Designated camp 10 lak ah 1 zawh hipan: Cadre te lawh piak hiding
Government leh SoO group (KNO/UPF) te’n JMG meeting nei
Imphal, Jan 8: Manipur singtangmi helpawl Kuki National Organisation leh United Peoples’ Front palaite tawh tuni’n Government palaite’n Ist Manipur Rifles Banquet Hall ah atuam tuakin Joint Monitoring Group meeing nei ua, huai ah maban paizel dingdan tel in hunpaisa a thiltung tuamtuam genkhawmna nei uhi. Helpawlte’ adia designated camp 10 bawlding tungtang ah UPF nuai a KNF (P) te’n mun khat a zawhsiang uh chih louh adangten zawhsiang nei nailou uh hi’n kigen a, cadre te lawh leng a kinthei bang pen a piakkhiak ding in thupuk uh chih thu kiza hi.
Thusuak kingahdan in, KNO palaite ahihleh KNO Spokesman Seilien Haokip in makaih a, UPF palaite ahihleh T L Jacob Thadou in makaih hi. Government lam apan in Union Home Ministry apan Director (North East) Dr MC Megha Landhan tel a, Manipur Chief Secretary DS Poonia, IGP (Intelligence) LM Khaute IPS, Commissioner (Home) Vumlunmang Vualnam ban ah Army, Assam Rifles, Central Reserve Police Force leh Border Security Force apan top official tamtak tel uhi.
Helpawl 11 kigawmna KNO palaite leh Government palaite’n zinglam dak 11 apan dakkal 1:30 sung vel houlimna (JMG Meeting) nei ua, amau azawh utawh kiton in helpawl 8 kigawmkhawm UPF lam te tawh Government palaiten JMG meeting neinawn uhi. Meeting 2 te ah designated camp tungtang genkhawm in om a, huai ah Manipur singtangmi Non-Naga helpawl group 19 te’n designated camp 10 abawlding uh chihna lak ah UPF nuai a om Kuki National Front (President) te’n Kangpokpi area a designated camp azawhsiang uh chihlouh a dang khat mah in leng zousiang nailou uh hi’n gen uhi. Designated camp bawlna dia sum paite leng a kintheibang pen a government in a release ding in JMG meeting in thupukna bawl tuaktuak uhi.
Cadre te’ lawh tawh kisai in, Sept 2009 ading a kimthrap in piakkhit hita a, ahihziak in Oct 2009 apan tunitan ading release nailouh a om pen leng kintak a government in apiakkhiak ding in meeting in thupukna la uh hi’n kigen hi. Cadre te’ Indentity card leng issue thak hiding in kithukim ua, helpawl lam in cadre khenkhat chiindan hoihlouh ziak a atawpsak uh om ziak a I card issue dan leng buai mahmah hi’n gen ua, tuaziak in Identity card thak (fresh I card) poimawh ahi chi uhi. Government palaite’n SoO Group a telte vauna bawl in, thagum a mi sumlak, lawh apan sum cut sak leh tax tuamtuam a don uh kintak a khawlsak ding in warning pia uh chi uhi.Dec 22 2009 a Nongbram a KNF (P) te’ gamtatna tawh kisai leng JMG meeting in genkhawm in hibang thil atun nawnlouh ding ahi chi’n government palaiten a kisaipihte vau uhi.
Special Operation Group meeting kichi tuni nitaklam in Chief Secretary makaih in om a, huai ah civil leh military top official te tel uhi. Zingchiang (Jan 9 2010) chiang in Security tawh kisai mah in meeting om nawndinga, hiai pen IGP (Intelligence) LM Khaute IPS in makaih ding a, huai ah KCP (MC) Lalumba @ Jitendra pawl in galvan kohkhia a ki surrender a sawm thu uh genkhawm hiding a, Union Home Ministry apan official-te a telding ban uah civil leh military top official-te leng telding uh chi uhi.
Phungzathang makaih in Power Minister meet om ding
Imphal, Jan 8: Manipur’ Power Minister Phungzathang Tonsing makaihin Januaryh 11 & 12, 2010 chiang in a 8 veina TCC & North East Region Power Committee meeting kichi om Imphal’ North AOC a Hotel Classic ah om ding a, huai hun ah India malsuah bial state 7 a Power Minister teng telkim ding uh chih thu kiza hi. Tuaban ah, Commissioner (Power) leh Chief Engineer (Power) ten leng hiai hun uapding uhi.
Manipur in hiai bang khawmpi a zintun patna hidan in kigen a, January 11 2010 zinglam dak 11 in Manipur Chief Minister Okram Ibobi Singh in hongkhe ding hi. N-E Power Minister te hongzin dingte ahihleh, Pradyut Bordoloi (Assam), Mukul Sangma (Meghalaya), Manik Dey (Tripura), D Y Sema (Nagaland), Lalthanzara (Mizoram) leh Jarbon Gamblin (Arunachal Pradesh) te hi ua, amau Jan 10 2010 nitaklam in Imphal hongtung ding uhi. Manipur government in amaute state guest dan in puang ua, January 10-13 2010 sungteng zahtakna lianpi tawh zintun ding uh ahihdan tuni’n taklang uhi.
Thangthuam IPS theihgigena music video hongkhia
Lamka, Jan 8: 2005 December 31 a Oinam a phaizang helpawlte’ ambush a si, Upa (late) T.Thangthuam, IPS IGP (Intelligence) theihgigena ding a kibawl, ‘Kumsawt a Ngilhmoh’ kichi Music Video Album honna tunitaklam dak 1:00 in, YPA Hall, New Lamka ah om hi.
Rev. L. Khamkholun, General Secretary, EBC in album honna nei in, a lat na leng nei ngal hi. Rev. L.Khamkholun in a gendan in, leitung a i dam sung uh hun tomchik hi a, i dam sung a thil hoih hih i sawm ding uh ahi chiin gen hi. Huai ban ah, Kum sawt pi dam a, thil hoih hihlouh sang a kum tom chik i dam sung a thil manpha i hihpen hoih zaw ahi chi a gen in, Upa (L) T.Thangthuam IPS in a dam sung kum tom chik sung a a thil hih te phathuai a sak thu gen hi.
Hiai album a laa te ahihleh a tangpi in Upa (late) T.Thangthuam in a dam sung a a na phuah te hi a, khenkhatte bel midang in, amah a iit leh ngaih na ziak ua aphuah uh hidan in gen uhi. Hiai hun ah (late) Thangthuam ngainatu mipi tamtak paikhawm uhi.
Sunday school teacher seminar om
Lamka, Jan 8: Evangelical Baptist Convention, Baptist Children Department, Lamka South Division te’ saina in zan apan in, EBCC Vengnuam ah, Sunday Skul Sinsaktu Seminar 2 vei na nei uhi. Zan in, Rev. Dr. Luaichinthang, Divisional Superintendent, Lamka South Division in seminar honna nei in, Upa L.Vungzamuan Child Co-ordinator, EBC, Pastor K.Vumzathang leh Thangbiaklian Hangzo, Project Coordinator, Home Base Care ten sinsakna nei uhi. Hiai seminar hun sung in, Lamka South Division sung a saptuam tuam tuam apan, Sunday School heutu tamtak paikhawm ua, tuni in zou siang uhi.
Centenary gate bawlding
Lamka, Jan 8: Manipur ah tangthupha (Pathian-thu) hong lut nung kum 100 chin lopna tukum in thupitak in neih hiding hi. Hiai centenary lop na ding tawh kisai in, committee tuam tuam guan in om a, huai te’ lak ah, Construction committee pawl saina in tuni in Centenary gate bawl na ding ground breaking neih in om hi. Centenary gate ahihleh, Tuibuang Peace Ground kiang ah bawl hiding in gen uhi. LS. Gangte, BOT Chairman, ECCI in, Centenary gate bawl na ding ground breaking nei a, saptuam makai tamtak tel uhi.
Theihgigena suangphuh hongding
Lamka, Jan 8: Vungzakai @ Zakai Hangsing, CSI/FCS of Bungmual in tuni (Jan 9, 2010) zinglam dak 8 in Bungmual Hanmual ah a pa (late) Nokzanial, anu (late) Gouniang, a sanggampa (late) Langzasuan leh asanggamnu (late) Engkhanman te theihgigena suangphuh honna neiding hi.
DC in khaw 6 a nasepna enkhia: Lungtunglou
Lamka, Jan 8: Tuni zinglam dak 8:00 vel apan in, Jacintha Lazarus, IAS, Deputy Commissioner, CCpur in Tuibuang Block sung a NREGS tawh kisai a na kisemte et khiakna nei hi. Huai hun ah, DC in khaw 6 a na kisem te enkhia a, DC lungtung chiahlou hidanin gen uhi. NREGS a na kisem te ahihleh, a sum sanction tawh ettuah in DC in lungtunhuai sa lou ahihdan gen ua, a lung tun louh dan leh, na kisem te hoih a sak louhdan kampau zang chi uhi.
Power Minister in mun 2 program uap
Lamka, Jan 8: Phungzathang Tonsing , Minister, Power, Sc & Horticulture in tunin Lamka hong pha a, zinglam dak 8:35 vel in Bungmual a a sanggam pianpih (late) Ngulkhoman theihgigena dia kibawl ‘Ngulkhoman Blessing Home’ kichi honkhiakna hun uap hi. Hiai hun ah, Minister pa’ lawinu Zachhung in inn honkhiakna nei a, Pastor H Jamkhanpau in Pathian min tawh innthak latna leh siansuahna nei hi.
Tuni mah in Kawnpui khua in Silver Jubilee a lop na uah Power Minister in chief guest hihna tawh va uap hi. Power Minister ahihleh Lamka ah giak in, January 10, 2010 in Imphal lam ah kiik suk nawn pan ding hidanin thutut kingah hi. Thudang khat ah, Jan 9 sunnung dak 2:00 in YPA Hall, Hiangtam Lamka ah, Phamsa Son Samte in a bawl ‘Sinlai Lianu’ Music Video Album honna om ding hi. Huai hun ah, Power Minister in Chief Guest hihna toh uap ding a, Thangkhosuanmung Guite, Hiangtam Lamka hausa in leh K.Ngulkhanthang, District Horticulture Officer te’n Guest of Honour leh Functional President hihna tawh uap ding uhi.
Thangso Baite MP in Lamka pha
Lamka, Jan 8: Thangso Baite, MP (Outer Manipur) in tuni’n Lamka hongpha in, B.Vengnuom a a tanau-te’ kitenna program hong uap hi. Amah tuni mah in Imphal ah kiik suk nawn ngal chih thu kiza hi.
Sangaikot in OC nei khongta!
Lamka, Jan 8: Sangaikot Police station in kum tamkhop paisa apan a thulel in Officer-in-charge nei ua, himahleh, a tak in OC nei vang mahmah uh chi uhi. Huchih lai in, Sangaikot Police Station a Officer in charge len ding in, Inspector SL Thangzapau Vaiphei mawhpuakna piak in om a, aman leng tuni in GB Sharma, Superintendent of Police Churachandpur kiang ah joining report pia hi.
Thanlon SDPO makaihin meeting om
Lamka, Jan 8: Tuni zinglam dak 11:00 in Khuplen Lhouvum, MPS, SDPO Thanlon makaihin a office chamber ah crime tawh kisai meeting nei uhi. Hiai hun ah, ama etkolna nuai a om Police staton, Parbung Police Station, Thanlon Police Station leh Henglep Police station a OC leh IO teng tel in thu poimawh hunkhop kikum uhi. SDPO apan thusuak kingahdan in, Indian Republic Day anaih mahmah taak ziak in police station teng leng kigingsa a om ding in theihsak hi uh chi a, police station 3 te a case pending om teng, a kin thei bang pen a a kisai pih IO teng in a hihfel ding uh chi in thupuk na la uh ahihdan gen hi. March 5, 2009 apan tuni tanin case kibaang tuamtuam 40 velding hihfel ta ua, himahleh police staton 3 te apan a kigawm a case pending 70 vel om zoulou chi uhi. February 8, 2010 in meeting poimawhtak nei zom nawnding uh hi’n leng kigen hi.
Mizoram innkaang ah mi 1 kanglum
Aizawl, Jan 8: Tuni zinglam dak 1 vel ding in Aizawl’ Zemabawk a Lallawma tenna inn meiin kang a, huai ah inn neitupa Lallawma (58) vangtahhuaitakin kanglum kha chi uhi. Thusuak in agendan in, meikaang a hatluat ziak in innsung van khat mah leng lakkhiak man hilou chi ua, meiphelh pawl in gari 3 zang mah le uh zekai deuh uh hi’n kigen hi. Lallawma ahihleh, PHED nuai a Junior Engineer semlel ahi hi.
Tuaban ah, zan nitak dak 8 vel mah in Aizawl’ Salem venga AH & Vety Department te’ Quarter kaang a, huai ah T.Zoramsiama luahna quarter kangtum dimdem chi ua, ahihziak in sihna leh liamna tuak bel om manlou chi uhi. Nitaklam dak 5 leh dak 6 kikal vel mah in Thuampui veng Lunglei Road JK tyre building bul a niin kipaihte kaang a, huai in mi tamtak patausakman chi uhi.
Apunba Lup leh govt kihoulem
Imphal, Jan-8: Khwairamband bazar,BT Road ah July 23,2009 a thiltung tawh kisai in tuni zinglam in Chief Minister O. Ibobi office ah Apunba Lup a Working Committee banah AMSU,MSF,KSA leh (late) Sanjit leh (late) Rabina sihna thu a JAC makaite leng telin CM makaihna in govt tawh kihouna nei uh a, kilemna om ziakin Apunba Lup pawlin kiphinna tawpsak thu puang in Seppatni(Jan 11,2010) in student-te adingin ngeina bangin class kipan nawn ding in puang uhi.
Tuni a kihouna ah Chief Minister in July 23,2009 a thiltung Enquiry Commission in a suizui banah Gauhati High Court in leng CBI suizuisak dia thupiak a bawl ziakin Judicial enquiry zawhsiangna ding leh CBI in a suina ding ah kuapeuh in kithuahpih ding in ngen a,enquiry in a suikhiak dungzui in dan tawh kituak action lak hidin puang hi.Kilemna point 4te ah kiphinna ziaka mat a omte govt in thunung thuma omlou din khah ding a,vanzat mat(seized)omte leng piakkhiak hiding hi. (late) Mrs Rabina innkuante ex-gratia piak banah aliamte leng panpihna piak hiding a, CI operation tawh kisai complaint omte govt in enzui pah ding chih hi.Apunba Lup kia hilouiin AMSU,MSF,KSA leh JAC 2 te’n a kiphinna uh tawpsan ding uh a, class boycott leng adangdang leng tawpsak ding uh chih hi.
Guite road bawlna ah telchiat din ngen uh: Panpihna tamtak lut
Jan 11, 2010 in mipi tamtakin Tuivel lei bawl ding
Lamka, Jan 8: Zomi Students Federation (ZSF) inntekna in January 11, 2010 (Seppatni) in Guite road a om Tuivel-lei(bridge) kichim zakdek mipi thahatna tawh bawl hiding a, huai ah aneu-alian mipi kuapeuh telchiat ding in Organizing Committee in ngetna bawl uhi. Huai Ni ading in panpihna tamtak lutta a, Ngasuon lei tawh kibang a tuahsiatna mulkimhuai tungthei gige ahihziak in kuapeuh in “Guite Road Black Day: Mass Protest Rally”’ hun ah tha-le-zung thawh chiat ding in ngen uhi. Huai adin akol-avai khentuam omlou a mipi’n nasem ding ahihman in mipi palai MLA/Minister-te’n leng tupi letpih sam din chial uhi.
Mipi social work hun a apoimawhna a zatding in Power Minister Phungzathang Tonsing in Rs 1 lakh thawh a, Tuivel lei diversion bawlna ding in T Hangkhanpau,MLA leh a Chief Agent Suanchinpau Guite in JCB 1 leh Bull Dozer khat thawh ding ua, DSO/CCpur in singpi leh sang a chiamban ah, Guite Road Trpt Co-op Society Ltd leh Aizawl Sumo Service Assn in leng support puang in mipi nasepna ah telding uh hi’n gen uhi. CCpur Saktiman Owners Assn, Malwari society, Bihari & Bengali Traders ban ah district sung a civil society teng phial in kithuahpih ding uh ahihdan puang uh a, Protest social work neihzawh chiang in Suangdoh khua ah public meeting in zui ding hi’n kigen hi.
Gari neiteng in kengchiat ding in organising comtt in ngen uh a, tuaban ah mipi paina ding gari thawhtheite kipahpih mahmah uh ahihdan puang in, Jan 9 nitaklam dak 2 apan January 10 nitaklam dak 5 tan a a gari te uh Lamka Public Ground leh Ebenezer Academy campus ah koih chiat ding in ngen uhi. Jan 11, 2010 zinglam dak 8 tan in Ebenezer campus leh Lamka Public ground ah mipi kimchiat ding in zasak uh a, suahdul, suanggaal, tupi leh tempawng tawiding in ngen uhi. Guite Road Black Day zatna ziakin khawpi sung ah Jan 11 2010 in dawr teng khakvek ding in theihsak hi ua, social work na a kizangkhalou gari himhim in hiai Ni in Guite Road zuitheilou ding chi’n leng puang uhi.
2006 kum in state cabinet in BRO khut ah Guite road piakkhiak ding in thupukna la ua, GoI nuai a Defence Ministry in G S Fund in hiai Nna ka semsuah ding uh chi mah le uh tunitan State PWD in BRO khut ah ‘Guite road’ pekhe nailou uhi.
CCpur district ading SK oil allocation
Lamka, January- 8: FCS Deptt in CCpur district a SK Oil Dealer 5 in January, 2010 kha adia SK Oil a ngah ding zah uh kigawm Kilolitre(KL) 168 bikhiah a, huai dungzui in M/s ZT & Company,CCpur in Kilolitre(KL) 32 ngah ding in bikhiah hi a, M/s Pudaite Traders/Thanlon in KL 30 ngah ding a, M/s BB Lal & Company/CCpur in KL 32 , M/s Jamthenlal & Haoboi SK Oil Agency/Singngat in KL 34 leh M/s S. Paite/ CCpur in KL 40 ngah ding chi’n order suak hi.
Thawmte Unau Meet-2010
Lamka, Jan-8: Thawmte Innpi vaisaina in CCpur Govt College a Multi-purpose Hall ah January 9,2010 zinglam dak 10.30 in “11vei Thawmte Unau Meet-2010” om ding hi. Huaiah Thawmte mi-le-sa sisate sunna, tup-le-ngim pulakna, Seminar, Special Cultural programme leh adangdang om ding a,thugenna leh lasiamte apan avangkim in lasak ngaihkhiak leng om ding hi. Kikhopna zawh in ankuang luina in zui ding hi.
Combined teamin helte 2 kaplum
Imphal, Jan-8 : Bishnupur Police Commando leh 16-Maratha Light Infantry kigawm combined security teamin zan nitak dak 11.30 velin helpawl om uh chihthu zak ziakin Moirang PS a Terakhongshangbi Uyum Makhong leh Gelmol Kuki village kikal operation a bawlna uah bangtanhiam nungin Tronglaobi leh Gelmol kikala inter-village road ah helpawl tawh kikap in minute 10 vel a kikaptuah nung in helte taikhia uh a, combined team in kikapna mun ah siluang 2 mukhia uhi. Misi 2te KCP(MC) Lamyanba Group-te hi’n suikhia uh a, huaiun apan in 9mm pistol 1, atang 6, hand-set 1 leh KCP min a demand letter 6 mukhia uh chihthu om hi. Misi 2te bel L Bony @ Boris @ Tomba (250 s/o L. Ishokanta of Phubala Awang leh H. Manglem Singh @ Mangkhulen (21) s/o H. Ranjit of Phubala Awang hi’n police thusuak in gen hi.
Education Minister in Press-te kimuhpih
Imphal, Jan-8:Education Minister L. Jayentakumar in tuni in Press Conference sam a, huai ah July 23, 2009 a thiltung tawh kisai a Apunba Lup leh Student Union 3 te’n kiphinna a neih uh govt tawh kilemna om ahihdan puang hi. Kilemna omta ahihziakin school tuamtuam in class nei theita ding uh a, Apunba Lup leh Student Union pawl 3 te’n mipi khualna a govt tawh kilemna a neih ziak un kipahthu leng gen hi.
Minister in a genbehna ah Guardian leh Media-te apan kithuahpihna thupi a sak thu taklang a, maban ah leng media-te’n kithuahpih tou zel ding in ngen hi. Kiphinna om sunga class laklouh a om ahihman in govt in a subject hoihtak a cover zawhna din special Coaching pan ding a, private school te leng hiai coaching ah tel theiding a panlak hidin leng gen hi. Hiai Special Coaching bel Class X & XII te ading kia hi a, Class I-IX te ading in leng Academic Calendar hoihtak bawlkhiak hiding, chi hi. Tua banah, School kailouh sung in Private school khenkhat in school fee la ua, hiai tawh kisai leng govt in tunung a ngaihtuah ding hi’n gen hi.
Commando-te’n KCP(MC) 2 man
Imphal, Jan.-8 : Imphal West Police Commando te’n zan nitak dak 7:00 vel ding in Uripok Cheirap Court kiangah KCP(MC) 2 mankhia uhi. Mat a omte bel Dhomen Salam(19) of Laphupat Tera Khunou leh Th. Sharju Singh (25) of Kakching Khunou hi uhi.
MLA teng telkim din theihsak hi uh
Imphal, Jan-8: 14-Yaiskul Assembly Constituency apan MLA chingthak E. Suraj Singh s/o(late) E. Kunjeswar Singh in January 13,2010 zinglam dak 10.00 in Manipur Assembly Hall ah MLA dingin Assembly Speaker Dr S. Budhichandra Singh in kichiamsak ding hi. Huai hun ah tulela Manipur Assembly Member(MLA) tengin kimtaka uap cdingin Assembly Secretary Th. Megha Raj Singh in theisak hi.
Chief Security Officer in bikhiah
Imphal, Jan-8: Manipur Assembly term 9na adia tutkhawmna(Session) 7veina January 13,2010 zinglam dak 11.00 in kipan ding a, huai ah bittak leh nawngkaina omlou a Session a paitouh ngimna in Assembly Secretariat a Chief Security Officer in Assembly huangsung a Gari lutdan leh potkhiakdan ding tawh kisai Chief Minister/Minister/MLA leh Officer te’n a nelhsiah theihlouh ding uleh zuihchiat ding thusuah bawl hi.
Re-allocation of works (very important)
1.LP Gonmei,IAS, Principal Secretary(Power/TD & Hills) as Principal
Secretary(Power/TD & Hills) and will hold additional charge of Director(TD).
2.Dr Suhel Akhtar,IAS, Commissioner(Relief /Disaster
Management/RD & PR) as Commissioner(Relief/Disaster
Management/RD & PR) and will hold additional charge of Director(RD & PR).
3. KK Chhetry,IAS, Commissioner(Adult Education) as Commissioner(Tourism) &
ex-officio Director(Tourism).
4. BB Sharma,IAS, Commissioner(Tourism) & ex-officio Director(Tourism) as
Commissioner(Adult Education).
5. T. Panmei,IAS, Registrar of Co-op Societies as Registar of Co-op Societies and and
will hold additional charge of Director(Commerce & Industries).
6. Norbert Disinang,IAS, Secretary(CADA) & ex-officio Director(Commerce &
Industries) as Secretary(CADA) and will hold additional charge of
Director(Transport) & Managing Director(MSRTC).
7. Devesh Deval,IAS, Director(Transport) & ex-officio Joint Secretary(Home) and
Managing Director(MSRTC) as Joint Secretary(Home) & Director(Relief &
Rehabilitation).
8. C. Hangshing,MCS, Director(Relief & Rehabilitation) and ex-officio Dy
Secretary(FCS) & ex-officio Add; Director, Education-S(Hills) as Deputy
Secretary(FCS) and ex-officio Additional Director,Education-S(Hills).
Cabinet reshuffle zawh in Ministry sung buai
Meghalaya a Congress Minister te’n P A Sangma mu uh
New Delhi/Shillong, Jan 8: Meghalaya Chief Minister DD Lapang makaih Meghalaya United Alliance(MUA) govt buainawn thei dinmun ah om a, tuni apan in MUA sung bouruak sang mahmah chihthu om hi. DD Lapang in ni 3 lel paisa in a Ministry ah major reshuffle bawl a, huai apan Congress Minister bangzahhiam CM tung ah thangpai mahmah uh hi’n kigen hi. Huchih lai in, zan nitak in Congress Minister ten New Delhi ah NCP General Secretary P A Sangma MLA va kimuhpih uh chih thusuak om hi.
Thu kizadan in Congress Minister khenkhat in Congress MLA te’ lak a senior mahmah bangzahhiam omte cabinet ah laklut ding in phu ua, Independent MLA khenkhat leng paihtheih ahi a chih ban uah, centre ah leng Congress leh NCP kikawi ahihman in state ah leng NCP tawh kikawi a, ministry thak dinkhiak hihen chi uhi. Khenkhat in a gendan un NCP in Congress tawh ministry a bawl aleh Minister seh 3 suah seh 2 tanpha Congress piakding in lemsa uh hi’n gen uhi.
CM Lapang zan nitaklam dak 3 in New Delhi tung in, nitak dak 6 in Kolkata zuan in lengkhe nawn chi uhi. Lapang in dakkal tamlou Delhi ah hun azat sung in AICC leader khenkhat kimuhpih in, Meghalaya ministry a thiltung guih tungtang theisak a, tuazawh in Kolkata zuan chi uhi. Minister te’ portfolio khenkolhna hun ah Lapang in KHNAM MLA omsun Paul Lyngdoh paihlou a, a guan teitei laiziak in amah paihkhe dia kiphin MPCC president Friday Lyngdoh ban ah MUA Govt nuai a Congress Minister om kha teng thangpai mahmah in zanhal in New Delhi zuan uh a, ki-camp uh hi’n gen uhi.
Congress makaih Meghalaya United Alliance (MUA) govt ah tulel in, Congress in Chief Minister telin Minister 6 nei ua, UDP in 2, KHNAM in 1 leh Independent MLA 3 in Minister hihna len uhi. Congress Minister te’n PA Sangma a kimuhpihna thu uh bangmah genkhiak hinailou a,Sangma leng Delhi mah ah omlai chi uhi.
EDITORIAL:
Tuni thupi: “Mi nuamsate simmawhna leh kisatheite muhsitna in ka hinna uh a dim vinven hi.” – Sam 123: 4
Sepna mun a om chiat ding
(No work, No Pay)
I theihchiatsa bang un zan in All Tribal Students’ Union, Manipur (ATSUM) in Manipur singtanggam a posting teacher tengin academic session 2010 kipatma in mahni posting na mun a om chiat ding in theisak hi. Hiai pen a zakha asimkha liaiten kipahpih mahmah in ATSUM tungtawn a ‘education reformation’ thupitak hong om thei eive maw chih ngaihsun uhi. ATSUM thusuak dungzui in govt. school a admission bawlnuam student tamtakte lungbuaitak a omsaklou in lamzangtak a paitheih deihna in ATSUM in hibang thusuah bawl ahi chi ua, private School tamzaw in admission bawl zouta uh ahihmanin govt school te’n leng ngai poimawh ding in zasak uhi.
ATSUM in thusuah abawlna uah, ATSUM theihsakna zuilou a student lam apan complaint a om ngeingei aleh suizui hiding a, thil diklou muhkhiak a om leh action lak hiding chi uhi. ATSUM in Manipur singtanggam a solkal nasemte tung ah tukum apan in ‘No Work, No Pay’ chih thupi zang in panla ding ua, Manipur govt inleng singtanggam a school pute transfer leh posting tungtang session kipatma a hihfel vek ding inleng zan in ngen ua, hiai pen a taksuah ngei uh mipi kinepna ahi hi.
ATSUM in hangsantak a hibang thusuah abawlpen uh hoih mahmah a, a sepding tak semkha leng ahi hi. Singtangbial ah government teacher tam mahmah a, tutung in district council nuai ah a sang asim lakthak hinawn ding hi. School less teacher chih tanpha om a, government zaw hoihlua eive maw chihchih theihding in om hi. Lawh tampipi sang government teacher te amau sepna mun chiat ah pai himai zenle uh bangziak a singtanglamte thawm hauhau ding uhiam chih theihin om hi. Government in khateng a lawh tampipi pia a, sepna mun a paipeih lou a, khaw hausate tawh kihoulem a, tang a misawl ahihkei leh hausa te kiang a Rs 1000 khawng pia a attendance hoih tak a gelhsak mi bangzah i om ua le? Manipur singtangmite 90% bang Christian hi mahmah ding hi. Mahni posting na mun a pailou a, zuau thu tawh lawh lala te corruptor hilou ding uhia? Singtanggam a posting hi ngal, Lamka zanga om den a local saptuam khawng a inntek leh dinmun poimawh taktak len mi bangzah i om ding ua?
ATSUM in hibang thupuan abawlpen ikipahpih kawmkawm in, sepleng a sepsuah ngeingei ding uh ahi hi. Thubaih liai zaw ahi kholkei maithei! Helpawl tuamtuam in leng government employee te himhim mahni sepna chiat ah om ding chi’n thusuah bawlsek mah le uh a taktak a semsuah bangzah a om ding ua? Tu’n leng ATSUM te ading in pilvanna ding tam mahmah a, singtang gam a pai utlouh ziak a suanlam tuamtuam bawl a, heutute a va golhguk (bribe) ua, a ki hamhaihsak mai khak ding uh lauhuai mahmah hi. Thugensa, thupuansa zuihlouh kichi zulhzauna hi a, huai ziak in ATSUM in singtangmite awlmawhna ziak ahibang thupuan abawl uh a sepsuah ngeingei ding uh chih mipi kinepna hita hi.
Employee khat hi ngal a, mahni sepna a kuanpeihloute government mahmah in leng explanation a call a, warning apiak a, a kuan tuankei ua leh sem utlou bang a ngaihsun a termination order a suahkhum ding uh ahi. Manipur ah sepna neilou nasepna lunggulh tuailai laisiam taktak lakh 5 val bang om ahihman in a sempeihlouhte’ sang in a sempeihte adia kong honsak maiding dan ahi. Laisiangthou ah a semlou in ngawl hen ana chi a, tuamah bang in a semlou tuh lawh leng piaktaklou a, ‘No work, No pay’ chih ding mah hi a, i nekmuhna a i ginom kei leh khelhna hi a, i ginom le bel mi diktat ihih ding ban ah gam le nam itna taktak leng ahi hi.
