Ka ngaih Sharon

By-L.T.Khuma Gangte

Hunle nite aliem zela, Oct tha chu ahung beia Nov tha ahung hih zetchun, khuaw avawt in zingkal thawh bang a hung haksa dieka, inmai vela zing Vawk-an piek kawma phalbi nilum nungpuoka holim maimai bang chu duhthusam lo laka tel-um lawitak ahisek hi. Zan khuaw thieng tak kala vuklam kigawlh vam zelzalte leh, Vanthamzawla Aksi de sepsep te leh Aksi-sawmleng kichawn viel zat zat te haw bangchu, achangchang leh bang ahim tizawng taka etnawp um mai mai tak le ahisek hi. Zankhuaw hung sawt in hetman lohin sunni aliem zela, krismass nite bang hungnai in Mun chuomchuom a kristian te haw chunle, kumdang guola krismass hungtung dingchu thillawk in, mahni munchietah theih khamkham in akiging laklak kit hawn tau hi. Gam dangdang leh mun chuomchuoma Nungak Tangval lehkha sima umdawk te haw leh, Na chuomchuom sema khawsa tehawn le, mahni khawmun ngeia insung mite leh lawi le guolte haw tawh, kipak taka Lal pien hun matkhawm ngei tup in, Mahni khuaw lamchiet zuon in akipelkalh laklak kit hawn taua, Thingtang lo bawlte haw chun le, a Buh thawh dawk khamkham teu chuh krismass hung tun ma ngeia thak zawh man tei guon, pan ala hawn ui.

Khuaw ahul thittheta, gamnuoi bang athelh hiuheu ziekin, Gamvak mite ading diekin tawihvielna bangmah ahung nuom diek seka. Luidung tui tawm hun ahihtak ziekin zan Lenseh hun ahung hia. Kumthaka lo ding vatkit masang awllentha ahung tung tai. Nungak te dinga thing-âi chen hun, Puon ki gatkhawl phat ahung hia, khawsunga sakapthiem deuhdeuh te dinga krismass leh kumthak mehding sa hawla gamvak phat ahih guolin, Nungak teding ale thawhlawm thing ding puokkhawm hun ahung hi tai. Biekin a krismass la bang hung kisa pan in’ nidanga kikhawm khalo hawnle kikhawp ahun ngaihnat deuhchiet hawn takziek uchun, Biekin bang mi hung dim mipmep in kikhawp bang ahung nuom tenta a.

Phalbi laia pakchi Pakbuöng, Japanham tih haw leh pakcha chi chuomchuomte haw chun, tangtin muoltin bawmin avul em thiì thei tau hi. Mun gamla taka Uleuh hamgit, khawsung vela pata vak kigalzak heuhheuh te chun lunghel kiti chuh ahun kaitho a. Nitak ninem ahung hia, thing chungte haw achun Chiehphat ngeng tih bang ahung ham zakzak a, Laitui khaw zawn vanchung sang lamhaw achun muvanlai tebang alengviel dieldiel ui. Ni tumding kuon chavang kawl eng kilawm takmai chun’ kakhuou Anpak khawdung levai te leh, asehtuom vela tangtin muoltin te haw chu engsiekhan takmai in ahun salh eng singsenga, Kimkhat te a dinga nawpni ahihlai in, kimkhat te din vang’ hun muolliemsa ngaia kahna mai achang zaw sek hi.

Khuaw thimkuon mielzul ahung hia, Nupi upa lokuon lntung ding kuon tehaw chu’ a Chateu hawn khuawmuol tieng bangah vadawn in, ana lamtuoh zel ua. Thosi leh ganhing neu chacha lengviel liklik tehaw chu ‘Miela Anhawl’ chi Vabak leh Bak haw chun dawmin aleng viel luplup hawn ua. Chungleng vacha te haw chule tangtin muol leh thinglek te haw achun lawih nading hawlin a kisam kalh vingveng ua. Khawgal lama ningkum lochul vel haw apat chun Bakthak leh Pengpelep tihbang ahung ham vek vek ua. Tumlam panga gammang thinglak thim khelkhul velhaw apatchun’ zana hamchi vacha khenkhat te haw chu ahung ham kek kek sekua, khawthim ding chu ngaingamlo hile kilawm takin. Suohlam muol chunga thapi hungsuok dawk eng singsengin’ asalh phakloh namun cheng khale, ahung suokdawk dungzui zelin ahung eng hiei hiei zel a. Zan huihthieng hung nung hieuhieute haw chun khawlai dung vela thingnah te haw chu a mut ling sipsipa. Hambuk lak haw achun Thavak nuoia hamchi ganhing hamgit zat chuomchuom te haw chu’n, Siemtun amau haw ham dingdan bangchieta a guotsak bang zela awte suohin’theihtawp in asiemtu’u apakchau hi.

Zansawt nunga tangval sawmlam zuon hawn, Thavak nuoivel banga lunghel deuha, ‘Thangvan khawlun laia ngabang lengsa…’ tia nahpa ham velvela a hun mut hawu bang chu, zalkhun chunga kipata kuolsa a gala na ngaitha te dinga, Suihlung ipnung lunghel thelbang kaitho tu ahisek hi.

1984 Dec ni 19 ahung tunga, zieni mahchun Lehkhathawn le kamu kita, Saron abawk ahia. Amah gamchuom ngawna khawsa ahih ziek le hintin, Kuawman ka kingaih lamuh ahe bek puoua. Ei gingmawh pawl chu a um leuhleuh tho ui. Keisangin aman lehkha ei thakmun zawa’ ei ngaih danthu lamdeuh ngawn ahungen seka dikle adik him hi. Saron ka lungsiet nabana ka ngaihsanna ziek tak chu apa zal ahi. Apa Pu Liengo chu ka khuou Anpak Govt High School a HeadMaster ahih mana ka ngaihsan hilo in, Apan a etkawl dan kadeih a, apan amah a etkawl bangbanga aman le ka chate hun enkawl tei dinga ka ginchak ziek hipen ina. Mel-le-pang thu ale aduong hawihna banah, amel hawihna mahmah chun mite mit alan, Lampi vela aki tuokpih tacheng inle, kihei in avak enzui deuhtei sek ui. Ka khuoua tangval hungzin khacheng inle melhawih asau a holim nan amang zui deuhtei sek hawn ui. Tangval chengcheng mit alak ziekin, nungak khenkhat aguka it-thik mana gensie pawl bang aum leuhleuh sek ui.

Lehkhathawn lama khan vaklut kitleng. Tukum adinga Saron lehkha nunungpen chu, hawng zieng lochun ka pheika nunglam sakhau achun, Duot takin kavak zep lut hieu2 a.

Nurse zila apawt ding nitaka, kei unih maia kuawdang ngai loa, khenloh thimthu suta, ka um khawvak takvang namun uh, Ka khuou Anpak khaw naka Mawngpi phung nuoia Suöngpi lientak chung achun, Kei maiin nitak khawthim kuon vel chun lunghel takin hun kava manga. Tichun sungpi chung achun kachua’ mawngpi kung achuh ki nelchakin, Saron lehkhathawn chu awlin kavak sik hawnga, Hiti hin ahun zika-

Ni-12-5-84
Ka lungsiet pen leh ka lungsiet zing, u Thang,

As’ tuchung x-mass chu mangkhawm loding ihi mai tai aw!

Tulai Kargil buoi naa kisukha lndia sepaih liem, nicheng in ahung tunbeh zela, Doctor leh Nurse te akidaih lohziek un, kei haw a training laite nasan hin ka buoi vek mai ua, suty mutheilo kahi aw! Nang haw bekin nuomtakin mang unla, ei hun geldawk zelin aw’!

Kahung pawt theih loh hi khawk kasak guolin, lehlama pha kasai, aziekchu kapu teu Sepaih pang khat adingin thingpi ahung awm ui, tih kana zaa. Abang hileh, kei hung tienga kiho chienna neih dinga thupukna um ahih tuok hi. Dan leh kihung pawt henla nu lepa thu nielngam loh manin, Nang ki hun chan khale’ tihbang ka gel tieng, hung ding ka laua, achang in agukin ka kap zel seka, themtu ding beiin ka kap khawvak zelsek hi. Abang hileh Anpak nungak taka umzel katup ahi, “Anpak nungak” katih hin Ginumna te, Thienthona te,Thuok-hatna te, Tawmngaihna te, achun khawma, zie guol mah chun nangle, Kei leh i gama dingin Anpak tangval deuhin umzel in aw?…Mangpha

Na lungsiet
SaronArmy Medical Colage-PUNE-13

Kasim zawh chun ka lungthima ngaihtuohna chuom2 hunglut in, lunghel takin zie la hih ka siem ta a:-

1. Muikhuaw zina gamdai vate hungmau in,
Lungguk ah nunlui ngaih thelbang atho sek,
Ngaih anglaia senlai naubang pawm ka nuom,
Mahleh sawlbang heina tang adang zotai.

Khawi ah sawlbang heimah leh chin,
Ka ngaipen ie, aw nang saron pak hawih,
Nang chauh na hi suihlung ka kinepna,
Nang lo suihlung muonna dang ken neilo.

2. Ngabang lenna muol le tangte dang mahle,
Khenloh thimthu zatam i lelsa cheng khah,
Ngilhni hun nei kin aw na suihlung gukah,
Khenna ding thimthu meipi bang zing mahleh.

3. Kala thimthu lengte khaubang sut khawmin,
Gimtheih haksatnate a kidawn tuohin,
Lenna tang dan vanga lungthuoi mai loin,
Dettakin pang zingin melma alien ie.

4. Chungthilmu bang chan thazakin lengthei leng,
Al-ang ka vaihna gam hi ngaita loin,
Leng ing ting lanu kawma thimthu leldin,
Tangpan ka suihlung hel sawl-ang bangtang ie.