Christmas Cheng Leh

By Sata Neihsiel

Kumdang guol in nileh tha, hun leh kum te hung muolliem zel in zatam kinepna awllen tha hungsuok in thingtang pa’n nipi leh chuknuoi a asep dibang hun semzou in phaigam leh thing tang gam cheng ale chavang awllen hun chu ahung kipankit ta a, tichun mi zatam in Christmas leh Kumhei nading ngaklah takleh ki thalawp takmai in kisak lawkna hun chuh ahun mangpan kit tau hi.

Tu kum chu Christmas bangti mat di ahita die aw ti a kaki ngaihtuoh zing lai in, kumdang guol in ka Lawipa thingtang lama cheng khaw hausa khat in Christmas mangkhawm dingin hah chiel in eihun chiel kit ta a, kum sawm (10) lam hiel kimang khawm ta lo ahih ziekin kenle tukum chu vamat khawm pih maiding ahim ti in kalung kagel pan ta a ahinlah thil chiehsa haw kagel dawk tiengleh kalunggel ahaksa mahmah maisek a, ka umdidan kahe theisek puoi. Christmas cheng leh lungthim nuomlo takpum a kagel dawksek thil khat a um ziekin kum 10 lam Christmas nasanle nuomtak in ka mangkha ta puoi.

24th December zingkal nisuokdan chuh nidang sang in anuom mahmah a, amakna e tihtheih khawp in akilang a , ganhing chi chuom chuom teleh zu le va te nasan inle nuom sa diek hileu kilawm hiel in aham vengvung u a, khawsung mipi te le zie guol mahchun kisa lawkin nuom asau a, khanglai te social work in abuoi in abuoi vengvung mai tau hi. Ti chun kenle kalung kagel zel a, atawp tawp in kalawipa kieng a chieh ding chun kahung kisapan tai.

Nitak lam dak 4 velin kaki sazo thei ham ham a tichun ka car in keichauh kahung kipandawk tai. Phaicham sautak kahawh zawh in thingtang kalna chu ahung kipanta a nidang banglo hiel in Minister pan lampi ana siemsak zawhtak ahihziek in alam pi chu thingtang lamkawi himahleh pucca road chu tuiluong banghiel in anuom a gari tawl chu anuom mah mah hi. Nisa ahung niem thim ta a, lampi saklam chu muol sangtak ahih ziekin nisan kei um nalam akhawh kha ta puo a, lampi gal lang khat lam leh phaicham nisan akhoh na gam chu enkawm in lunghel leh thawmhau tak in lamtou achun kawi zitzet in ka gari chu ka tawl zel a, ti chun nisa chu ahung niem hiei hiei a nitum kuon huihthieng te hungnung in chungleng vacha te’n le a giek nalam u zuon in ahung leng sau sau u a, tichun lunghel umtak in kei chauh in ka chieh zela atawp tawp in gamkidawh nadeuh munkhat ahin ka gari kanga a kaki chawl tai.

Khuo ahung dap thim takziek chun gilkiel aum tawh ti’n gari sung a asanchi (Whisky) neucha kapuok chu kala dawk a, singju neucha tawh kameh a tichun keichauh lunghel tak in lampi pang a chun kachu a, kagal lama muol le tang, phaicham leh tui (lake) haw chu kathil viel a, acha’ng leh inlam a kileh kit mai di pouhle kahung ut hiel sek hi. Laphuok tute leh lehkha zikthiem ten ana gensek uh khawvel mawina hin vang chu lungthim a khawih mah mah hi ding ahi a, ngaihtuoh na tamtak ei pethei hi. Chungleng vacha te akawp kawp a leng a, agiek nalam u zuon haw chu ka en a, aw.., keile lenpihding neileng tihbang kahung kigeldawk a thasie tak in kalung kahun gel hiel hi.

Khuo a hung thim panta a, keile ka kipandawk kit a, tichun ka gallam a tangchung leh phaicham a khuo neucha cha um hawn X-mas Star atak u haw chuh ahung vak sing seng a etnawp a um mah mah a lungthim akhawih mah mah hi. Khuo khenkhat te hawn Christmas la (loudspeaker) paungeihna manga ahun thah hawu chu ki he viet viet sekin lunghel aum mah mah mai hi. Tunkim zan ahih tawh, thing tang ahih tawh lampi achun lah kuomah kituok pihding chale a um puou a athip mah mah hi.

Hetlouh kal in zansawt pi bang ana himan ta a, lampi naihvel a khaw um haw chu alengkhawm veng vung u a, khatvei chang leh mi thawm hetding um lo in gammang thuk tak tak bang le a um zel sek hi. Zan ahung sawt phatchun, tuimei (Fog) ajing a gari tawl le ahaksa thim tai. Zan dak 10 vel in kachieh na ding khuo chu kagal muh panta a , tichun awl awl in ka gari katawl zel a, khawtaw lam chu kanaih to hiei hiei tai. Khaw lien tak lampi panga kitiengto ahih ziek chun a khaw dung chu asau mah mah a, khaw kallak bang a le gamlak leh guom bang ana umzel hi. Khaw taw lama inn ki pha masa haw chu kakhel to ta a, gammanglak, guom le um, lamkawi na pakhat hi kavakphak leh, Nungak figure hawih tak, van vam pandildel a kivan khat hi kavak makhelh kha a, chawmkhat kavaktaih leh kalungthim eihung phawnghut a, tichun ‘numei amah chauh phalbi ziebang dapnuoi a hih’ kati a gari kanung tawl a tichun akieng kaphak phat in ka kham a, kavak ho pih pantai.

Bawinu !! khawi a chiehguo na hi a, kuotawh kitawn na him? Daple sa lo nahi a ahim ziebang dap nuoi ahih, vanlumthei deuh inle nakivan puoh a! ti a ka vakdawt leh, He U, , hausa te in lam a lengkhom a chieh guo kahin chuleh zankhang dak 12 leh pauchapkhawmna (mid-night service) um sek ahin Christmas tunkim zan chengleh, zie a chule telteiding ka tih ahi, ka Nu leh ka Pa le hungding ahiu dan deuh leh ahung ti tai. Kenle ka genzel a, “Bawinu keile zie programme a ding ahih hung kahi, hausa pa hi kalawi phapen ahih ziek in kumchengleh Christmas mangkhawm din ei chiel seka, kum 10 lamhiel kimang khawm talo kati a tukum chu hung ham ham kahi, ahinlah, ka lawipa lah zi le cha nei hita, kipawl pihding bangle ahaksatna tampi a um ta’n, tangval nalai akihih ziek in nungak tangval deuhte tawh kipawl bang nuom chuom kisa mahmah ahi” ka tih leh tihin eihun dawngkit hi,- “ He U, bangding a kipawl pihding a buoi na him, keihaw khaw a, Christmas mangding a na hung mawng mawng chu kakipak in kahun ngaisang mah mah in, chuleh kipawl pih ding chu aum san ngaimai in” ei hunti a, tichun kenle hope umsathim in ka hopih nuom mah mah maitai. “ Bawinu .. nangtawh kipawl dila dan leh tangval te lungnatna bang kituok khaleh malzin kihi nalai a”, ka tihleh, “ He U… bangmah kisuonlah nading a um puoi, nangzawk chuh aum sa khat aum zieka hung hinla tih kalauh zawk ahin, kahun sukbuoi khakding ka lauh ahi, abuoi nading aum leh phatak in eihilh masa mai ah he U…” ei hung ti a kalungthim chun, ziehi bah hiventih Christmas manga gamzie chan chan a hi kichieh lawh pih ti’n ki hope deuh takmai in nuom kasa taluo a, tunvakdi lau in ka gari chu awl chachan ka tawl hi.
Bawinu. . . namin neihilh thei die ? katih leh, amahmin chauh hilo in a Nu le Pa min, leh a inn mun nasan uh hawihtak in eihilh a, a mah chuh Niengbawi ti’n ka sam pan tai.
Gari sung a mei kavak loh ziekchun amel kamu chienpuoh na a chuh, lampang a meivak hawn ahun salh eng tieng uleh ahawihdan chuh mihing hiding a ginchak umlo khawphiel ahi.

Thihle thih-damle dam pasal ti’n kahun gen pankit tai..” Niengbawi Love at First Sight kiti hi umtheidin na gingcha?, katih leh, He U…thil hi atak tak a ituok tieng leh gingcha nuom kileng le ginchak himai eive, kenle tu man vang kana gingcha puoh a tunvang nang ka hunmuh apat hin kahe chien in kaging chatai,” ei hunti thut mai ta a, ka nervous thim tawh genbeh didan hevak lo in sawt thim tak kathip veng veng mai tai. “Ka thugen chu na lung awih loh na um ahim” ei hun ti a, kenle, gending hevak lo in, atawp in hitihin kagen hi,-“ Niengbawi!!.. hhemm..Love at First Sight aum theih leh “Love till Last Sight” le um thei in a maw”, katih leh, He U… Keivang love till last sight chauh hilo in “love at first sight” chuh “love till last breath” ding katih ahin, umthei intin umle umsakngei ding in ka kitiem ngam hi ahun ti a, kenle kipak tak in awl in akhut kavak tu a, Niengbawi na genchuh kenle kalungthim thukpen apatin kapawm in chuleh nang a din love till last breath din ka lungsietna kahun pe tai, ti’n khenloh thimthu lelkhawm in awl awl in lenkhawm nalam chu kanaih to hiei hiei tau.

Sawtthim mahleh, hetloh kal in kalawipa inmai katung tau a, lentuol (Public Ground) pang ahihjiek in lenkhawm na inn (hall) chule amah inn mai a kisa ngal ahi a, mipi chu midnight service ngakkawm in ana lengkhawm u a, apaw lamdeuh achun (receiptionist) mi vaidawn pawlte, nungak leh tangval ten thingpi eina pieu a, tichun Niengbawi tawh mipi eimuh chienphak loh deuhna mun, meivak in asalh vak takluot loh namun achun ka chuu a, kakichawl tau hi.

Chawmkhat kaki chawl zawh un, ka lawipa kimuhpih ding ti’n insungah valut taiti Niengbawi katih leh anuom tapuoh a, “ Nang vachieh inla nuomtak in na lawipa tawh vaki mutuoh unla ken zetak a hin ana ngak zing ding kahi He U… danleh Biekin lama i chieh ding uh ahin, hun hemilh hielkih” ei ti a, keichauh chu ei sawl tai. Kenle adap maizen tawh kati a, ka leather jacket (savun puon-ak) chuh ka aksak a, asung a kavan umhaw-gari chabi, paisa bag leh adang dang haw chule kawihden in ka nusieh tai.

Kalawipa tawh kavak kimuhtuoh uleh, kipak ziekin mitthi tui in ei chup gel ta a, tichun bangmah genthei umvak lo in hun bangchan him chuh kaki kawi u a, ka kap geltau. Ka lawipa chun hiti’n ahun gen a, “ Guolpa na chawl di tawh, adap tawh, nagil le kiel in tin, ka room sung ah special deuh in mipi ei sukbuoi lohna a, va chu phawthitin chuleh, dawntheih (whisky) pek 1/2 vel nadeih leh le muong changdeuh in bawl hiti” eiti a, tichun a room sung ah kachuu a nuom deuhin holim ka pan tau hi. Tuchung vang nangle nangchauh a na kilehkit tak lohding ahi, zi na nei hakta luo tai, ahihloh leh alem sa um eitam le… ti’n kalawipa’n ei hun daipan ta a, kenle Lawipa … lakhaw nungak teu hi ahawih theih tuok ten u a, keile ahih theih leh athawn a kileh kit dingvang chu ka nuom puoi, abang hileh, nang khaw hausa na hi a, nang pha nasakleh na khawsung nana na chu hithei mailo di ? ti’n kavakdai a, tichun bangchan him hun nuomtak in ka mang u a, himahleh, inn mailam a ka nutsieh nu khan ka lungthim umthim thei in eikawih tapuoh a, dakkal kimkhat ka muh loh chule sawt kasa mahmah ta a, muhkal ngaklah in ka lawipa chu bangtin akikilepsan thei die aw… tin ka buoi mah mah tai. Ka lawipa lah kahilh nuom tadih puoh a, tichun an nek zawhin ka lawipa tawh Biekin lama chieh huntan a ti’n awl in kahung kisa pan tau hi. Abang hileh, kei ka lawinu tawh ka chate tawh awl in hungkisang katin un, na nawpleh inmai lam ah eina ngakmai in eihun ti a, kenle lemchang saten in ka pawtsan tai.

In mai kapawtdawk leh, kamuh nuom mah mah nu chuh ana um ta puoh a, a chutna asanga hin a, ti’n milak haw chu ka hawl viel ta a, himahleh kamu zo diek ta puoi. Biekin lam a eina taihsan hitan a ti’n Biekin lam chu kazuon ta a, Biekin sung a chunle chu thim thei lo in ka enviel a, ahinla kamu zo diek puoi. Kikhawp pel in madeuh in ka pawtdawk a Biekin mai a mipi hung pawtdawk haw lak chu kana en a le ka mu diek tapuoi. Zan lenkhawm khawvak ding ahih ziek in lenkhawm nalam ah hung kit ngeinan a ti’n zankhuon ka ngak ale ka mu zo diekta puoh a, zingkal khuohung vak kuon chun alawh nazie kahet loh phat in ka lawipa kieng a chun thil umdan chu ka hilh khawng khawng tai.

Ka lawipa chun, tulai nungak khangthak haw hi kenle kahetle umta beklo eive, a inn na het ahih leh kei gari khun chieh inla vahawl mai ta, keilah kipawt dawk theilo, chate tawh, malzin haw tawh insung a kibuoi, ati a, a chabi eipiektawh athuoh a, tichun zan a eihilhna mun chu kazuon tai. Nitak a kakimuh tuoh nau lampi thang cha chuh ahih ziekin kenle, lampi le kahenai, kei chauh vachieh ka ti’n ka lawipa chu ka nusieh a kachiehtai.

Lamlien ah gari kanuhsieh a, lamthanga Niengbawi te inn chuh kazuon ta a, inmai apat in ngeihdeuh leh ki ngamsung deuhmai in kenle, Niengbawi… ti’n ka samta a, kuoman eidawn loh phat in, innsung a lut tawh asap kathuoh zela, kuoman eidawng diek puou. Sungpi lama pat in a Nu ahung pawtdawk a gendi helo in tuonglai achun ahungding a, Niengbawi la He nu ti a kadawt leh paulo hiel in adingveng veng maita a, a zawh chawmkhat chun a Pa ahung pawtdawk kit a kenle ka dawt kitleh a Pa chule gendi helo in ading dentai. A zawh chawmkhat in a Nu chun eihun daw’ng a, Bawipu na mihawl chu midang khat to hin a ie.. eiti tai. Ka lung ahung nathim ten ta a, ei them zo puon lau ti kawm a, a Nu leh a Pa min, leh athugen cheng ka genleh a Nu chun maksa takkawm in hiti hin eihun dawng hi. Bawipu na thil gencheng chu adikvek hi, Niengbawi chu kachanu ahin, kacha nu changkhat kangaihmah mah kahet ngilhtheih loh uh ahi, ahinla amah hin tumasang kum 10 vel khan gari accident ziekin eina beihsantai, tuni hi abeihni ahihziek a kumdang a kahih sekguol u a, athan vehna pastor pa tawle neihding katih uh ahi ahun ti a, insung lam a patchun pastor pa ahung pawtdawk a, pakchavui le khat ahun ladawk ui. Ka gingcha theidiek puoha, tichun, na chanuu hin eithep ahi, ei ngai guol in a um a, nitak akhah na insak u a pat hih lenkhawm nachan ka gari in kapuo a nuomtak a khawsa khawm kahiu, ka jacket leh kavancheng, ka gari chabi nasanle apuok mang ahi ti’n ka pang tei tei a, ba’nga a lim (photo) kitak ka mu nalai a, zie nu khuh ahi tin ka khut in ka kawk kawm a, kapang tei tei hi. A Nu chun, eipuoi Bawipu… na nungak nu hih a um talo ahi, tumasang kum 10 vel akhah, Christmas zingkal dak 1 vela midnight service kikhawp zawh a amah chauh a Biekin apat inlam ahun zawt leh , thangni zan a kaki muhtuoh pat nau natih na mun a khah, car khat in abawhlup ahi a, zingkal tuimei ahah zi’n ziek in lampile amuh hakdeuh hintin, a gari nasan le hedawk zo talo kahiu ahun ti a. ziephat chun, katimul ahung tho hut a, thil khat ei geldawk saka, hah lauh in ka hung lau tai.

Tuhin than lam achieh ding in kakisa zo tau a, na hung muh ut leh athan le hung en in ti’n ei chiel u a, kenle lungthim lau leh lungthawmhau tak pum in ka zui tai. A than katun uleh, ka jacket chuh a thansuong chungah ana kikhai a, ka sakhau a vancheng chule kimtak in ana um a, maksa takin ka umchiet tau.

Kaki im im guotvang in ka ki im zo tapuoh a, hahkah in kahung kaptha tai. “Niengbawi … Love at first sight chuh adik ngeinai maw…tunvang love till death ahitai. Na mel kamuh patna kha atawpna ahi tai maw… bangding a khuti lawm lawm a hih nei engbawl ahim Niengbawi, na chung a kamawhna hih nang in lungsietna a phuba na lakguot ahi maw…. Ei ngaidam tei tei in aw…Niengbawi… keimawh zieka kalungsiet pen nangin nahinkhuo na cha’n ahitai, ei ngaidam in Niengbawi kei kahi na hinna a na subeikhah…. ti’n kakap a, a Nu le Pa kawma le ngaihdam ka ngen a, tichun miphatak, Pathien mitak te ahihziek un kahih khelh na haw chu eingaidam in, a Nu le Pa chun ei kawi u a, thasie tak leh kipak tak in hahkah in kakap khawm ui.

“ He Nu le he Pa… keile Niengbawi kasuk khak zan akhah Christmas manga hung kahi a, Zan dak 12 vel in ka inlam a, ka Nu damlo in athi vang vang hi tih thu thangko ahungtung u a, khuo le he mumal lo a kinawhtak a inlam kadelh leh, lampi haksat tawh, tuimei azin tawh, kiveng manlo a Niengbawi khah ken ka gari a kana bawh khak ahi a, a munle thing leh mau le ala tamta a, lampi ana kisiem phat tak tawh kahet takloh ahi. Lungsiet tak in ei ngaidam un” ti’n ka kap a, amau inle eihe thiem mah mah in, inlam ah ei pui u a, an ei nek pih uh a, pauchap na eineihsak in kipak takin kakikhen kit u a, zie a pat chun Christmas hun cheng a ka lung gel haksatna chuh ahung ki thiel thei tai.