(Chanchinpha Zieka (thagau leh taksa) a Lamdanna)
(Rom. 12:2b)
S Jamminthang Gangte
Thumapui:
Amasan thihna thimnuoi apat a hinna va’k hawihtak ei salhvak saka, kum zakhat tieng A chanchinpha a ei mapuihtu Lalpa Pathien min chuh pahchak in um hen.
Gangte nam hih I vak et chun, sakhuo mi lo tak nam I na hiu a, I ho uh pathien nasan le sawisa a that ngam guo namte I na hiu ui. Ahinla lungthim ana nei hamham nam I na hih na zal un I ho uh pathien (uphawk leh adg dg.) chuh suk lungdamna ding in gancha a kithawi in hinkhuo I na mang sek ui. Zie tawbanga pathien (thilsiem)chuh ho I hih zing lai un, Van Pathien I hetphak leh Amah I ngaihtuoh pha’k uleh I ho ziek uh hilo in Pathien in Khawvel (Gangtete) ahehpih bek ziek in, A chapa changkhat nei sunsun ei hun sawl sak tau hi. Zie Pathien lungsietna thuchah chuh Thagau Thiengtho puih huoina zal in 1912 kumtawp lam a chun, Evan Thangvang leh Evan Damsuok in Saichang khuo (Gangte Biel) ah ahung puo lut tau hi. Zie a ki pat chun Gangte khuo khen khatkhat ah Chanchinpha meisel chuh ahung vak dawk panpan ta a chun achieh zawm zing tai.
Chanchinpha deihum tak mai chun I namsung ei nusieh kit ta lo in, Pathien lungsietna’n ei chen pih zing ta a, – Gangte nam mite (alien – aneu) cheng in zie hinna thuchah chuh I he vek tau a, tichun kum zakhat titna chanchinpha chuh alawpna leh chanchinpha ei pietu Pathien lopina ding ah Centenary ti’n I mat guo tau hi. Zie a Centenary I mat guot nau ahin thupi hawihtak I namsung siempha thei ding “Gospel For Transformation” (Chanchinpha zieka (thagau leh taksa) a Lamdanna) hih lawiupate’n mat ding in ahun taklang tau hi.Zie thupi mang hin theihtawp suoh in kim lo pumpum hilele ana sutkhawm hi tiu.
Gospel For Transformation banga?
Gospel For Transformation kiti hih sapte pau ahi a, ei Gangtete pau a lehdawk ding hi leh Chanchinpha Zieka Lamdanna tih ding hina. Vak het beh deuh ding a deih um khat chuh “Transformation” thumal tawh kinaih mahmah chuh “Transfiguration” ahi kit hi. Zie a Transfiguration thumal kimat na hih Lalpa Isu mel lamdanna tang a aum khah ahi kit zel hi. Zie chuh ahih zing lai in lamdanna kiti hih bang ahi die? Lamdanna kiti hih abaihlam pen a gen ding hileu hing “amasa tawh kibanglo” neu khat chauh a lamdang le hi lo, “ apumpi a lamdang” tih mai ding hina. Ei uh Gangtete le kithawihna muola chieh te khah Ho-In ah I chieh zaw tau a, thilsiemte haw ho sek te khan A siemtu I ho zaw tau a, zu leh sa ne kawma lawmla sa a, la’mla’m te khan Pathien la I sa tau hi. Khutichuh ahih chun, Centenary I mat guot nau ahin bang a I nam in LAMDANNA I tup beh uh? Thagau leh taksa a I lamdan uh (Pathien Thagau I neih uh taksa a suklat zing ding) apawihmawh tak zet hi tih ei muh dawk sak hi.. A nuoi a Bible chang apat hin lamdanna ding neukhat ana en hi tiu.
1. Kithawihna hing (living sacrifice) Rom 12:1: Sawlchak Paul in Rome mite kawma ana phu’t chuh kithawihna lat ding hih ahi. Zie a kithawihna kiti hih Thuthun Lui a kithawihna tawh aki bang puoi. Vak het ding a deih um chuh Rome 11 na I et chun, Pathien in Amite alungsietna zieka hukdamna athawn a apiek thu aki mu a, bung 12 na I et kit chun Amite’n Pathien a piek kit ding uh thu aki mu kit hi. Bangziek a Pathien hih piekthuk ding ahim? Gitloh ngaihdamna, Pathien tawh kihocham kitna, thiemchanna, leh kumkhuo a hinna ei piek ziek ahi.Zie haw hih ahih zing lai in Sawlchak Paul in Pathien kawma kithawi zing ding in Rome mite/ei uh ei phu’t zing hi. Bang ti a kithawi ding I hi ding um? Zie a kithawihna kiti hih I na gen guol un Thuthun Lui a kithawihna tawh aki bang puoi.
Thuthun Lui lam akhan Israelte khah gancha ah ana kithawi sek u a, Pathien in gancha dem um lo a a kithawih uchun a na pawmpih sek hi. Ahinla zie a kithawihna khah ahing zing puoh a, kumcheng leh athak/renew angai zel hi. Zie a kithawihna da’n deuh in Gangte te le gancha ah Ina ki thawi sek ua, I pathien uh suklungdam na ding theih tawp I na suoh sek ui. Zie chuh ana hih zing lai in, Lalpa Isu Khawvel (Gangte te) alungsiet be’k ziek in khawvel ah ahung a, kithawihna hing ei hung pie a, chun ei hung siem saka, tu a A Sapchuom ten kitawihna hing I lat zing theih na ding un ahi.
Thuthun Thak khang ah I hung lut tau a Pathien in A Sapchuomte a puihdan leh a phu’t haw ahung zat chuom kit tai. Zie chuh ahih tak ziek in Sapchuom ka hi ti ngala, chun Thuthun Thak khanga um ka hi ti zel ngala, Thuthun Lui a umte banga I um nau tamtak ana um zel sek hi. Etsaknan: Tulai a hung kithang thak kit khat chuh Maicham tih hih ahi. Maicham bawlten gan I that sek ua, agancha chule vawk deihloh in bawng khelkhel I na deih chuom sek ui. Gancha a Maicham siem I hih u chun Isu Kross a ahung thih man phachuom sa nai lo tawbang I hiu hi. Maicham siem hi lo in Pathien kawma kipahthu genna program ahih zawk a deih um hi. Gancha chuh ahung khawmte ngaihnat na ankuong kium pih tawbang a hi a, vawk leh bawng khen chuom angai khelkhel ta puoi.(I Pathien ho dan u hile suklamdang ding huntieng aum nalai hi tih ei muhdawk sak hi).
Chanchinpha zieka Lamdanna chuh amasa tawh kibang talo ding tihna ahi tih he zing pum in, Pathien in Thuthun Thak mite/Sapchuom te bawl ding a adeih pen chuh TAKSA a kithawih ding tih hih ahi. Zie a kithawih ding tih hin meia vaki ha’l leh va ki em ding tih na ahi puoi. Nichenga Pathien deih dan (gin umna, thu awihna, lunggil kisik) a um na leh Ana sepna hih ahi. Mi tamtak in mahni taksa latdawk sang in mahni thuomphuo, van, gancha, sum leh pai leh adg dg la’ndawka kithawihna hing guol a ngai tam pi aki um sek hi. Pathien in mahni taksa ngei a phu’t na ziek chuh A thisan a ei chawkdawk uh ahih tak ziek ahi. (1Kor.6:19). Taksa a kithawihna la’n zingte chun aneih a go haw ale Pathien apakcha sek hi. Mahni taksa kipiek dawkna um lo hiel a, thuomphuo, neih leh go chauh a Pathien ho chuh Sawlchak Paul in atangsap pih chanchinpha’n apawmpih puoh a, abukim zo puoi. I neih, I go chauh a Pathien ho kha I na hih kha’k uchun Lalpa Isu’n lawmman (reward) ahawp nileh eimah tel lo in (meidil a pat in) I va ki sa’n/la’k theih na ding um tih ei ngaihtuoh sak mahmah hi.
2. Kithawihna thiengtho (holy sacrifice) Rom 12:1: Kithawihna hing chauh hi lo in athienthoh zing ding le ahi. Thienthoh I tih hin Pathien a ding chauh a kikawih chuom (set apart) tih na ahi. Thuthun Lui hun a kithawihna bawlten gancha dem um lo, ahawih thei chin amat bang ua, demna bei (khawvel leh asunga um cheng tawh ki guolcha lo) ding ahi. Israel ten gancha dem um a kithawihna a bawl ua Pathien in ana ho diek u khah het zing ding ahi (Malaki 1:8).
3. Lungthim a thaka um in (renewing our mind) Rom 12:2: Pathien in A thisan a ei chawkdawk sa I hi tau a, I taksa A mah I piek u chauh hi lo in I lungthim ule “athak” I piek uh ei phu’t hi. Zie lungthim I neih uhin deihtelna tamtak ei neih sak a, lungthim thuoh (double) bei (thiengtho) a A mah I ho ding uh Bible in ei phu’t hi. Lungthim thuoh neite (Pathien aleh leh khawvel thilte pawlhkhawm) Pathien in a pawmpih puoi tih het zing ding ahi (Matt.6:24; 1Kor 10:21).
a). Zie vannuoi da’n (pharisaite guol a alim thawh maimai, Pathien ginglote) guola um ding in ei phatsak puoi. Khawvel leh asunga umte (mit utchakna, kiletsakna leh
lopina haw) hin I lungthim u hih ei thuzawh (convince) zaw lo a, ei gingtute hin khawvel leh asung a thil umte haw hih Pathien thil hih theihna manga I thutzawh ding uh apawimawh hi. Thagau puih huoina nuoia khawsa a, chunglam thil haw thi’l zing ding a I um uh Bible in ei deih sak mah mah hi.
b). Lamdang dinga (tu masang a guola um ta lo ding ah) phu’t I hiu ui. Mel lamdanna tanga Lalpa Isu mel ahung lamdan a Peter, Jakob leh Johan te lungthim a hung lamdan a (tumasanga a lunggel uh gel ta lo) nawp asak guol ua lamdana hinkhuo I mat uh a pawimawh hi. Zie tanga lamdanna a um guol a I lungthim uh a thak a aum chun CENTENARY I mat u hih lawhting tei ding ahi. (Thil lui chengcheng chuh abei ta a; ngaitiemu ahung thak kit tai).
Thutawpna:
Simtute haw, kumza (Centenary) I mat guot nau ahin duhthusam tamtak na lungthim a hung piendawk ding ka taksang hi. A hawi abang chuh hileh LUNGTHIM A LAMDANNA hih thil pawimawh pena I neih ding uh deih aum diek hi. Lungthim a kithen na um taktak lo chuh Lalpa Isu’n alim thawh maimai (pharisai) ana tih haw khah ahi. Centenary I mat nau pat a hin, unau kituok dieldiela umkhawm hih apha’n anuom na mai zen e ti a lamdanna hinkhuo mang pan ta dinga lungthim I ngaihtuoh chiet ding uh a deih um mahmah hi. Lamdanna hinkhuo mang lo a Centenary a hung kichaih mai ding chuh Gospel For Transformation in ei phal puou hi.
Lamdanna hinkhuo I hung mat na ding u ahin nang leh kei (mimal) in mawhpuok na I nei chiet ui. Nangziekah Centenary a pat in nampi hinkhuo, taksalam leh thagaulam a lamdanna ahung umdawk ding I ki nem zing hi.
Simtute cheng leh asimlo nam mipite cheng Lalpa Pathien in lunggil a thaka umchiet thei ding in A Thagau Thiengtho thil hih theihna’n ei sulamdang chiet ta hen.
