By Thangzasiek
Sakhimaldak chuh anawp nawp suok thei nungak ahi. Pasal anei a, chale ahun nei tau ui. Cha haw ahun neih nung chun apasal in nu ngak dang ahun ngai zawng a, ni khat hih ahung ki sulung himawh u a. Apasal chun nang uh Sakhimaldak te nu chahaw nasuk nanau kisuk uh ati a avau leh azi chun nuom mawh asa mah mah a buhtei chuh aki din aphut a inn chuh ataih san tai. Chun apasal chun ziephet chun zithak anei tai.
In ataihsan nung chun sakhi asuok a, a chate chuh adang chak tieng u leh innsak a phul lak ahin nawi apie sek hi. Achate nawi apiek chuh azithak chun ahun het phet chun apasal kawm achun nathah ding ahi ati tai. Ziephetchun achate chun henu min ahun thah guou hi ava tiu hi. Anu chun bawi lungkham kiu, eithah uleh kapheh khat lau inla mun khat ah kawih un ati tai. Tichun athah phet uchun apheh khat chuh alau a, mun khat a akawih uleh, Phunchawng thing in ahung kek a, zie phunchawng chuh apak alun a lun ahung hitai. Achate chuh adangchak tieng u leh, phunchawng bul achun achieh sek u a, hitihin la avak sa sek ui.
Kanu phunchawng dalnieng uou, niem tiel tiel. Atih uleh phunchawng chuh ahung niem tiel tiel a, tichun achate chun azu chuh achawp u a, avah tieng u leh, Kanu phunchawng dalnieng uou sang tiel tiel atih uleh asang zelsek hi.
Khuo sung a chapang dangte chunle achawp nuom mah mah u a, ahin achawp thei puou hi. Achate lasak dan achuh asak ule le ahung niem diek puoi. Zie chule azithak chun ahun hetphet in naphuk ding ahi ahun ti kit zel hi. Zie phunchawng chuh phuk ahun guo kit tau hi.Ziephet chun, achate chun, henu min ahun phuk guou hi ava tih uleh, amah chun akhawk puoi, ei phuk tieng uleh kahal khat lau inla lui ah sep lut un ati tai.
Phunchawng chuh aphuk phet uchun, a hal khat chuh alau a lui ah asep zel u a, ziechuh ngapi in ahung um kit tai. Zie ngapi chuh suongpi lientak guol khun tui chung ahin adawk velvul a, chung achun achate chuh ava ki chiem sek ui. Midangte aki chiem uleh ahung tum a, tamtak athihlawh zelsek ui.Zie chuh le anuthak uchun ahun hedawk kit a, apasal kawm achun nathah ding ahi ahunti jel tai.
Achate chun, henu min ahun thah guou hi avati kit u a. Anuchun bawite lungkham kiu, ei thah tieng uleh, kamit chang hih lau inla sih (Source of water) nak ah kawih un ati zel a. Tichun asuksiet phet uchun, amit chuh alau a, sihnak achuh akawih uleh, siel ahung suok a, zie siel chuh achi phata mah mah a. Tichun ani ni chun asiel uchuh hung pung tul tul mai ta a. Siel pul aum lele amau a chuh pul-lo in aum hi. Anu naw chun asiel uchuh amitthip mah mah a, asiel uchuh that din apasal chuh asawl zel hi.
Achate chun henu min ahun thah guou hi atih u leh, amah chun eithah u leh, kathisan lau inla, gam mang mun nawpna mun ah theh zak unla, alai achun kalu chang hih kawih unla ihsan un ati a. Siel chuh athah phet uchun, athi leh alu chuh alau a, agen guol chun mun nuom khat ahin atheh zak u a, alailung achun alu chuh akawih u a, alai achun aip tau hi.
Nuom takin a ip u a, chawm khat zawh a ahung khanloh phet uchun, siel thisan kitheh khum na cheng cheng chuh khuo thupi tak leh inn tampi ana suok a. Zie khuo lopi tak sung achun, amau chuh hausa lien tak ana hi tau hi.
