Manipur Express 20-02-10

NEWS WITH UPDATED ZOMI NAM NI:

Lamka ah Work Minister khuallian in pang, Mualnuam ah Mizoram Minister hiding
Leitung gam tuamtuam ah Zomi Nam Ni kum 62 chinna zat hiding
Lamka, Feb 19:
Leitung gam tuamtuam ah tuni (Feb 20, 2010) in Zomi Nam Ni kum 62 chinna thupitak in lop hiding a, Manipur ading in New Lamka a PT Sports Complex leh Thanlon Sub-Division sung a om Mualnuam khua ah Nam Ni zat hiding in kigen hi.
New Lamka a PT Sports Complex ah Feb 20, 2010 zinglam dak 10 apan program kipang a, Chief Minister O.Ibobi Singh a hoh theihlouh ziak in Work Minister K Ranjit Singh in khuallian hihna tawh program uap hi. Zomi Nam Ni Pa (father) in Power Minister Phungzathang Tonsing a, Chief Host in V.Hangkhanlian, MLA; TNgursanglur, MLA leh T.Manga Vaiphei, Chairman MTDC pang uhi. Guest of Honour in Bijoy Koijam, Dy Chairman Planning pang hi. Cultural item lahna YMA Manipur group, HYA Hqtres, Chiru, ZYA, KKL Hqtrs, Aimol, Chikha leh Nam tuamtuamte’n lahna nei ua, ZAA, Zomi fins leh Dove quartett te telin lasiam tuamtuam te’n special no pia uhi. Work Minister in BRO khut ah Guite road piakkhiakna order ZSF President S Kapkhanmuan kiangah pekhia a, hiai hun ah mipi a sing asimte kipak in kikou zuazua uhi. ZC Chairman Songchinkhup in Nam Ni message gen a, Minister leh MLA tamtak in leng thugenna hun zang uhi. Hiai thu zat sut ahihlai in program seh 5 suah seh 2 le zawh hinailou hi.
Mualnuam khua ah zan nitak in Zomi Nam Ni lopna prog kipanta a, Chief Guest in G S Haupu UZO President pang a, Functional President in Sialbu Hausa Mangkhenpau pang hi. Tuni zinglam dak 11 apan in Mualnuam Public Ground ah program kipan nawnding a, Rohluna Hauzel, Minister F&CS, Mizoram leh T Hangkhanpau MLA te’n Chief Guest leh Chief Host hihna tawh uap ding uhi. K Guite in vaidawn thugenna neiding a, YMA, NE Khodungsei Branch leh Kachin te’n special item lahna neiding uhi. Zomite’ adia thumsakna Pastor V Letzathang in neiding a, nitaklam in mipi’n annkuangluina neiding uhi. 6:30 pm apan in Zomi musicial nite om ding a, G Bualzang hausa Suanchinpau in Chief Guest hihna leending a, M Dama Special contractor in functional president hihna lending hi.
Tualou in Dimapur ah tuni mah in Zomi Welfare Association(ZWA), Dimapur te’ saina in EBCC Campus, United North Block, Burma Camp, Dimapur ah Zomi Annual Meet leh Zomi Nam Ni zatna om ding a, Lalthara, IAS, Chief Secretary, Government of Nagaland in Khuallian hihna tuah uap ding hi. Kohima leh Diphu apan Zomi tamtak in hiai program va uap ding uh hi’n kigen a, mipi’n annkuangluina neiding uhi.
Maharashtra khawpi Pune ah leng ZSF Pune Cell makaihna in Ornellas Hall, Quarter Gate, Camp ah Zomi Namni a 62na chinna program zat hiding a, namlaam tuamtuam leh pupa tawndan lah na om ding hi. ZSF HQ in ZSF Pune Cell recognition apiak lopna tawh kithuah ding hidanin gen ua, Kaizadou Thomte Asst. Commissioner Custom, Mumbai in Chief Guest hihna lending a, hiai hun ah Mumbai leh asehvel apan in leng mi tamtak in uap ding ua, session III a khen in program zat hiding a, lasiam tuamtuam te’n lasakna nei in nitaklam in ann nekkhawmna neiding uhi.
(Photos at Photo Gallery as Zomi Nam ni)

ZEPADA leh CDSU in govt ah hekna khia
Lamka, Feb 19:
Zomi Economic Planning and Development Agency (ZEPADA) leh CCpur district Students’ Union (CDSU) in a tuamtuak in Chief Secretary leh Chief Minister kiang ah hekna khat khelut ua, huai ah centre government in Manipur state a festival tuamtuam om hun a anntang kiningching tak a piakding a chih uh mipi’n kipahpih mahmah ahi chi uhi.
Centre govt in mipite’ nekding in Minimum Support Price (MSP) anntang pia a, TPDS nuai a APL anntang tawh paikhawm ding chih himahleh, TPDS nuai a APL anntang CCpur District Quota pailou chin ZEPADA leh CDSU in hek uhi. Pawl 2 te’n ataklat behna uah hibang festival hun ah mipite’ taksap awng hukna ding chi a Centre Govt. apat anntang hongpai phazah tawh APL anntang khah hiak dingzah kibang a, hiaite gel gawmkhawm a CCpur dist sung lut ding chih himahleh, CAF & PD Department in TPDS nuai a APL Rice, CCpur dist quota paisaklou a festival hun a antang piakding chauh CCpur ah paisak uh chi uhi.
ZEPADA leh CDSU in ataklatna uah, thupiak thak aom nawn ma APL anntang leh ‘Festival Rice’ gawm khawm a om, Rs 1172/- per qtl a zuak ding chi a Commissioner (CAF & PD), Govt. of Manipur in 11th November, 2009 in ‘Order’ suah chi ua, pawlpi 2 te’n ahilhchetna uah festival rice (mixed rice) Rs 1200/- per qtl a zuakin om a, processing charge Rs 30/- per quintal hisak ua, Imphal apan Lamka tan puaktungna dia (transportation charge) Rs 38/- per quintal hisak ua, a guanna leh a suahkhiakna tengteng agent te’n amau sum seng ua, quintal ah Rs 1268/- tungpha ban chi uhi.
Chief Minister leh Chief Secretary kiang ah pawl 2 te’n Union Govt. apat panpihna hong paite mimal’ hamphatna leh hauhsakpihna dia zang leh TPDS nuai a District adia APL Rice Quota paisak lou a, minautangte’ lei zawh louh ding a antang paisaktute’ tung a action la ding in ngen uhi.

Tualthat-tu Henglep PS ah piak hiding
Lamka, Feb 19:
Henglep Sub division sung a Aimol leh Molnoi kikal a Assam Rifles post a om AR personnel (Rifleman No G 15002428) Sri Patil Keshore Babura (24) s/o Babura of Udhan Gaon, Ajanta Dist (Auragabad), Maharashtra in Feb 17 zankim in a zi Salla Patil (17) d/o Santaran Mukesh Pishore of Kesip Kannar district, Maharasthra khau in agawl ah gaklum hi’n kigen a, zan in Lamka damdawi inn tut in om hi. A luang tuni in district hospital morgue apan in Imphal a RIMS morgue tut in om a, postmortem bawl hiding in kigen hi. Thusuak kingahdan in, tu in Assam Rifles te’ custody ah Keshore Babura koih in om lel a, zingchiang Feb 20, 2010 in Henglep Police te’ khut ah piakkhiak hiding in kigen hi. Babura in court martial tuak ding hidanin leng thusuak kingah hi.

Ph D ngahthak om
Lamka, Feb 19:
Rev V Ginsianthang, tulel a South Korea (ACTS) a Laisiangthou sinlel zan Feb. 18, 2010 in Doctor of Philosophy (P hD) degree zawhna lukhu khuksak in om chih thu kiza hi. Ama disertation ahihleh, “Comperative studies between Justification and Sanctification in John Wesley doctrine of Salvation” chih thulu nuai ah – “Its theological implication with a special reference to the Evangelical Baptist Convention Church in India” chih ahi hi. Amah March 2,2010 in New Delhi tungding a, March 9,2010 in Lamka tungding chih thu kiza hi. Tu in “BY THE GRACE OF GOD” chih laibu a gelh zousiangta hi’n leng kigen hi.

The 1st Two-Day National Seminar kipan
Lamka, Feb 19:
Kuki Research Forum leh Kuki students’ Organisation te’ pangkhawm in Sielmat Christian College ah tuni zinglam dak 10:30 in ‘The 1st Two-Day National Seminar on Kuki Society; Past, Present & Future” kichi kipan a, Rev. Dr. En Za Sian, Executive Secretary, Chin Baptist Assn, Manipur in honkhiakna leh thumna in lan hi. Huai ah Chief Guest in Ginsuanhau Zou @ G.S Haupu, President, UZO GHQ pang a, Guest of Honour in Dr. DS. Haokip, Head of Dept (Hist), CCpur Govt College leh Functional President in Chawngthahlei, Speaker, Kuki Inpi Manipur pang hi.
GS Haupu in agenna ah, hiai bang a Kuki Research Forum pawl in thil asai na tung uah a kipahpihthu gen in, hiai in khat-le-khat ki it tuah semna, kituahna leh lemna ahontut a deihthu gen in, midang kuamah omlouh in suangtu/pianna mi khat ahihdan gen a, organising committee-te kithuah pihna in Rs. 10,000 pia hi. Seminar hun ah thupi tuamtuam zang in, Prof Lal Dena, Dept of Hist. MU; Dr. H. Kamkhenthang, Former Director, Tribal Research Institute, Imphal, Dr. S. Haokip, Liverpool Unversity, UK; Dr. Leban Serto, Co-ordinator Peace Studies, Martin Luther Christian University, Shillong; Dr. Joseph Suantak, Lecturer, Moreh College leh Dr. Priyadarshni M. Gangte, Lecturer, Damdei Christian College, Kanglatongbi te’n sinsakna nei uhi. Hiai seminar ahihleh Feb 20, 2010 in Pastor Thachuoilou Hmar, UPC, North East India in khakna nei ding hi.

College Student Union makai thak
Lamka, Feb-19:
CCpur Govt College ah 2010 sung a Students Union a vaipaw ding kitelna Feb 12, 2010 in nei uh a, nominate -e uncontest in telching hi uhi. General Secy ding in H. Kambiaklun, Fin. Secy in H.Lalrinthanga; Secy Games & Sports in Mangneilal; Secy Magazine in George Thangminlian; Secy Social & Culture in Ngamlienlal; Secy Debate & Extention in S.Vanmuanthang; Secy Common Room (boys) in Ginsuanthang; Secy Common Room (girls) in Lhingneivah Mate leh Academic Secy. ding in P. Gouminlien Gangte te telching uhi.

DLCC review meeting om
Lamka, Feb 19:
Miss Jacintha Lazarus, IAS DC/CCpur makaih in DC office a BRGF Resource Centre ah tuni zinglam dak 11 in DLCC Review Meeting om a, huai ah, District Level Officer teng telin thu tuamtuam genkhawm uhi. Hiai meeting tawh kisai a DC/CCpur in gendan in meeting hun ah NREGS tawh kisai a panlak dingdan leh nnasep dingdan genkhawm ua, March 2 nd Week sung in Vangai area a NREGS tungtawn a Rubber Plantation bawl ding dan BDO Vangai makaih in training om ding a, huai ah Forest Dept, Agriculture leh Horticulture Dept te’n sinsak ding uhi. Vangai area ah atamthei pen in NREGS tungtawn in rubber, pineapple, orange, passion fruit plantation kibawl sawm hi’n gen hi.

Govt employee tamtak pension ding
Lamka, Feb 19:
CCpur Dist sung a Govt employee tamtak Feb 2010 khabei hun in asepna ua pan pension (retd) ding uh hi’n thusuak kingah in taklang hi. Pension dingte ahihleh CMO nuai apan in Aikima, Driver; Ngaikhochin, ANM/FHW leh M. Ngulzapau, MHW te hi uh a, District Hospital apan Dr. Tualkhankham, Medical Suptt.; T. Tuallam, Health Educator leh T. Sinkhothang, Grade-IV te hi uhi. CCpur Govt College apan in Lalremthang Tusing, Principal CCpur Govt leh L.S Gangte, Vice Principal te hi uh a, Lamka College apan in Dr. TK Muana, Principal Lamka College leh L. Kiamlou Pulamte, HOD (Pol Sc) te hi uhi. Manipur state sung ah govt college tamtak apan principal mi 10 te Feb 28, 2010 in pension ding uh a, huai lakah, Lamka apan Lalremthang Tusing, Principal CCpur Govt College leh Dr. TK Muana, Principal Lamka College te leng telkha uhi.

Candidate 1000 in Cl XII exam ding
Lamka, Feb-19:
Council of Higher Secondary Education, Manipur saina in March 8-26, 2010 sung Class XII exam om ding a, Lamka ah Exam Centre 2, om ding a, Centre ‘A’ CCpur Govt College hiding a, Centre ‘B’ Lamka College hiding hi. Exam Centre ‘A’ CCpur College ah CCpur College; VK Tawna College; Young Pillar College; Sielmat Christian Hr Sec School leh Childrens’ Training Hr Sec School apan Arts & Sc candidate 905 te’n exam ding uhi. Centre ‘B’ Lamka College ah Lamka College; Rayburn College; Ebenezer Academy leh Bethany Christian College apan Arts candidate 237, Sc ah 220 leh Commerce candidate 93 te’n exam ding uh hidan in kigen hi.

BRGF nasepdan DC in report
Lamka, Feb 19:
DC Office a BRGF Resourece Centre ah zan in DRDA CCpur Governing Body meeting om a, huai ah MLA teng leh Minister 2 te banah member tamzaw paikhawm in CCpur Dist sung a Development works tuamtuam tawh kisai gen khawmna nei uhi. Meeting na tawh kisai DC apan kiza danin huai hun ah Development work tuamtuam genkhawmna a neihna uah adiak in Town area sung a BRGF 2007-08 tungtawn a nna kisemte a hoihlouh dan report leng pe ngal hi’n gen hi. DC in agenbehna ah member paikhawmte kiang a report a piak tawh kiton a, a kisaipih member lam te’n leng BRGF nnsepna a a hoihlouhna te a kinlam a enkai a, nnasemtute (agency) teng samkhawm a nnasep hoih nang a thil omdan genkhawmpih ding uh hi’n DC theisak ngal hi.

Class X admit card laktheih ding
Lamka, Feb 19:
Board of Secondary Education, Manipur (BSEM) saina in March 10-24, 2010 sung Rayburn H/S ah High School Leaving Certificate(HSLC) Class X exam om ding a, huai ah candidate 1903 om hi. Candidate te ading admit card Feb 22, 2010 apan in exam centre ding Rayburn H/S ah kihawm khe ding a, Headmaster/Principal teng in mahni school chiat laktheih ding hi’n Lalbiakthuami, Officer-in Charge, HSLC Private Centre apan thusuak kingah hi. Huai banah March 10-24, 2010 sung Rayburn H/S mah ah HSLC Old Course exam om nawn ding hi.

NCC te’n exam nei ding
Lamka, Feb 19:
CCpur Dist sung a NCC te’n Rayburn College ah Feb 21, 2010 zinglam dak 9 apan in exam nei ding uhi. Rayburn NCC te’n ‘D’ certificate exam ding uh a, CCpur H/S NCC te’n ‘A’ certificate; Bethany Christian College NCC te’n ‘A’ certificate leh JNV NCC te’n ‘A’ certificate exam ding uh a, exam ding teng full uniform tawh kuan ngai ding hi’n thusuak kingah hi.

Activa in Minlun accident
Lamka, Feb 19:
Minlun (27) s/o Kaizalian of Dorcas Veng, New Lamka, tuni zinglam dak 11 vel in Tuibuong a AR te laka alawmpa kiang a hoh deklai Tuibuong Peace Ground gei a speed bracker ah activa in accident a, amai liam in atongguh veilam kilawi (fracture) in Dist Hospital ah admit in om hi.

TML ah SBI hongkhe di’n ngen
Imphal, Feb 19:
Committee for Develoopment of Tamenglong District (CDTD) kichi pawl in tuni in Chief Secretary kiang ah ngetna khia in, Tamenglong district headquarters ah kintak a State Bank of India branch khat honkhiak poimawh ahi chi ua, huai ding a panla ding in ngen uhi.
CDTD thusuak in agenna ah, tulel in United Bank of India chauh in branch nei a, huai in mipite’ poimawhna hu zoulou ahi chi uhi. Tamenglong district sung ah army leh para-military force tamtak a om banuah, mipi vantang leh businessman te tel in government employee te’ ading in bank branch khat chauh kidaih zou mahmah lou a, huai ziak a SBI in branch khat beek a hon uh poimawh petmah chi uhi.

Liamna tuak innkuante lungkimlou
Imphal, Feb 19:
Kumlui 2009 a parliamentary election om lai a gypsy accident a liamna tuak Lotkhanlung Remei s/o (late) Nganthonang of Nungnang (tulel a Noney) a om in hoihlam nawt sang in siatlam ma nawhzaw a, ataksa 90% te tangtheilou in tu in mibanglou suak chi uhi. Hiai tungtang ah tuni in a sanggampa (u’ pa) Phenri Remei in press release suahkhia in, Congress candidate adia kipei Lotkhanlung bang dinmun a dinghiam chih tanpha Congress in a ngaihsak nawnlouh ziak in lungkimlouhthu taklang hi.
Remei in agendan in, ka sanggampa Congress adia muanhuai mahmah leh election hun a naktak a kipei hi a, polling day ni April 16 2010 in party agent leh Congress leader K P Meirijin s/o (late) Naplagai of Nungnang (Longrang) Village Gypsy MN-01K-8975 ah tuang in accident tuak ua, RIMS Rehabilitation centre ah sawtpi etkol himahleh tuni tan in hoihlam nawtlou chi hi. Remei in agenzelna ah, K P Meirijin in ‘gari neitu ka hihna leh leader khat ka hihna tawh seen le paan om teng ka sengvek di’ chi a thuchiam hon neihte bangmah lou suakta a, huaiziak in ka sanggampa Lotkhanlung in a setawp a tuah leh a mawh tengteng K P Meirijin in apuak ding ahi chih ka puang chi hi.

Kishan Mela om nawn ding
Imphal, Feb 19:
Agriculture department nuai a State Agricultural Management Extension Training Institute, Manipur (SAMETI-MANIPUR) saina in March 10-15, 2010 sung Palace Compound, Imphal a Iboyaima Sumang Lila Shanglen mun ah State Level Exhibition/Kishan Mela om nawn ding chih thu kiza hi. Hiai hun ah public leh private sector organisation tuamtuam, KVK banah banah louneimi leh inputs dealer te telchiat dia chial hi ua, Director SAMETI, Manipur, Sajenthong ah thuchian kimzaw ngahtheih ding chi uhi.

Kaplup a om mi 5 lakah mi 1 theihkhiak in om
Imphal, Feb.-19 :
Ukhrul district a Kasom Khullen lak Feb. 17 nitak a 12th Assam Rifles te’n operation a bawlna ua helpawl dia gintakte tawh a kikaptuahna uah mi 5 kaplup in om uhi. Kaplup a omte Kasom Khullen police station a a piak khiak nung un tuni in mi 5 alakh mikhat theihkhiak in om hi. Amah bel Thokchom Sanjoy @ Bacha (26) s/o Th. Ibomcha of Kongba Makha Nandeibam Leikai hi a, a taksa a driving licence a puak apan a theihkhiak a om hidan inleng kigen hi. A sungkuante ahihleh March 2009 vel apan inn pha nawnlou hi a, PREPAK ah tel a bang faction hiam chih bel theilou uh ahihdan gen uhi. A driving licence leh diary muhkhiak in om a, a diary ngial ah mi bangzahhiam min kigelh hi.

Aigejang a bomb puak ah mi 1 si; 3 liam
Imphal, Feb-19 :
Chandel district sung a om Aigejang lampi ah tuni zingkal dak 6:30 vel in bomb hattak khat puakzak a, huai ah mi 1 si in 3 in liamna tuak uh hidan in kigen hi. James Zou (15) s/o (L) Bijoy of Khullen Khailet a mun ah si in, Ngampao Haokip (20) s/o Jamngam Haokip of Aigejang village a khut leh khe a liamna a tuah ziakin RIMS a etkol ding in tuni in RIMS puaktun in om hi. Midang liamna tuakte bel Shokholun Haokip (20) leh Miss Tingneu (42) hi ua, amaute bel a liamna uh a nasat louh ziakin Aigejang kianga 8th Assam Rifles Unit Hospital ah etkol in om uhi.

PLA/RPF in hilhchetna bawl
Imphal, Feb-19 :
Imphal West Commando leh 28th Assam Rifles combined force te’n apaisa Feb. 17, 2010 nitaklam dak 5:25 vel a Yairipok lampi Ngarian Tera Ngarok a helpawlte tawh kikaptuahna aneih lai un 28th Assam Rifles personnel khat in liamna tuak ahihdan a gen uh tawh kiton in PLA/RPF pawl in naktak in nial uhi. Hiai tawh kisai tuni a PLA/RPF Chief, Dept. of Publicity G.M. Changjou in hilhchetna a bawlna ah, hiai hun in kikaptuahna bangmah omlou a, Imphal West Commando te’n PLA Lieutenant Krishnan doctor a ki ensak zou a kiklam a mat uh Ngarian Tera Ngakok mun a thah dia a tonpih uh hi a, huai ah 28th Assam Rifles te tawh kaplum dia a kisak lai un Krishnan in taikhiak sawm a, hiai bang a taikhiak a sawm tawh kiton a thau a khahna lam ua 28th AR personnel in liamna tuak hidan in gen uhi. Amau a taklatna uah Krishnan pen fake encounter a si dan a hih a sawmna lam ua hiai bang teng tuak uh hi a, kikaptuahna om a chih uh leng thuzuau pumpi hidan in gen uhi.

Army Recruitment Rally result suak
Imphal, Feb-19 :
Dimapur a Rangapahar, Wokha leh Lunglei a apaisa Jan. 30 & 31, 2010 a trade tuamtuam a sem ding Army Recruitment rally neih a om tuni in result puankhiak in om hi. Dimapur a common entrance exam neih a om ah General duty (non-dispensation) category ah RPDK 1001, 1002 te’n lawhchinna ngah ua, Soldier Gen. duty (Dispensation) category ah RPDK 0506, 0516, 0528, 0539, 0570, 0609, 0621, 0638, 0646, 0649, 0650 te lawhching ua, Soldier (Technical) ah RPSD 5501, 5503, 5505, 5506, 5507, 5510, 5512, 5517, 5524, 5527, 5529, 5534 leh soldier (Tradesman) RPTW 3051 te lawhching uhi.
Wokha a Jan. 31 a common entrance exam neih a om ah soldier Gen. Duty (Non-Dispensation) RPDX 1001, 1002, 1003, Soldier Gen. Duty (Dispensation) RPDX 0503, 0518, 0548, 0553, 0565, 0585; Soldier (Technical) ah RPST 5005, 5006, 5007, 5009, 5012, 5013, 5014, 5015, 5016, 5018, 5019, 5020, 5022, 5024, 5026, 5027, 5028, 5501 leh 5502 te lawhching uhi.
Lunglei ah ahihleh Soldier (Technical) ah RPST 5001 kia lawhching hi. Lawhchinna ngahte’n joining letter army recruitment office, Rangapahar ah March 2 & 3, 2010 zinglam dak 9 akipan nitaklam dak 3:00 kikal in mahni va kilak ngai ding hi. Hiai hun in original certificate tel in admit card tawi ngai ding a, June khasung a training a sawlkhiak hiding un leng thusuak in taklang hi.

ULFA ‘vice chairman’ Pradip Gogoi case 3 ah suakta
Guwahati, Feb 19:
ULFA ‘vice chairman’ Pradip Gogoi tungthu tuni in TADA Court in ngaihtuahna nei a, case bangzahhiam aneihte’ lak ah 3 ah suahtaksak (bail) in om a, case dang kibaang omlaite ahihleh, Feb 23 2010 chiang in ngaihtuah hiding in kigen hi. TADA Judge Soneka Bora in ahihleh Gogoi tung ah case khat zel ah bail manding in Rs 1 lakh liausak a, court phalna tellou a, Guwahati leh Assam state nawse theilou ding ahi chi’n gaak hi.
Judge in ahihleh Gogoi kiang ah passport leh document aneihte court ah pekhe ding in zasak a, a khua uh Sivasagar a om a ut leh niteng a police station ah a va ki report gige ding ahi chi hi. ULFA’ publicity secretary’ Mithinga Daimary tung a case khat kibaang leng Feb 23 chiang a ngaihtuah hiding in kigen hi. Gogoi ahihleh, 1998 kum in Kolkata ah mat in om a, Daimary ahihleh, 2003 kum a ‘Operation All Clear’ omlai a Royal Bhutan Army te’n amat uh ahi hi. Mi 2 te ahihleh Guwahati Central Jail ah om uhi.

Dakkal 40 nung in University topper pa pummat in om
Lucknow, Feb 19:
Lehkha siamthei mahmah Lucknow University a Mathematics topper hihna tanpha ana ngah kum 27 a upa Shamim kichi lungsim buaiziak in a pa thau tawh a room sung ah om a, thautang tamtak a kapkhiak nung in tunitan in pummat theih in om hi.
Lucknow khawpi nawl a khawta khat ateng Shamim in zan Ningani zingkal baihtak in a pa thau leh a tang 30 tawh room sung ah kikalhkhum in om a, a innkuante’n a sapchiang un samkhe zoulou in police ah report bawl ua, police leh a innkuante’n kong hong ding a ava nget chiang un thau a kapding in vauzel hi.
Kum 1 vel paisa apan kingaihsiatna khat nei in a lungsim buai mahmah ahi chi ua, apa tuma zek apan damdawi ana pezom khalou hidan in gen uhi. Zan zingkal apan in room sung ah a kikalh khum ziak in khawmipite leh Police ten buai pih mahmah ua, Shamim lawm hoih mahmah khat in singpi a va piakdek leh alawmpa tanpha thau in ana kap chi uhi. Shamim in police te window apan en zel in a va naih deuh chiangun thau in ana kapzel a, zan nitak dak 10 tan in thautang 11 kapkhia chi ua, ahihziak in kuamah bel khak neilou chi uhi.
Tu zingkal in Shamim pianna nu lungkhamlua in kapkhia a, huai tak in Shamim kikou khia in ‘ka inn kim ua police om tengteng paikhia un, kon baan thahvek ma in’ chi’n vau chi uhi. Huai hun in thautang 5 kapkhia nawn chi uhi. Huai phet in senior police officer te’n amah leh amah a kithah khak ding lau mahmah uh hi’n kigen a, Shamim a ki surrender ma naihlouh photdingin thupuk uh hi’n kigen hi.
Tu nitaklam dak 5 vel apan in police te’n inn tung lam leh baangvang khenkhat apan in web camera leh mobile phone camera zang in Shamim om na room enkhia uhi. Tunitak dak 9 velding in Shamim in a thau pen bang kilkhat ah akoih in amah pen baang langkhat a a om laitak ahi chih camera tungtawn a amuhphet un police te’n thakhat in kongkhak peek hong in pum bawh uhi. Dakkal 40 nung in Shamim pummat zawh in om a, tu in damdawi inn ah security venbitna nuai ah koih in omlel hi.

Vairengte ah numei siluang 1 kimu
Aizawl, Feb 19:
Tu zingkal dak 8:30 vel in Vairengte leh Lailapur kikal Vairengte lutna bul lak ah Mizo numei hidia gintak, kum 20-30 kikal mi ding sisa in muhkhiakin om hi. Vairengte mipite’n police kithuahpihna tawh siluang va la uhi. Misi ahihleh, mi ngou ahihban ah, feet 5 vel in sang a, a khe chin ah nail polish violet rawng kinuh a, kamis silh a, mawja (shock) bun in alu leh amai ahah liam luat ziak in kua hi hiam chih chet haksa mahmah chi uhi. Siluang kua hihiam chih chet ding in Vairengte Damdawi inn ah koih in om lel hi. Vairengte khawsung makaite leh Police te’n thiltung suizuina neilel uhi.

Moupa vuakziak in kiten hunsuan
Aizawl, Feb 19:
Zotlang Presbyterian Kohhran Biakinn ah tuni February 19 suun dak 12 in Oliver Zodinsanga leh Linda Laldinthari te saptuam dansiang in kiteng ding uh chih himahleh, zanhal nitak in moupa vuak a om ziak in kiten hun suan a om hi’n kigen hi. Thusuak kingahdan in, February 17 nitak in mounu di te’ inn ah man khumna om a, huai program zawh in Oliver leh alawmte mounute’ inn ah va pawt uh hi’n kigen hi.
Nitak dak 10 vel ding in Oliver leng a nungaknute’ inn apan dawr ah thil leiding in pawtkhe zual a, huchih lai in Electric veng MHIP office bul a tun in teirawl pasal 5 ten ‘nou chou hia?’ chih tawh vuak thuah uh hidanin gen uhi. Oliver ahihleh damdawi inn tut in om a Feb 18 zingkal in khua phawk pan a, Feb 18 2010 a Biakinn a Rehershal neih hunding ah leng tel peihlou chi uhi. Tu in hunchiam omlou in a kitenna uh hun suan in om hi.

Leave a Reply