLCC meeting om a, huai ah SDO/BDO leh Dist Level Officer-te tel uhi.Huai ah NIC Deptt ten Power point present in amau Deptt sung a activities tuamtuam report pia uhi. DLO teng in amau Deptt paidan leh nasepkhiakte Head of Deptt ah report bawl a, copy leng DC/ CCpur a piakzel ding in thupuk uhi. National Cleanliness Day ni’n CCpur Govt College te’n amau compound sung ahahsiang louh ziak un hahsiang ding in DC in theisak a, Nov. 20, 2009 in DLCC review meeting om nawn ding a, huai ah Dist Council leh Electric Deptt te’n power point present bawl ding chihthu om hi. DLCC meeting zawh in ex-gratia tungtang Dist Level Screening- cum- Co-ordination Committee meeting om a, huai ah ex-gratia case 10 om lak ah case 5 approved bawl uh hi’n thusuak kingah hi.

Kha 1 sungin gari 66 kibehlap
Lamka, Nov- 3: District Transport Office(DTO)/CCpur a chiamtehna record dungzui in Oct. 2009 sung in CCpur district ah gari omzah 66 in kibehlap a, huaite DTO ah registration kibawl hi’n thutut kingah hi. Huaite lakah Truck 5, Bus 2, Jeep 4, Car 3, Auto Rickshaw 5, Motorcycle(bike) 16, Scooter 3, Honda Activa 29 leh Tractor 1 hi’n kigen hi. Huailouin DTO office asem MV staff te’n Oct. 2009 khasung in revenue Rs.2,16,046/- mukhia uh a, April-Oct. 2009 sungin revenue a muhkhiak uh kigawm Rs.23,15,545/- pha hi’n gen uhi.

Damdawi tamtak pia
Lamka, Nov- 3: District Immunisation Office nuai a National Child Survival & Safe Motherhood Program nuai ah Oct. 2009 khasung in damdawi tamtak pia ahihbanah tamtak kap(vaccinated) uhi. TT in nupi gailai(pregnant) 246 kap uh a, naupang kum 1 nuailamte 425 vel T.B dalna(BCG) damdawi in kap uh a, polio damdoi leng naupang 1418 dawnsak uhi. Naupang 1418 khuhhip dalna(DTP) damdawi kap uh a, sensi dalna(measles) damdawi in naupang 257 kap uh a, mi hunkhawp Vitamin A dawnsak uh chihthu om hi.Huailou in typhoid damdawi leng chiklai peuh in kikap saktheih ding a, mi 5 tan kikapna ding leng DIO ah laktheih ding hi.

Physically handicapped-te adin 3% reservation bikhiah
Cabinet in Education deptt a semding lakbeh lemsa
Imphal, November-3: Chief Minister Secretariat a Cabinet Hall ah tunitak dak 5:30 akipan in nitak dak 7:00 tan vel Chief Minister O. Ibobi makaihna in Cabinet Meeting om a, huai ah thu poimawh tuamtuam genkhawm in thupukna leng bawl uh chih thutut kingah hi. Huaite lakah Education department adia Primaty Teacher lakna dia DPC pailel ah kum 2007 vel apan education deptt a pension-te mun awng luahtu ding in Resultant Vacancy dan in post 145 luahtu ding lakbeh lemsa uh a,tua ding in General 90, ST-42 leh SC-3, Hindi Graduate Teacher adingin General-7 leh ST-3 lakbeh ding lemsa uhi. Huailouin physically handicapped-te adingin 3% reservation leng zat hiding in Cabinet in thupukna bawl uh chihthu om hi.
Physically handicapped person-te’n govt service ah amau adia 3% reservation a phut uh Cabinet in leng 3% piak dia lem asak ziakin huai zat pah ahih theihna ding in Manipur Gazzette a suahkhiak ding in lemsa hi. Manipur Gazzette a suahkhiak ahih zawh phet chiang in physically handicapped-te a ding in 3% reservation piak hingal ding chih ahi. Huailouin Jail department ah leng Warden ding 14 lakthak ding in tuni nitaka Cabinet meeting ah thupukna bawl uh chihthu kiza hi.

Private School palaite’n CM kimuhpih uh
Imphal, Nov-3: Manipur phaijang bial a Class boycott thu ah Private School tuamtuam kigawm apan palai pawlkhat in tuni’n Chief Minister O. Ibobi kimuhpih uh a, huai ah Education Minister L. Jatentakumar leh Education deptt official-te leng tel uhi. “All Manipur Recognised Private School Co-ordination Committee on Revocation of Indefinite Class boycott” pawlin tuni a Press Release a suahkhiak uah Apunba Lup leh govt kihoulem kin theihna din panlak uh ahihdan taklang kawm in college/school ah akinlama class patnawn lam-et thu leng puang uhi. Private School-te haksatna etzui hidingin CM in gen a, Co-ordination Committee-te’n ngeina banga class akinthei lama patnawn ahih theihna din CM ah memorandum leng pia uhi. A ngetna uh Nov 7 tana pichinsak ahih kei aleh recognition certificate teng govt ah pekhe ding uh hi’n leng puang uhi. Alehlam ah AMSU,MSF leh KSA pawlin mipi deihna bangin Apunba Lup leh govt kihouna ah tel mahle uh duhthusam bang kilemna om dia gintak a haksat ziakin kiphinna khauhsem din panlak lai hidin taklang uhi.

Bomb puak ziakin mi 5 liam
Imphal,Nov.-3 : Airport lampi in a totkhak Thouda Bhavok Leikai a om a Sangai Express leh Matamgi Yakairol office apan metre 50 vel ding a gamla ah tuni nitak dak 5:00 vel in lamlian lai ah bomb hattak puakzak a, huaimun pan gamlalou a om mi 5 liam uh a, aliamte lakah Yaikairol staff 1 leng tel hi. Agriculture dept. a AAO sem Konjengbam Shetaljit (53) s/o Selungbam of Sangaiprou Mamang Leikai huaihun laitakin office apan innlam zuan a Maruti Car (No. MN 1A 0101) a tailai leng liam kha a, a gari glass nunglam teng kisia hi. Aliam midangte bel Konthoujam Kumar (47) s/o (L) Ibobi of Laiyenjam Makha Leikai; Arangbam Ibobi (55) s/o (L) Ibotombi of Elangbam Leikai; Soram Dilip (47) s/o S. Ghulab of Takkhel Leikai, Sega Road leh Thokchom Binoy(40) of Loklaubung hi uhi.Thokchom Binoy ahihleh Matamgi Yakairol a staff hi’ kigen hi. Amaute lakah mi 4 te RIMS a puaklut in om uh a, mikhat ahihleh Shija Hospital a puaklut in om hi. Aliamte a gimselua bel omlou uh hi’n kigen hi.

Imphal West district pumpi ah 144 Cr PC
Imphal, Nov.-3 : Imphal West district sung ah lemna leh muanna dinmun hihsiat sawm banah mihing hinna leh thil(property) adia leng siatna tunthei dinga gamtat saw mom hi a gintak thu police apan thusuak ngah dungzui in tuni nitak dak 6:00 akipan hunchiam omlou in Imphal West district pumpi ah 144 Cr PC koih ahihthu District Magistrate/Imphal West in puang hi. Huai dungzui in mun 1 ah mi 5 sanga tamzawm omkhawm phallouh ahih banah hiamhei leh galvan tawikhiak phalk hilou a,hileleng law & order enzui Police leh security force-te bel huaiin huamkhalou ding chi’n District Magistrate in taklang uhi.

Security zangin electric kaikhawm ding
Imphal, Nov-3: Imphal Electrical Division No. 1 nuaia Central Sub-division No. 1 & Sub-division No. II area a electric consumer-te apan electric fee kaihkhawm leh fee ba teiteite’ meivak lakna hihtansak(disconnect) tunung sawtlou in kipan ding chihthu om hi. Huai Division a Executive Engineer in thusuah a bawl dungzui in drive bawl hun ah Police leh Security Force akul leh poimawh dandan in zat hiding chi’n leng gen hi.

Education Minister in website thak hong
Imphal, Nov-3: Education department tawh kisai thil omdan mipi kuapeuh in leng ahi bangbanga a theihna ding uh tupna in Education Minister L. Jayentakumar in tuni’n website thak hong hi. Education Minister in tuni’n Manipur Secretariat ah Education deptt adia website thak www.manipureducation.gov.in a hon hunah a gendan in huai website tungtawn in mipi in education tungtang bukim takin thei ding uh a, education nasep khenkhat gingtaloute adingin leng thutak theihna hoihtak ahih ding banah education deptt in bang thiltup nei hiam, bangbang semkhia hiam chih mipi kuapeuh in baihlam takin theithei ding uh chi’n Minister in gen hi.

Ration card dik leh diklou chet hiding
Imphal, Nov-3: Senapati district sunga Kangpokpi, Saitu leh Saikul Sub-division sunga innkuan(house-hold) omte ah BPL/AAY ration card dik leh diklou et-thakna leh suichetna om ding a, ration bawltom leh a dikloute hihbeina hoihtak leng hiding in tu November 2009 sungin nasep kipan ding a, thil omdan govt ah report piak hiding chihthu om hi. ADC/Kangpokpi in thusuah a bawl dan in huchibang panlak ah khaw tuamtuam a hausa(village chiefs), Village authorities leh MDC te’n leng kithuahpih ding uh chi’n puang hi.

EDITORIAL:

Sharmila leh Government

Leitung khangthu adia ann ngawl sawtpen hidia gintak Irom Sharmila in ann aneklouh/ngolh nung kum 9 chingta a, mihing ngaihtuahna ah thil maktak suakthei mawk hi.
Imphal West district huamsunga om Malom ah 2000 kum in security force te’n mi nautang kiphinna neite’ lak ah thaukap in mi 10 kaplum ua, huai hun apan in Irom Sharmila in ann ngawl panngal hi. Sharmila in a tup pipen ahihleh, Manipur leitang apan Armed Forces Special Power Act (AFSPA) lakkhiak ding ana phu hi. November 2, 2000 apan ann ngawl a pat pen tuni chiang in, kum 9 bang phata a, chidam meltak a putpen thil lamdangpi suak hi.
Manipur mipi adiak in phaizangmite’n numei hangsan chi a chiamteh kawm in ngaisang mahmah ua, ‘Iron Lady’ chih tanpha ana khusak uhi. Mipite’ ading in Iron Lady himahleh, government leh security force lamte’ ading in Iron ana hi khollou maithei hi. Kum 9 vingveng ann ngawl in, Delhi leh mun tuamtuam ah puaktung ahihnung in Sharmila in nuakna nei a ann angawlpen sunzom veve a, Armed Forces Special Powers Act (AFSPA) lakkhiak hituanlou hi.
Sharmila in kum 9 ann angolh sung in Lok Sabha election bang 2 vei om man hial a, Manipur Assembly election ngial 3 vei om kha zezen hi. 2000 kum in Assembly election ana om a, ministry hong puuksia in, 2002 kum in mid-term election neih in om nawn a, 2007 kum in neih in om nawn hi. Hiai hun sung in political party tuamtuam te’n Manipur apan AFSPA 1957 lakkhiak ding chih naktak in kikou pih ua, Sharmila hinna hutkhiak ding chih leh manifesto tuamtuam nei uhi. Election hong bei a, result hong kipuang a, himahleh, Manipur leitang apan AFSPA lakkhiak malak salak ah a hun suk sau beh in hong om toutou a, AFSPA leng khauhsem sem hong bang hi. AFSPA 1957 lou leng, Union Home Ministry in National Security Act (NSA) kichi khawng hon impose khum in, hiai Act nuai ah kolhtang tamtak om hi.
Sharmila in November 2, 2000 kum in ann ngawl ana pan mah leh, mipi’n November 4 2000 in theikhe pan ua, Meirapaibi leh civil society tuamtuam in gupthu puang kheukhou in lampi nawl a nuakna aneihna mun ah va tut pih sek mah le uh amah tuk a chitak leh ginom a ann ngawlsuak zou omlou adiam chih theih in om hi. Police te’n pikhia in jail tanpha ah koih mah le uh aman ann kichi himhim valh utlou a, atawp in a tha hong chauh luat tak in JN Hospital a security ward ah admit in om a, kum 3/4 bang ann hon ngolh khit chiang in leitung pumpi ah Sharmila tungtang puankhiak in ana om a, press/media te’n bildawh mahmah hi.
Tuni in kum 9 sung vingveng ann ngawl a nuakna nei Sharmila tungthu apan sinlai tamtak om thei ding in kilang hi. Government in angaihsak louh vanglak ek nutsiat a nusia utawh kibang hi. Tulel in Manipur phaizang bial ah kha 2 bang siamsinna inn te kikhak dinmun hita a, ahihziak in state govt leng apanna ah tolhtuanlou bang hi. Akhen chiang in Manipur ah kiphinna leh nuakna nei a bandh/strike leh adangdang i bawlte uh kanna lawlou adiam chih theih hut tam mahmah a, mipite kigawt lel i bat ton uh tam mahmah hi. Tulel dinmun a bat leh Sharmila in kum 100 ann ngawl leleng Manipur apan AFSPA lakkhiak hiding in ginhuai mahmah lou a, khauhsem sem leng bang zawsop hi.
AFSPA ziak in security te huhamtak a gamtangthei uh hi’n kilang a, army te gentaklouh Police commando te tanpha in power liantak tawi in civilian te’n leng thuakkha mun mahmah a, Pressmen te tanpha hawi in om tuanlou uhi. AFSPA pen lakkhiak bang hi zenzen ta leh, helpawlte’ gamtatna hiai sang in ana sazaw tuandia hia chih theih in om a, AFSPA lakkhiak taktak ahihtheihna ding in government tung ah kingak theihlouh a, civil society te’n helpawl makaite houpih in, buaina kha 2/3 tan beek bawlkei unla, lemna leh muanna i tunding dia tuazawh chiang in AFSPA lakkhiakna ding in pan konla ding uh chi’n thuzawh sawm le uh AFSPA pen lakkhiak abaihlam zawlai diam chih theih ding in om hi.